එංගලන්තයේ වික්ටෝරියා රැජින ශ්‍රී ලංකාවේ සිදු කළ සංචාරය සනිටුහන් කිරීම සඳහා මාතලේ නගර මධ්‍යයේ ඉදිකර තිබූ පෞරාණික වටිනාකමකින් යුත් විදුලි පහන් කණුවක් සහිත වටරවුම තුළ පෞරාණික වටිනාකමට හානි වන අයුරින් වෙනත් ඉදිකිරීමක් සිදු කිරීමටත් පියවර ගෙන තිබේ.
මාතලේ නගරයේ අධ්‍යාපන වටරවුම තුළ (1837-1897) වසර තුළදී වික්ටෝරියා රැජිනගේ පාලන සමය සනිටුහන් කිරීම සඳහා ඉදිකර තිබූ මෙම පුරාවිද්‍යාත්මක වටිනාකමකින් යුත් පෞරාණික විදුලි පහන් කණුව වසර 165කට ආසන්න කාලයක් මෙම ස්ථානය තුළ පැවතියේය.
එය නගරයේ පෞරාණික බව හා අලංකාරය වෙනුවෙන් පැවති මාතලේ සංකේතයක් වන අතර පහන් කුලුන එම ස්ථානයෙන් ඉවත් කර පෞද්ගලික දුරකතන සමාගමක කුලුනක් හා ප්‍රචාරක පුවරු ඉදිකිරීම සිදුකරගෙන යනු ලබයි.
ශ්‍රී ලංකාවේ හොකී ක්‍රීඩාවේ නිජබිම ලෙස සැලකෙන මාතලේ නගරයේ මෙම ස්ථානයේ හොකී ස්මාරකයක් ඉදිකිරීමට හිටපු හමුදාපති හා ආරක්ෂක මාණ්ඩලික ප්‍රධානී ශවේන්ද්‍ර සිල්වා මහතාගේ ප්‍රධානත්වයෙන් සිදු කිරීමට සැලසුම් කළ ද එම ස්ථානය පුරාවිද්‍යාත්මක අගයක් ඇති ස්ථානයක් බැවින් එම ඉදිකිරීම සිදු කිරීමට අවසර ලබා දී නොමැත.
එම ස්ථානයේ සිදුකරනු ලබන ඉදිකිරීමට විරුද්ධව හිටපු නාගරික මන්ත්‍රීවරයකු වන රොෂාන් ද සිල්වා මහතා විසින් මාතලේ පොලිසිය වෙත පැමිණිල්ලක්ද කර තිබේ.
