උත්සවයට එක්වූවන්ගෙන් කොටසක්
ණය ප්‍රතිව්‍යූහගතකරණයට අදාළව ද්විපාර්ශ්වික ණය හිමියන් වෙතින් ඩොලර් බිලියන 5ක ණය පොලී සහනයක් සහ වාණිජ ණය හිමියන් එකඟ වී ඇති ආකාරයට ඩොලර් බිලියන 3ක ණය කපාහැරීමක් සිදුවන බවත් ඒ අනුව ගෙවීමට තිබූ ණය ප්‍රමාණයෙන් ඩොලර් බිලියන 8ක සහනයක් රටේ ජනතාවට ලබාදීමට හැකි වී තිබෙන බවත් ජනාධිපති රනිල් වික්‍රමසිංහ මහතා පැවසීය.
ජනාධිපතිවරයා මේ බව සඳහන් කළේ සින්නක්කර ඉඩම් ඔප්පු ලක්ෂ 20ක් ලබාදීමේ ‘උරුමය’ ජාතික වැඩසටහන යටතේ කුරුණෑගල දිස්ත්‍රික්කයේ සුදුසුකම්ලාභීන් 73,143ක් අතරින් පුද්ගලයන් 463ක් වෙනුවෙන් සංකේතාත්මකව ඔප්පු ප්‍රදානය කිරීම ඊයේ (05) පෙරවරුවේ කුරුණෑගල වයඹ පළාත් ශ්‍රවණාගාරයේ පැවති උත්සවයේදීය.
ජනාධිපතිවරයා එහිදී වැඩිදුරටත් සඳහන් කළේ ඇතැමුන් සමාජවාදය ගැන කතා කළ ද, නියම සමාජවාදය ජනතාවට සින්නක්කර ඉඩම් අයිතිය ලබාදීම බවයි.
රට බංකොලොත්භාවයෙන් මුදාගත් ආණ්ඩුව දැන් ජනතාවගේ ප්‍රශ්නවලට විසඳුම් දෙමින් සිටින බව පැවසූ ජනාධිපතිවරයා ‘උරුමය’ සින්නක්කර ඉඩම් ඔප්පු ලබාදීමේ වැඩසටහන මඟින් තවත් ලක්ෂ 20ක ජනතාවකට ඉඩම් අයිතිය හිමි වන බව ද පෙන්වා දුන්නේය.
තමා ආණ්ඩුව භාර ගත්තේ ආණ්ඩුව භාර ගැනීමට නායකයන් සොයාගත නොහැකි වූ කාලයක බවද මෙහිදී පැවසූ ජනාධිපතිවරයා නිවැරදි ආර්ථික කළමනාකරණය හේතුවෙන් අද රට ආර්ථික අර්බුදයෙන් ගොඩඑමින් තිබෙන බවත්, නව ආර්ථිකයක් සමඟ රට ඉදිරියට ගෙනයෑමේ දී කුරණෑගල දිස්ත්‍රික්කය ද නව සංවර්ධන සැලැස්මක් යටතේ පුළුල් සංවර්ධනයකට ලක් වන බවත් සඳහන් කළේය. මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මහතා මෙසේද පැවසීය.
කුරුණෑගල දිස්ත්‍රික්කයේ ජීවත් වන්නේ රටට බත සපයන ගොවි ජනතාවයි. නමුත් ඔවුන්ට මෙතෙක් තම ඉඩම්වල අයිතිය හිමිව තිබුණේ නැහැ. තමන් ජීවත් වන බිමේ නීත්‍යනුකූල අයිතිය හිමි නොවූ ලක්ෂ ගණනක් ජනතාව අද මේ රටේ සිටිනවා. ඔවුන්ට අයිතිය ලබාදීම වෙනුවෙන් අප උරුමය වැඩසටහන ක්‍රියාත්මක කළා.
මම ආණ්ඩුව හැදුවේ ඉතා අසීරු කාලයකදීයි. ආණ්ඩුව භාර ගැනීමට නායකයන් සොයාගත නොහැකි වූ කාලයකයි. නමුත් මම ආණ්ඩුව භාර ගත්තා. සෑම පක්ෂයකම කොටස් එක්කර ගනිමින් ආණ්ඩුව ගොඩනැඟුවා. දැන් ජනතාවගේ ප්‍රශ්න විසඳීම ආරම්භ කර තිබෙනවා.
