ජනතාවට අධික බදු බර පටවන බව කියන නව මුදල් පනතක් පාර්ලිමේන්තුවේදී සම්මත කර ගැනීම හේතුවෙන් රට පුරා පැතිරී ගිය විරෝධතා සහ ප්‍රචණ්ඩ ක්‍රියා අවසන් වීමෙන් පසු කෙන්යාවේ ජනාධිපති විලියම් රූටෝ සිය කැබිනට් මණ්ඩලයේ සියලු ඇමැතිවරු වහාම ක්‍රියාත්මක වන පරිදි ඉවත් කර ඇතැයි විදෙස් මාධ්‍ය වාර්තා කළේය. අමාත්‍යවරු පමණක් නොව එරට නීතිපතිවරයා ද තනතුරෙන් පහ කිරීමට ජනාධිපතිවරයා කටයුතු කර ඇතැයි විදෙස් මාධ්‍ය වැඩිදුරටත් වාර්තා කළේය. කෙන්යානු ජනතාවගේ අදහස්වලට ගරු කරමින් සහ සිය කැබිනට් මණ්ඩලයේ ඇමැතිවරු පිළිබඳ නිසි තක්සේරුවක් සිදු කිරීමෙන් පසු එම තීරණය ගත් බව ජනාධිපති රූටෝ ප්‍රකාශ කර ඇතැයි ද වාර්තා වේ.
ජනාධිපතිවරයා පුළුල් පදනමක් සහිත නව රජයක් පිහිටුවීමට සාකච්ඡා පවත්වමින් සිටින බවත්, නව රජයක් සම්බන්ධව විවිධ අංශ සහ දේශපාලන පක්ෂ සමඟ සාකච්ඡා පවත්වා උපදෙස් ලබාගැනීමට ඉදිරියේදී පියවර ගන්නා බවත් ජනාධිපති විලියම් රූටෝ ප්‍රකාශ කර තිබේ.
බලයට පත්ව වසර දෙකක් ගත වීමටත් පෙර ජනාධිපතිවරයා ගත් මේ තීරණය කෙන්යාවේ අනාගතයට දැඩි ලෙස බලපානු ඇතැයි එරට දේශපාලන විශ්ලේෂකයන් අදහස් පළ කර ඇති අතර, කැබිනට් මණ්ඩලයකින් තොරව රජය පවත්වාගෙන යෑමට නොහැකි බැවින් ජනාධිපතිවරයා කඩිනමින් ඉදිරි පියවර ගනු ඇතැයි ද වාර්තා වේ. නෙරපා හරිනු ලැබූ බොහෝ අමාත්‍යවරු එරට ආන්දෝලනයට තුඩු දුන් විවිධ දූෂණ වංචාවලට සම්බන්ධ වූවන් බව ද විදෙස් මාධ්‍ය වැඩිදුරටත් වාර්තා කළේය.
