වැඩට නාව SMලාට සේවය අතහැර ගියා සේ සලකා ලිපි යවනවා
අවසාන නිවේදනය නිකුත් කරමින් දුම්රිය සාමාන්‍යාධිකාරි කියයි
රටේ ආණ්ඩුක්‍රම ව්‍යවස්ථාව අනුව ජනාධිපතිවරයාට පැවැරෙන බලතල යටතේ පොදුජන යහපත වෙනුවෙන් ප්‍රවාහන සේවා, අත්‍යවශ්‍ය සේවාවක් බවට පත්කර තිබියදී නීතියට අභියෝග කරමින් වැඩ වර්ජනය කළ දුම්රිය ස්ථානාධිපතිවරු සේවයට වාර්තා නොකළහොත් ඔවුන් සේවය අතහැර ගියා සේ සලකමින් ලිපි යවන බව දුම්රිය සාමාන්‍යාධිකාරී එස්.එස්. මුදලිගේ මහතා සඳහන් කරයි.
එබැවින් තමන් සේවය කරන දුම්රිය ස්ථානයට හෝ ආසන්නතම දුම්රිය ස්ථානයට සියලු දුම්රිය ස්ථානාධිපතිවරුන් සහ දුම්රිය පාලකවරුන් වහාම වාර්තා කළ යුතු බව දුම්රිය සාමාන්‍යාධිකාරී එස්.එස්. මුදලිගේ මහතා දන්වා සිටී.
එම නියෝගය පිළිපදින්නේ නැති සියලු දුම්රිය ස්ථානාධිපතිවරුන් සහ දුම්රිය පාලකවරුන් සේවය හැර ගියා සේ සලකන බව ද සියලු දුම්රිය ස්ථානාධිපතිවරුන් සහ දුම්රිය පාලකවරුන් වෙත අවසාන නිවේදනයක් නිකුත් කරමින් මුදලිගේ මහතා දැනුම් දෙයි. ශ්‍රී ලංකා දුම්රිය සේවයේ වර්ජනයේ නිරත සියලු දුම්රිය ස්ථානාධිපතිවරුන්ට සහ දුම්රිය පාලකවරුන්ට අවසන් නිවේදනය නිකුත් කිරීමට දුම්රිය සාමාන්‍යාධිකාරිවරයා මේ අනුව කටයුතු කර ඇති අතර ඊයේ (10) දහවල් 12ට අදාළ දුම්රිය ස්ථානයට හෝ ආසන්නතම දුම්රිය ස්ථානයට දුම්රිය ස්ථානාධිපතිවරු සහ දුම්රිය පාලකවරුන් සේවයට වාර්තා කළ යුතු බව එම නිවේදනයේ දැක්වෙයි.
එසේ නොකරන වර්ජනයේ නිරත දුම්රිය ස්ථානාධිපතිවරු සහ දුම්රිය පාලකවරුන් සේවය හැර ගියා සේ සලකන බව වැඩබලන දුම්රිය සාමාන්‍යාධිකාරි එස්.එස්. මුදලිගේ මහතා සඳහන් කරයි.
ශ්‍රී ලංකා දුම්රිය සේවය අත්‍යවශ්‍ය සේවාවක් කර තිබියදී මෙම වර්ජනය ක්‍රියාත්මක කර ඇති බව ද ඔහු එම නිවේදනය නිකුත් කරමින් පෙන්වා දී තිබේ.
උසස්වීම් ලබා නොදීම ඇතුළු ඉල්ලීම් කිහිපයක් මුල් කර ගනිමින් පෙරේදා (09) මධ්‍යම රාත්‍රියේ සිට දුම්රිය ස්ථානාධිපතිවරුන් ආරම්භ කළ වැඩවර්ජනය හේතුවෙන් කාර්යාල දුම්රිය රැසක් අවලංගු වූ අතර කොටුවේ සිට මීගමුවට සහ වේයන්ගොඩට දුම්රිය දෙක බැගින් ධාවනය කිරීමට පියවර ගෙන ඇති අතර පොල්ගහවෙල සිට කොටුවට දුම්රිය දෙකක් ද ගාල්ල සිට කොටුවට දුම්රිය තුනක් ද අලුත්ගම සිට එක් දුම්රියක් ද කොළඹ කොටුව දක්වා ධාවනය කිරීමට පියවර ගෙන ඇති බව එම දෙපාර්තමේන්තුව සඳහන් කරයි.
වර්ජන ක්‍රියාමාර්ගය හේතුවෙන් ඊයේ (10) දිනයේදී දුම්රිය වාර ප්‍රවේශපත්‍ර හිමි මගීන්ට එම වාර ප්‍රවේශපත්‍රය උපයෝගි කර ගනිමින් ලංකා ගමනාගමන මණ්ඩලයට අයත් බස් රථවලින් ප්‍රවාහන පහසුකම් සලසා ගැනීමට හැකි බව ප්‍රවාහන අමාත්‍යාංශය දැනුම් දී තිබිණි.
මෙම වෘත්තීය ක්‍රියාමාර්ගය හේතුවෙන් ජනතාව දැඩි අසීරුතාවට පත්ව සිටී.
