මහාධිකරණයට සහ විනිසුරුවරුන්ට සමාජ මාධ්‍ය ඔස්සේ වීඩියෝවක් මුදා හරිමින් අපහාස කිරීමේ නඩුවට කොළඹ අංක 3 අධිකරණයේ ඇති නඩු භාණ්ඩ 5ක් අදාළ කර ගැනීමට අපරාධ පරීක්ෂණ දෙපාර්තමේන්තුව කොටුව මහේස්ත්‍රාත් කෝසල සේනාධීර මහතාගෙන් කළ ඉල්ලීමට ඊයේ (10) අවසර ලැබිණි.
එම අධිකරණයේ මහේස්ත්‍රාත්වරයාගේ අනුමැතිය ඇතිව එම භාණ්ඩ නිකුත් කරන ලෙස මහේස්ත්‍රාත්වරයා අංක3 අධිකරණ රෙජිස්ට්‍රාර්වරයාට නියම කළේය.
මහේස්ත්‍රාත්වරයා මෙම නියෝගය සිදු කරනු ලැබුවේ අපරාධ පරීක්ෂණ දෙපාර්තමේන්තුවේ පරිගණක අපරාධ කොට්ඨාසය මෝසමක් ගොනු කරමින් අධිකරණයෙන් කළ ඉල්ලීමක් සලකා බැලීමෙන් අනතුරුවය.
මහනුවර කුණ්ඩසාලේ පදිංචි සැකකරු ආනන්ද ලාල් ධර්මපාල නමැත්තා අජිත් ධර්මපාල ලෙස විදේශගතව සිටින අතර ඔහුද මේ නඩුවේ සැකකරුවකු ලෙස නම් කර ඇති අතර අනූපම එරංජිත් යන අයකු ඇප මත මුදා හැර ඇත.
අධිකරණ භාරයේ තිබූ හෙරොයින් තොගයක් අස්ථානගත වීම සම්බන්ධයෙන් මහාධිකරණ විනිසුරු දමිත් තොටවත්ත මහතා කෙසෙල්වත්ත පොලිසියට සිදු කළ පැමිණිල්ලක් ප්‍රකාරව විමර්ශනයක් සිදු කරන බව ද දන්වා සිටි පොලිසිය මහාධිකරණ විනිසුරුවරයා විසින් පොලිස්පතිවරයාට ලිඛිතව සිදු කළ පැමිණිල්ලක් ප්‍රකාරවද පරිගණක අපරාධ අංශය විසින් විමර්ශනයක් සිදු කරන බව ද අධිකරණයට දන්වා සිටියේය.
එම වීඩියෝව අනූපම එරංජිත් යන අය විසින් මෙරට Lanka Truth වෙබ් අඩවියේ සහ Cyber News.lk මෙන්ම SL දේශය වෙබ් අඩවියේද විකාශය කර ඇති බව විමර්ශන අනාවරණය කර ඇති බව අධිකරණයට දන්වා සිටි පොලිසිය ඒ සම්බන්ධයෙන් ෆේස්බුක් සමාගමේ Meta Flatfoam මඟින් තොරතුරු ලබා ගෙන වැඩිදුර විමර්ශන සිදු කරයි.
සිද්ධිය සම්බන්ධයෙන් නඩුව ලබන සැප්තැම්බර් මස 11 වැනි දින නැවත කැඳවයි.
