ආරක්‍ෂක අමාත්‍යාංශයේ මාධ්‍ය කේන්ද්‍රය, රජයේ ප්‍රවෘත්ති දෙපාර්තමේන්තුවේ ජනමාධ්‍ය පර්යේෂණ අංශය හා එක්ව ත්‍රිවිධ හමුදා සාමාජිකයින් සඳහා ’60 වැනි විශ්ව සම්භාව්‍ය සිනමා දැක්ම’ පසුගියදා කොළඹ 5 පිහිටි ප්‍රවෘත්ති දෙපාර්තමේන්තු රඟහලේදී පැවැතිවිණි.
හමුදා නායකයින් පිළිබඳ ඇති ත්‍රිවිධ හමුදා නිලධාරීන්ගේ දැනුම වර්ධනය කිරීම සහ ඔවුනගේ චිත්ත ධෛර්යය වැඩි දියුණු කිරීමේ අරමුණින් ඉන්දීය හමුදාවේ ෆීල්ඩ් මාර්ෂල් සෑම් මනික්ෂෝගේ චරිතය පාදක කරගනිමින් නිර්මාණය කරන ලද සම්මානලාභී හින්දි චිත්‍රපටයක් වන ‘සෑම් බහදූර්’ චිත්‍රපටය මෙහිදී ප්‍රදර්ශනය කරන ලදී.
ප්‍රවෘත්ති දෙපාර්තමේන්තුවේ සහකාර ප්‍රවෘත්ති අධ්‍යක්‍ෂ ආචාර්ය හර්ෂ බී. අබේකෝන් මහතා විසින් මෙහි පිළිගැනීමේ කතාව පැවැත්වීය. කොළඹ විශ්වවිද්‍යාලයේ ජ්‍යෙෂ්ඨ මහාචාර්ය ධර්ම කීර්ති ශ්‍රී රංජන් මහතා, කැලණිය විශ්වවිද්‍යාලයේ කථිකාචාර්ය සුභා රත්නායක මහත්මිය සහ බ්‍රිගේඩියර් ශ්‍රී මුදන්නායක (විශ්‍රාමික) විසින් දේශන පැවැත්වූහ.
