තොරතුරු තාක්ෂණ ක්ෂේත්‍රයේ ශීඝ්‍ර දියුණුවක් ළඟාකර ගැනීම අපේක්ෂා කරමින් පිහිටුවීමට සැලසුම් කර ඇති තොරතුරු තාක්ෂණ උද්‍යාන පිළිබඳව පුළුල් ලෙස සාකච්ඡා කළ විශේෂ හමුවක් පෙරේදා (11) තාක්ෂණ අමාත්‍යාංශයේදී පැවැත්විණි.
එහිදී තොරතුරු තාක්ෂණ උද්‍යාන සංකල්පය පිළිබඳව මෙන්ම එවැනි උද්‍යාන පිහිටුවීමට බලාපොරොත්තු වන ප්‍රදේශ, ඒ සඳහා සම්බන්ධ වන ආයෝජකයන්ට දෙන පහසුකම් ආදී කරුණු පිළිබඳව ද පුළුල් ලෙස අවධානය යොමු කෙරිණි. මේ තොරතුරු තාක්ෂණ උද්‍යාන පිහිටුවීමත් සමඟ මෙරට තාක්ෂණ ක්ෂේත්‍රයේ විශාල පරිවර්තනයක් සිදුවනු ඇතැයි මේ අවස්ථාවට සහභාගි වූ තාක්ෂණ රාජ්‍ය ඇමැති කනක හේරත් මහතා ප්‍රකාශ කළේය.
ආයෝජන ප්‍රවර්ධන රාජ්‍ය ඇමැති දිලුම් අමුණුගම මහතා ද මේ සාකච්ඡාවට සහභාගි වූ අතර, එහිදී ඔහු මේ උද්‍යාන පිහිටුවීමට සම්බන්ධ ආයෝජකයන්ට සහන දෙන ආකාරය පිළිබඳවත්, මේ වැඩසටහනට ආයෝජකයන් ආකර්ෂණය කර ගන්නා ආකාරය පිළිබඳවත් කරුණු දක්වන ලදි.
තාක්ෂණ අමාත්‍යාංශයේ සහ ආයෝජන ප්‍රවර්ධන අමාත්‍යාංශයේ උසස් නිලධාරීන් ඇතුළු SLASSCOM හි නියෝජිතයෝ මේ අවස්ථාවට සහභාගිවී සිටියහ.
