පාකිස්තානයේ හිටපු අගමැති ඉම්රාන් ඛාන්ගේ ටෙහ්රීකි ඉන්සාෆ් පක්ෂයේ හිටපු පාර්ලිමේන්තු මන්ත්‍රීවරයකු වන හිදායතුල්ලා ඛාන් ඇතුළු පුද්ගලයන් පස්දෙනකු උතුරු පාකිස්තානයේදී ඝාතනයට ලක්වී ඇතැයි විදෙස් මාධ්‍ය වාර්තා කළේය. පසුගියදා කයිබර් පක්ටුන්ක්වා ප්‍රාන්තයේ බජූර් දිස්ත්‍රික්කයේදී හිටපු මන්ත්‍රීවරයා ගමන් ගත් මෝටර් රථයට බෝම්බ ප්‍රහාරයක් එල්ල කර පුපුරුවා හැර ඇති බවත්, ඒ මොහොතේ ඔහු සමඟ පවුලේ සාමාජිකයන් දෙදෙනකු හා ආරක්ෂක නිලධාරීන් දෙදෙනකු සිටි බවත් පොලිසිය ප්‍රකාශ කර ඇතැයි වාර්තා වේ.
හිටපු මන්ත්‍රීවරයා එම ප්‍රාන්තයේ සංචාරය කර ඇත්තේ ඉදිරියේදී පැවැත්වීමට නියමිත අතුරු මැතිවරණයක ප්‍රචාරක කටයුතු සඳහා වන අතර, ඔහු ගමන් ගත් මාර්ගයේ සවි කර තිබූ බෝම්බයක් දුරස්ථ පාලකයකින් පුපුරුවා හැරීමෙන් එම ඝාතනය සිදුවී ඇතැයි විදෙස් මාධ්‍ය වැඩිදුරටත් වාර්තා කළේය. එම ප්‍රහාරයේ වගකීම මෙතෙක් කිසිදු පාර්ශ්වයකින් භාර ගෙන නැති අතර, කයිබර් පක්ටුන්ක්වා පොලිසිය පරීක්ෂණ කටයුතු ආරම්භ කර ඇතැයි වාර්තා වේ.
