මදුරාවල නාහල්ල රේවත මහා විද්‍යාලයේ ශිෂ්‍ය නායක නායිකාවෝ පසුගියදා අපූරු සත්කාරක වැඩසටහනක නිරත වූහ. 2024 වර්ෂයේ විද්‍යාලයීය ශිෂ්‍ය නායක පදක්කම් පැලඳීම පසුගියදා සිදුකළ අතර ඔවුන් වෙනුවෙන් විද්‍යාලයේ වෙනම ශිෂ්‍යනායක කටයුතු පවත්වාගෙන යාම සඳහා කාමරයක් නොමැතිවීම බලවත් අඩුපාඩුවක් විය.
මෙහිදී ඔවුන්ගේ නෙත ගැටුණේ විද්‍යාලයේ පසුගිය කාලසීමාව තුළ කැඩී බිඳී භාවිතයට නොගත හැකි ඩෙස් පුටු විශාල ප්‍රමාණයක් එකතු කර තිබූ කාමරයක් වෙතයි.
මෙම කාමරය ශිෂ්‍යනායක මණ්ඩලයට ලබා ගැනීම සඳහා ඔවුන්ගේ සිතට අපූරු යෝජනාවක් පහළ විය.
එනම් මෙම කාමරයේ පවතින කැඩි බිඳී ගිය සියලු ඩෙස් පුටු නැවත පිළිසකර කර පාසලේ පන්ති කාමරවලට එකතු කිරීම තුළින් මෙම කාමරයේ ඉඩකඩ තම ප්‍රයෝජනය සඳහා ලබාගත හැකි බවයි.
ඒ අනුව ඔවුන් මෙම අදහස වත්මන් විදුහල්පති චමිල වික්‍රමරත්න මහතා වෙත දැනුම් දෙන ලදි. 
මේ අපූරු යෝජනා පිළිබඳ වඩාත් සතුටට පත් ඒ මහතා ඒ සඳහා නිල අවසරය ලබා දී ඒ සඳහා අවශ්‍ය සහායද ලබාදෙන බව පවසන ලදි.
ඒ අනුව විද්‍යාලයේ සියලුම ශිෂ්‍යනායක නායිකාවෝ පුරා දින දෙකක්, තුනක් තුළ මෙම කාමරයේ කැඩී බිඳී ගිය සියලුම ඩෙස් පුටු එළියට ගෙන ඒවායේ තිබූ සියලු පිළිසකර කිරීම් සිදුකර භාවිතයට ගත හැකි තත්ත්වයට පත්කරන ලදි.
මෙම කටයුතු සඳහා හැමවිටම විදුහල්පති චමින්ද වික්‍රමරත්න මහතාගේ, නියෝජ්‍ය විදුහල්පති ඔක්කම්පිටියේ විජිත හිමියන්ගේ සහ යූ.ඩී.අයි. ශර්මිලා මහත්මියගේ මඟපෙන්වීම ලැබූ අතර විද්‍යාලයේ ආචාර්ය කුසල් අකලංක, ඊ.වී.ඩී.එන්. ධනුෂ්ක සහ එන්.ඒ. කුමාරි මහත්මිය ශිෂ්‍ය නායක නායිකාවන් සමඟ එක්ව කටයුතු කරමින් මෙම කටයුතු සිදු කළහ.
වැඩසටහන නිමාවට පත්වූයේ වසර කිහිපයක සිට එක තැන ගොඩගසා තිබූ කැඩී බිඳී ගිය ඩෙස්පුටු අසූවක් භාවිතයට ගත හැකි ඩෙස් පුටු බවට පරිවර්තනය කළ ඒවා පන්ති කාමර සඳහා එක් කිරීම තුළිනි.
මේ පිළිබඳ අදහස් දැක්වූ නාහල්ල රේවත විද්‍යාලයේ විදුහල්පති චමිල වික්‍රමරත්න මහතා පැවසුයේ,
Òමෙම කටයුත්ත සිදුකළ තම ශිෂ්‍යනායක මණ්ඩලය පිළිබඳ වඩාත් ආඩම්බරයක් සහ සෙනෙහසක් දැනෙන බවයි. සැබැවින්ම මෙම කටයුත්තේ මූල්‍යමය වටිනාකම රුපියල් ලක්ෂ ගණනක් වන අතර එය පාසලට විශේෂ ඉතිරි කිරීමක් බවයි.
සිසුන් හත්සීයකට ආසන්න ප්‍රමාණයක් සිටින මේ පුංචි පාසලට ඔවුන් ලබා දුන්නේ සැබැවින්ම කදිම ආදර්ශයක් බවත් වැඩිදුරටත් පැවසීය.
