ත්‍රස්තවාදී චෝදනාවලට වරදකරුවන් වූ පුද්ගලයන් 43 දෙනකුට ජීවිතාන්තය දක්වා සිරදඬුවම් නියම කිරීමට එක්සත් අරාබි එමීර් රාජ්‍යයේ අධිකරණයකින් පියවර ගෙන ඇතැයි විදෙස් මාධ්‍ය වාර්තා කළේය. එරට රජයේ මාධ්‍ය සඳහන් කරන්නේ එම පුද්ගලයන් ත්‍රස්තවාදී සංවිධානයක් බිහි කිරීමට උත්සාහ කිරීමේ චෝදනාවට අබුඩාබි නුවර ෆෙඩරල් අභියාචනාධිකරණය මඟින් වරදකරුවන් කර ඇති බවය. විශාල පිරිසකට එකවර ජීවිතාන්තය දක්වා සිරදඬුවම් නියම කිරීමේ අධිකරණ තීන්දුව එක්සත් ජාතීන්ගේ සංවිධානයේ විශේෂඥවරුන්ගේ සහ මානව හිමිකම් සංවිධානවල දැඩි විවේචනයට ලක්වී ඇතැයි ද වාර්තා වේ.
පුද්ගලයන් 43 දෙනකුට ජීවිතාන්තය දක්වා සිරදඬුවම් නියම කිරීමට අමතරව තවත් පුද්ගලයන් 10 දෙනකුට මුදල් විශුද්ධිකරණය යටතේ වසර 10 සිට වසර 15 දක්වා විවිධ කාලසීමා සඳහා සිරදඬුවම් තීන්දු කර ඇතැයි විදෙස් මාධ්‍ය සඳහන් කළේය.
