සැකකරු මුදා හරී
පැමිණිලිකරුට වැඩ වරදී
රුපියල් කෝටි හතහමාරක ලොතරැයි දිනුමක් ඇදුණැයි පැවැසෙන අකුරණ ප්‍රදේශයේ පුද්ගලයකු පැහැරගෙන දින දහයක් පුරා පහර දෙමින් ගම්පොළ රත්මල්කඩුව ප්‍රදේශයේ නිවෙසක සිරකර තබාගත් සිද්ධිය පැමිණිලිකරු ගොතන ලද ව්‍යාජ පැමිණිල්ලක් බව ඒ සම්බන්ධයෙන් පැවැති නඩු විභාගයේදී අනාවරණය වීමත් සමඟ ඊට අදාළ ප්‍රධාන සැකකරු වන ගාමිණී කල්‍යාණරත්න ඇතුළු සිව්දෙනා නිදහස් කර පැමිණිලිකරුට චෝදනා ගොනු කරන ලෙස ගම්පොළ මහේස්ත්‍රාත් කාංචනා කොඩිතුවක්කු මහත්මිය පොලිසියට නියෝග කළාය.
ලොතරැයි ජයග්‍රාහයකයා වූ අකුරණ මල්වාහින්න පදිංචි මොහොමඩ් මොහිදීන් මොහොමඩ් ඉර්ෂාඩ් යන අය මෙම පැමිණිල්ල සිදු කර තිබුණි. ඒ අනුව ගම්පොළ පොලිසියේ උසස් පොලිස් නිලධාරීන් ඇතුළු කණ්ඩායමක් මෙම පුද්ගලයා ගම්පොළ රත්මල්කඩුව ප්‍රදේශයේ නිවෙසක සිටියදී සොයාගෙන තිබූ අතර ඒ සමඟ පුද්ගලයන් සිව් දෙනකුද අත්අඩංගුවට ගෙන තිබුණි.
මෙම සැකකරුවන් මෙසේ ලොතරැයි දිනුම් හිමියකු පැහැරගෙන ගම්පොළ නිවෙසක රඳවා තබා ගැනීම ලංකාව පුරා එවකට මහත් ආන්දෝලනයකට හේතු වූ අතර සැකකරුවන් අධිකරණයට ඉදිරිපත් කළ පසු ඔවුන් රක්ෂිත බන්ධනාගාරගත කෙරිණ.
නමුත් මේ සම්බන්ධයෙන් පැවති නඩු විභාගයේදී හෙළි වී ඇත්තේ මෙම පැමිණිලිකාර ඉර්ෂාඩ් හා ප්‍රධාන චුදිත ගාමිණි යන අය අතර කලක පටන් ගනුදෙනු සිදුවී ඇති බවයි. ලොතරැයි දිනුම ඇදුණු පසු එම මුදල් ගැනීමට පෙර රුපියල් කෝටියක් පමණ වියදම් කිරීමට අවශ්‍ය බව පවසා ගාමිණී යන අයගෙන් එම මුදල් ඉල්ලීම සමඟ ඔහු රත්මල්කඩුවේ පිහිටි ඔහුගේ නිවෙස, ඉඩම හා ලී මෝලක ඔප්පු උකස් තබා මෙම මුදල රැගෙන ඔහුට ලබා දී ඇති බවද මෙහිදී අනාවරණය වී ඇත.
පසුව මෙම මුදල ආපසු ගාමිණී යන අයට නොදී මෙවැනි චෝදනාවක් නඟා එම මුදල් ගනුදෙනුවෙන් මඟහැරීමට මෙම කූට උපක්‍රමය මොහු යොදාගෙන ඇතැයි හෙළි වී තිබුණි. මෙම පුද්ගලයා දඹුල්ලේ සිට මෝටර් රථයකින් පැහැරගෙන පැමිණි බව පවසා තිබුණත් පොලිස් පරීක්ෂණවලින් අනාවරණය වී ඇත්තේ මොහු එදින මෝටර් රථයක් ගෙන්වාගෙන අලවතුගොඩ සිට එම මෝටර් රථයට නැඟ පිරිස සමඟ ගම්පොළට පැමිණ ඇති බවයි.
ඒ පිළිබඳව පරීක්ෂණ සිදු කළ කොට්ඨාස අපරාධ විමර්ශන අංශ ස්ථානාධිපති ප්‍රධාන පොලිස් පරීක්ෂක කුමුදු කුමාර මහතා මේ බව අධිකරණය වෙත දන්වනු ලැබීය.
එසේම මෙම පැමිණිලිකරු විත්තිකාර ගාමිණී යන අයගෙන් ලබාගත් මුදල වූ රුපියල් කෝටිය සම්බන්ධයෙන් තවත් නඩුවක් ද පවතින අතර එහිදී මොහු රුපියල් ලක්ෂ දහයක මුදලක් ගාමිණී යන අයට ගෙවා ජූලි 25 වැනි දින තවත් රුපියල් ලක්ෂ අසූවක් ගෙවන බවටද උසාවිය හමුවේ පොරොන්දු දී ඇත.
පැහැරගැනීම සම්බන්ධයෙන් මහේස්ත්‍රාත්වරිය මෙහිදී ඉතිරි සැකකරුවන් වූ මදුසංක කළුපහනආරච්චි, අනුර ආරියදාස, බුද්ධික පුෂ්ප කුමාර යන අයද නිදහස් කරනු ලැබීය. මෙහිදී ඉර්ෂාඩ් වෙනුවෙන් ආනන්ද ඇතුගල හා නන්දනී කාන්තිලතා යන නීතිඥවරු හා ගාමිණී කල්‍යාණනන්ද වෙනුවෙන් නීතිඥ
දේවප්‍රිය රණතුංග මහතා ද පෙනී සිටියේය.
