උතුරු පළාතේ දිස්ත්‍රික්ක තුනක නිවාස හයකින් රුපියල් ලක්ෂ 60ක් පමණ වටිනා මුදල්, රන් භාණ්ඩ හා විවිධ දේපොළ කොල්ලකන ලද සංවිධානාත්මක මංකොල්ල කල්ලියක සාමාජිකයින් තුන් දෙනෙකු වවුනියාව පොලිසිය විසින් පෙරේදා (11) අත්අඩංගුවට ගෙන තිබේ.
අත්අඩංගුවට පත්ව ඇත්තේ වවුනියාවේ තරුණයින් දෙදෙනෙකු හා යාපනයේ තරුණයෙකු වන අතර ඔවුන්ගෙන් පොලිසිය කළ ප්‍රශ්න කිරීම්වලදී හෙළි වී අැත්තේ ඔවුන්ගේ කණ්ඩායමේ තවත් සාමාජිකයින් පිරිසක් මන්නාරමේ හා මුලතිව් ප්‍රදේශයේ සිටින බවයි. වවුනියාවේ කුරුමන්කාඩු ප්‍රදේශයේ නිවාස දෙකක්ද යාපනයේ නිවාස තුනක්ද මන්නාරමේ නිවාසයක්ද මෙම මංකොල්ලකරුවන් විසින් කොල්ලකා තිබේ. වැඩිම රන් භාණ්ඩ තොගයක් කොල්ල කා ඇත්තේ වවුනියාවේ නිවාස දෙකෙන් බව පොලිස් පරීක්ෂණවලදී අනාවරණය වී තිබේ.
එම නිවාස දෙකෙන් පමණක් රුපියල් ලක්ෂ විසි පහක පමණ ස්වර්ණාභරණද මුදලින් රුපියල් ලක්ෂ තුනක් ද ඔවුන් විසින් කොල්ලකා ඇත. මන්නාරමේ නිවසක් කොල්ලකෑ අවස්ථාවේදී එම නිවැසියන්ගෙන් සොරාගත් සවර්ණාභරණවලට අමතරව නිවසේ නිදා සිටි කුඩා දරුවකුගේ ගෙලෙහි තිබූ රන් මාලයක් ද ඔවුන් විසින් කපාගෙන ගොස් තිබේ. එම මාලයේ වටිනාකම රුපියල් ලක්ෂ දෙකකි.
සංවිධානාත්මක මංකොල්ලකරුවන් විසින් කොල්ලකන ලද රන් භාණ්ඩවලින් කොටසක් වවුනියාවේ හා මන්නාරමේ වෙළෙඳසල් තුනක උකසට තබා තිබියදී පොලිසිය විසින් සොයා ගෙන තිබේ.
