මේ වසරේ හජ් වන්දනය සඳහා සවුදි අරාබියේ මක්කම බලා ගිය චීන ඉස්ලාම් බැතිමතුන්ගේ සංඛ්‍යාව දහස ඉක්මවා ඇතැයි විදෙස් මාධ්‍ය වාර්තා කළේය. පසුගිය ජූනි මස මුල් භාගයේදී වාර්තා වූ ආකාරයට චීනයේ ගැන්සු ප්‍රාන්තයෙන් ඉස්ලාම් බැතිමතුන් 769ක් ද, යූනාන් ප්‍රාන්තයෙන් බැතිමතුන් 284 ක්ද මක්කම බලා යෑමට චීන රජයේ ලියාපදිංචි වූ බව විදෙස් මාධ්‍ය වැඩිදුරටත් වාර්තා කළේය. කෙසේ වුවද මතභේදයට ලක්වී ඇති ෂිංජියැන් ප්‍රාන්තයේ උයිගර් මුස්ලිම් බැතිමතුන් එම ලැයිස්තුවට ඇතුළත් නොවූ බව චීනයේ ඉස්ලාමීය සංගමය ප්‍රකාශ කර ඇතැයි ද වාර්තා වේ. පසුගිය වසරේදීද චීනයේ නිංෂීයා ප්‍රාන්තයේ ඉස්ලාම් බැතිමතුන් 386 දෙනකුට හජ් වන්දනය සඳහා රජයෙන් අවස්ථාව ලබා දී තිබූ බවත්, එවර ද උයිගර් මුස්ලිම් ජාතිකයන්ට ඒ සඳහා අවස්ථාව නොලැබුණු බවත් චීන ඉස්ලාම් සංගමය වැඩිදුරටත් සඳහන් කර ඇතැයි වාර්තා වේ.
පසුගිය ජූනි මස 14 වැනිදා සිට 19 දින දක්වා මක්කම නුවර පැවැති හජ් වන්දනයට මිලියන 1.8ක බැතිමතුන් පිරිසක් එක්වී ඇති අතර, ඉන් මිලියන 1.6ක්ම විදේශිකයන් බව සවුදි අරාබි රජයේ නිලධාරීන් ප්‍රකාශ කර තිබිණි.
