නායක දිනුර කළුපහන වාර්තා කළ සටන්කාමී ශතකය හේතුවෙන් සංචාරක එංගලන්ත යොවුන් ක්‍රිකට් කණ්ඩායම සමඟ වෝර්ල්ම්ස්ලිහිදී පැවැත්වෙන පළමු නිල නොවන සිව්දින ටෙස්ට් තරගයේදී පළමු ඉනිම වෙනුවෙන් ලකුණු 324ක් රැස් කිරීමට සංචාරක ශ්‍රී ලංකා යොවුන් කණ්ඩායම සමත් විය.
පිළිතුරු ඉනිම ක්‍රීඩා කරන එංගලන්තය යොවුන් පිල ඊයේ සවස තේ පානය සඳහා තරගය නතර කරන විට කඩුල්ලක් දැවී ලකුණු 29ක් රැස් කර තිබිණි.
වර්ෂාවේ බාධා මැද පැවති තරගය තෙවැනි දිනයට ක්‍රියාත්මක වූ ඊයේ පිටියට පිවිසි දිනුර සහ දිනිරු අබේවික්‍රමසිංහ සිය සබඳතාවට තවත් ලකුණු 25ක් එක් කළ අතර, දිනයේ පළමු කඩුල්ල ලෙස දිනිරු ලකුණු 43කට දැවී ගියේය. තවත් ලකුණු 27ක් එක් වෙද්දී මුළු ලකුණු 229දී දිනුර කඩුල්ල මුවා කිරීමේ වරදට හසු විය. ඒ වන විට ඔහු පන්දු 144කට මුහුණ දෙමින් හතරේ පහර 13ක් සහ හයේ පහරක් සමඟ ලකුණු 104ක් රැස් කළේය. අනතුරුව පිටියට පිවිසි නාදන් කල්දෙරා පසු පෙළ පිතිකරුවන් සමඟ එක්ව ඉනිම ලකුණු 324ක් දක්වා ඉදිරියට ගෙන ගිය අතර, ඔහු අවසන් කඩුල්ල ලෙස දැවී ගියේ ලකුණු 55ක් රැස් කර සිටියදීය. හතරේ පහර 5ක් එල්ල කළ ඔහු පන්දු 114කට මුහුණදී තිබිණි. පන්දු යැවීමේදී ඒ.එම්. ෆ්‍රෙන්ච් කඩුලු 4ක් දවා ගත්තේය.
අද තරගයේ අවසන් දිනයයි.
