චීනයට අයත් හමුදා ගුවන්යානා 36ක් සහ නාවික යාත්‍රා 6ක් තායිවාන මුහුදේ පැය 24ක කාලයක් සැරි සරා ඇතැයි තායිවාන ජාතික ආරක්ෂක අමාත්‍යාංශය නිවේදනය කළ බව විදෙස් මාධ්‍ය වාර්තා කළේය.
චීන මහජන විමුක්ති හමුදාවට අයත් බව කියන එම ගුවන්යානා 35ක්ම උතුරෙන් සහ දකුණෙන් තායිවාන සමුද්‍ර සන්ධියේ මධ්‍ය රේඛාව පසු කරමින් ගුවන් ආරක්ෂණ හඳුනා ගැනීමේ කලාපයට සේන්දු වූ බවත් තායිවාන ජාතික ආරක්ෂක අමාත්‍යාංශය වැඩිදුරටත් ප්‍රකාශ කර ඇතැයි විදෙස් මාධ්‍ය සඳහන් කළේය. ඒ අනුව ජූලි මාසයේ මේ දක්වා ගත වූ දින කිහිපය ඇතුළත චීන හමුදාවට අයත් බව කියන ගුවන් යානා 101 වතාවක් සහ නාවික යාත්‍ර26 වතාවක් තායිවාන මුහුදු සීමාවේදී නිරීක්ෂණයට ලක්වූ බව තායිවාන ජාතික ආරක්ෂක අමාත්‍යාංශය සඳහන් කර ඇතැයි ද වාර්තා වේ.
ඊට ප්‍රතිචාර දක්වමින් තායිවානය ගුවන් යානා සහ නාවික යාත්‍රා යෙදූ බවත්, චීන හමුදා ගුවන් යානා සහ නාවික යාත්‍රා නිරීක්ෂණ කිරීමට මුහුදුබඩ කලාපය ආශ්‍රිතව මිසයිල පද්ධතිය ක්‍රියාත්මක කළ බවත් විදෙස් මාධ්‍ය වාර්තා කළේය.
