මාස දෙකක් ඇතුළත පිහි ඇනුම් සිදුවීම් හේතුවෙන් පුද්ගලයන් 55 දෙනකු ජීවිතක්ෂයට පත්වීම සම්බන්ධව චීන රජයේ දැඩි අවධානය යොමු වී ඇතැයි විදෙස් මාධ්‍ය වාර්තා කළේය. චීන රජය මේ පිළිබඳ අවධානය යොමු කිරීමට පියවර ගෙන ඇත්තේ ජූලි මාස මුල් භාගයේදී අහඹු පිහි ඇනුම් සිදුවීම් දෙකක් වාර්තා වීමත් සමඟ බව ද විදෙස් මාධ්‍ය වැඩිදුරටත් වාර්තා කළේය. ඒ සිදුවීම් දෙකත් සමඟ පසුගිය මැයි මාසයේ 7 වැනිදා සිට ජූලි මස 4 දින දක්වා කාලය ඇතුළත පුද්ගලයන් 55 දෙනකුට දිවි අහිමි වීමට පිහි ඇනුම් සිදුවීම් 40ක් හේතු වී ඇතැයි එරට ප්‍රාදේශීය මාධ්‍ය සඳහන් කර ඇතැයි ද විදෙස් මාධ්‍ය සඳහන් කළේය.
ගුවැන්ංෂී ප්‍රාන්තයේ සහ ගුයිපිං සිටි හි යූමා නම් වූ කුඩා නගරයකදී දරුණු පිහි ඇනුම් සිදුවීම් වාර්තා වී ඇති බවත්, එම පිහි ඇනුම්වලට බාලවයස්කාර දරුවන් ද ගොදුරුවී ඇති බවත් විදෙස් මාධ්‍ය සඳහන් කළේය. එම සිදුවීම්වලට අදාළ වීඩියෝ දර්ශන සමාජ මාධ්‍යජාලයට බෙදා හැරීම ගැන රජයේ බලධාරීන් අනතුරු ඇඟවීමෙන් පසු චීන පොලිසිය තහවුරු නොකළ එවැනි වීඩියෝ පට බෙදා හැරීමට එරෙහිව නීතිමය ක්‍රියාමාර්ග ගන්නා බවට ප්‍රදේශවාසීන්ට තර්ජනය කර ඇතැයි ද විදෙස් මාධ්‍ය වැඩිදුරටත් වාර්තා කළේය.
