එකසිය දහනම (119) වැනි අභිමානවත් බන්ධනාගාර දිනය සැමරීමට සමගාමීව, බන්ධනාගාර දෙපාර්තමේන්තුවට විශිෂ්ට සේවාවක් කළ බන්ධනාගාර නිලධාරීන් වෙනුවෙන් සේවා ඇගැයීමේ උත්සවයක් අඟුණකොළපැලැස්ස බන්ධනාගාර ශ්‍රවණාගාරයේදී පසුගිය දා (17) පැවැත්විණි.
අධිකරණ, බන්ධනාගාර කටයුතු, ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යාංශයේ අතිරේක ලේකම් ආර්.එස්. හපුගස්වත්ත මහතාගේ ප්‍රධානත්වයෙන් පැවැත්වුණු මෙම උත්සවයේදී අතිරේක ලේකම්වරයා වෙනුවෙන් අඟුණකොළපැලැස්ස බන්ධනාගාර පරිශ්‍රයේදී බන්ධනාගාර හදිසි ප්‍රතිචාර උපක්‍රමික බළකායේ නිලධාරීන් උත්තමාචාර නිල පෙරෙට්ටුවක් ද පවත්වන ලදි.
බන්ධනාගාර දෙපාර්තමේන්තුවේ රාජකාරියේ යෙදී සිටියදී ජාතික හා ජාත්‍යන්තර මට්ටමින් දක්ෂතා දක්වා රාජ්‍ය සේවයටත්, බන්ධනාගාර දෙපාර්තමේන්තුවටත් ගෞරවාන්විත කීර්තියක් අත්කරදීම වෙනුවෙන් බන්ධනාගාර නිලධාරින්හට බන්ධනාගාර කොමසාරිස් ජනරාල් තුෂාර උපුල්දෙණිය මහතාගේ සුරතින් සහතික පත්‍ර හා සම්මාන ප්‍රදානය සිදු විය. පිලිපීනයේ පැවති ප්‍රවීණයන්ගේ මලල ක්‍රීඩා තරගාවලියේදී රන් පදක්කම් 02ක් සහ ලෝකඩ පදක්කමක් හිමිකරගනිමින් මව්බිම රනින් සරසා බන්ධනාගාර දෙපාර්තමේන්තුවට ගෞරවාන්විත කීර්තියක් ලබා දුන් විශ්‍රාමික බන්ධනාගාර නිලධාරිනී අකිලා තරුනායගී මහත්මිය විශේෂ ඇගැයීමකට ලක්කරමින් සම්මාන ප්‍රදානය කෙරිණි.
බන්ධනාගාර දෙපාර්තමේන්තුව ඉදිරිපත් කළ ලලිත සිර සර I හා II ප්‍රසංග සඳහා ගායනය, වාදනය හා නර්තන කුසලතාවයන්ගෙන් දායක වූ නිලධාරීන්ගේ සේවා ඇගැයීම් සිදු කරමින්, ඔවුන්ට සහතික පත්‍ර ලබාදීම ප්‍රවීණ සංගීතවේදී කීර්ති පැස්කුවෙල් මහතා වෙතින් සිදු කෙරිණි.
බන්ධනාගාර දෙපාර්තමේන්තුවේ ඉදිරි අභිවෘද්ධිය වෙනුවෙන් විශේෂ වූ කාර්යභාරයක් සිදු කළ නිලධාරීන් වෙනුවෙන් අමාත්‍යාංශයේ සම්බන්ධීකරණ ලේකම්තුමා, සම්මාන හා සහතිකපත්ද ප්‍රදානය කරන ලදී. මෙම විශේෂ අවස්ථාවට බන්ධනාගාර දෙපාර්තමේන්තුවේ ජ්‍යෙෂ්ඨ නිලධාරීන් රැසක් සහභාගී විය.
