සැමියාගේ පහර දීමෙන් 18 හැවිරිදි බිරිය මියගිය බවට චෝදනා කරමින් ඊයේ (31) සවස කිරිමැටියාව උණලීය මාර්ගයේ වැටැහැපිටිය මංසන්ධියේදී මියගිය අයගේ සිරුර තබාගෙන පිරිසක් විරෝධතාවක නිරත වූ බව කටුපොත පොලිසිය කියයි.
මෙසේ මියගොස් තිබුණේ කිරිමැටියාව කෙළිනාවල පදිංචිව සිටි ආර්.පී. සෙනුරි ප්‍රේමතිලක නමැති කාන්තාවකි. මියගිය තැනැත්තිය මීට මාස කීපයකට පෙර කිරිමැටියාව මඩුගොල්ල ප්‍රදේශයේ පදිංචි තරුණයකු සමඟ විවාහ වී ඇති බව සිද්ධිය සම්බන්ධයෙන් සිදු කරන පරීක්ෂණවලදී පොලිසිය විසින් අනාවරණය කරගෙන තිබිණි. මේ යුවළගේ නිවෙසේ සිදු වූ ආරවුලකදී තරුණයාගේ පියා විසින් තරුණියගේ මවට පහර දුන් බවට කටුපොත පොලිසියේ පැමිණිල්ලක් සටහන් කර තිබුණේ මීට දින කීපයකට ඉහතදීය. මේ පැමිණිල්ල වහා ඉවත් කරගන්නා ලෙස තරුණයා සිය බිරියට බල කර ඇතැයි විරෝධතාවයට එක් වූ මියගිය තරුණියගේ ඥාතීහු කියති. ඒ අවස්ථාවේදී ඇති වූ බහින්බස් වීමෙන් පසු තරුණයා සිය බිරියට පහරදී ඇතැයිද පිරිස චෝදනා කරන අතර, පහරකෑ තරුණිය රෝහල්ගත කිරීමෙන් අනතුරුව මියගිය බව පැවසූහ. මෙසේ මියගිය තරුණියගේ දේහය මහමඟ තබාගෙන විරෝධතාවේ යෙදුණ පිරිස ඉල්ලා සිටියේ තරුණියට පහර දුන් ඇයගේ සැමියා වහා අත්අඩංගුවට ගන්නා ලෙසයි.
මේ සිද්ධිය සම්බන්ධයෙන් කටුපොත පොලිසියේ ස්ථානාධිපති (ප්‍ර.පො.ප) කමල් රත්නායක මහතාගෙන් කළ විමසීමේදී ඔහු පැවසූයේ කුලියාපිටිය මහ රෝහලෙන් සිදු කරන ලද අධිකරණ වෛද්‍ය පරීක්ෂණයේ වාර්තාව අනුව මියයෑමට හේතුව පහර දීමක් බව අනාවරණය වී නැති බවයි. කෙසේ වුවද මේ සිද්ධිය සම්බන්ධයෙන් මහේස්ත්‍රාත් පරීක්ෂණයක් සිදු කළ බැවින් එම නඩුව කැඳවූ විට ඕනෑම අයකුට ඉදිරිපත්ව කරුණු දැක්විය හැකි බවද ඔහු පැවසීය. කටුපොත පොලිසියේ කරුණු පැහැදිලි කිරීම සහ මැදිහත් වීම මත පිරිස දේහයද රැගෙන විසිර ගිය බව පොලිසිය කියයි.
