පිටිගල – මාපලගම මාර්ගයේ මත්තක ප්‍රදේශයේ දී ට්‍රක් රථයක් සහ මෝටර් රථයක් මුහුණට මුහුණලා ගැටීමෙන් වූ අනතුරෙන් එකම පවුලේ පිය පුතු දෙදෙනෙක් මියගොස් ඇත.
අනතුරෙන් කාන්තාවන් දෙදෙනකු තුවාල ලබා ඇල්පිටිය මූලික රෝහලට ඇතුළත් කර ඇති බව පොලිසිය පවසයි.
මේ අනතුරෙන් මෝටර් රථය පැදවූ රියැදුරු මියගොස් ඇත. මෝටර් රථයේ ගමන් කර ඇත්තේ එකම පවුලක අය වෙති. අනතුරෙන් මියගොස් ඇත්තේ චින්තක රුවන් බණ්ඩාරිගොඩ නමැති වයස 44 හැවිරිදි දෙදරු පියෙක් හා ඔහුගේ පියා වන ජී.කේ. පුෂ්පකුමාර බණ්ඩාරිගොඩ නමැති වයස අවුරුදු 73ක අයෙකි.
මේ අනතුරෙන් චින්තකගේ බිරිය ශිරෝමි දීපශිකා 39 හා මියගිය පුෂ්පකුමාරගේ සොයුරිය වන විජිතා උප්පලා (64) තුවාල ලබා රෝහල්ගතව ප්‍රතිකාර ලබන බව පොලිසිය කියයි.
මේ අනතුරට මැදිවීමෙන් යතුරුපැදියකින් මාර්ගයේ ගමන් ගත් රජයේ පාසලක විදුහල්පතිවරයකු ද සුළු තුවාල ලබා රෝහල්ගත කර තිබේ. අනතුර සම්බන්ධයෙන් ට්‍රක් රථය සහ රියැදුරු පිටිගල පොලිසිය විසින් අත්අඩංගුවට ගෙන ඇත.