හිමිකම් ලාභියකුට ජනපති අතින් සින්නක්කර ඔප්පුව
මේ රටේ ආර්ථිකය කඩාවැටුණු අවස්ථාවේ ජනතාව බලාපොරොත්තු අත්හැරියා. අද මම මේ ප්‍රදේශයේ මන්ත්‍රීවරුන්ට ස්තුති කළ යුතුයි. තමන්ගේ නිවස ගිනිබත් වුවත් ඔවුන් ඒ ගැන සිතුවේ නැහැ. ඔවුන් ජනතාව ගැන සිතා ජනතාවට සහන ලබාදීමට කටයුතු කර තිබෙනවා. අද අප රට බංකොලොත්භාවයෙන් නිදහස් කරගෙන තිබෙනවා. අපට ණය ආපසු ගෙවීමට වසර 4ක කාලයක් හිමි වෙනවා. ඒ වගේම වසර 6ක් පමණ සැහැල්ලු බරකින් ණය ගෙවීමට අවස්ථාව ලැබෙනවා. ඒ වගේම ගෙවන පොලියෙන් කොටසක් කපා දමා තිබෙනවා. එයින් අපට ඩොලර් බිලියන 5ක් ලැබෙනවා. ඒ වගේම අප පෞද්ගලික බැඳුම්කර හිමියන් සමඟ සාකච්ඡා කළා. ණය මුදල අඩු කිරීමට ඔවුන් එකඟ වුණා. ඒ අනුව ඩොලර් බිලියන 3ක පමණ ණය ඉවත්වීමක් වෙනවා. එසේ නම් සම්පූර්ණයෙන් අපට ගෙවීමට තිබෙන මුදල්වලින් ඩොලර් බිලියන 8ක් ඉවත් කර තිබෙනවා. මේ සහනය මේ රටේ ජනතාවට ලැබී තිබෙනවා. ඒ වගේම ලිහිල් කොන්දේසි යටතේ අපට ඩොලර් බිලියන 2ක් ලබා දී තිබෙනවා. චීනය ලබාදීමට නියමිත මුදල් සහ ඉන්දියාවෙන් ලැබීමට තිබෙන ආධාර ඊට අයත් වන්නේ නැහැ. අප ආණ්ඩුව භාරගෙන තවම වසර දෙකක් නැහැ. නමුත් මේ කාලය තුළදී අප ඩොලර් බිලියන 8ක් බේරාගෙන තිබෙනවා. මා ආණ්ඩුව භාර ගැනීමට පෙර ගෝඨාභය රාජපක්ෂ ජනාධිපතිවරයාගේ කාලයේ අපට ඉන්දියාව ලිහිල් කොන්දේසි මත ණය ඩොලර් බිලියන තුනහමාරක් ලබා දුන්නා. ඒ වගේම බංග්ලාදේශයෙන් ඩොලර් මිලියන 200ක් ලබා දුන්නා. ආර්ථික අසීරුතා හමුවේ වුවද අප බංග්ලාදේශය දුන් ඩොලර් මිලියන 200ක් ආපසු ගෙවා තිබෙනවා.
ආර්ථිකය ගොඩනැඟීම වෙනුවෙන් අසීරු තීරණ ගැනීමට මට සිදු වුණා. වැට් බදු වැඩි කිරීම පහසු දෙයක් නොවෙයි. නමුත් ආර්ථිකය සකස් කිරීම වෙනුවෙන් එය කිරීමට සිදු වුණා. ඇතැම් නායකයන් පාරට එන්න, ගෙවල් ගිනි තියන්න කියලා ජනතාවට කිව්වා. ආණ්ඩුවට සහාය දෙන්න එපා කියලා කිව්වා. ගොවීන්ට කිව්වා නැවත කොළඹට එන්න කියලා. කොළඹට එන්න බැහැ ඉන්ධන නැතිව. අපි ජනතාවට අවශ්‍ය ඉන්ධන, පොහොර ලබා දුන්නා. ඒ අවස්ථාවේ දී පවා ගොවි ජනතාවට කිව්වේ වගා කරන්නේ නැතිව කොළඹට එන්න කියලා.
මේ රටේ ගොවි ජනතාව 2022-2023 කන්නවල ලබාදුන් අස්වැන්න නිසා තමයි මේ රටේ නිෂ්පාදනය වැඩි වුණේ. ඒ සමඟම සංචාරක ව්‍යාපාරය දියුණු වුණා. මේ සියල්ල සමඟ අද අපි ඩොලර් බිලියන 8ක සහනයක් ලබාගෙන ණය බරින් නිදහස් වීමට මාර්ගය සකස් කරගෙන තිබෙනවා.
ආර්ථිකය කඩා වැටෙද්දි එයින් වැඩිපුරම පීඩාවට පත්වන්නේ සාමාන්‍ය ජනතාව. දියුණු වන විට එහි වාසිය කොටසකට පමණක් හිමි වෙනවා. අප උරුමය සින්නක්කර ඉඩම් ඔප්පු ලබාදීමේ වැඩසටහන ක්‍රියාත්මක කළේ සාමාන්‍ය ජනතාවට ප්‍රතිලාභ ලබාදීම වෙනුවෙනුයි. පරම්පරා ගණනාවක් ජීවත්වූ ඉඩම් කොටසේ සින්නක්කර අයිතිය අද ඒ ජනතාවට හිමි වෙනවා. මෙය ආණ්ඩුව තැබූ වාර්තාවක් බව කිව යුතුයි. අනිත් අය සමාජවාදය ගැන කතා කරනවා. නමුත් නියම සමාජවාදය මෙයයි. ඉඩම් ජනතා අයිතියට ලබාදීම මේ හරහා සිදු වෙනවා. මේ වැඩසටහන ක්‍රියාත්මක කර තිබෙන්නේ ලෝකයේ රටවල් දෙකක් පමණයි. ඒ ජපානය සහ දකුණු කොරියාව. නමුත් එම රටවල් දෙකේම සිදු වුණේ අඩු මුදලකට ඉඩම් ලබාදීමයි. නමුත් අප මේ ඉඩම් දෙන්නේ නොමිලේ බව කිව යුතුයි. මේ වැඩසටහන මඟින් මේ රටේ අයිතිය තිබෙන ජනතාව තවත් ලක්ෂ 20කින් වැඩි කර තිබෙනවා.
ඔප්පු ලැබී සතුටින්
ඒ වගේම සමෘද්ධි වැඩසටහනේ ප්‍රතිලාභ මෙන් තෙගුණයක් ජනතාවට ලබාදෙමින් අස්වැසුම වැඩසටහන ක්‍රියාත්මක කළා. අපි මේ වැඩසටහන් ක්‍රියාත්මක කළේ බංකොලොත් වූ රටකයි. කොතරම් අසීරුතා තිබුණත් රජයේ සේවකයන්ට රුපියල් දස දහසක දීමනාවක් දුන්නා. වැටුප් වැඩි කිරීම පිළිබඳ ඉදිරි වසරේදී අවධානය යොමු කළ හැකියි. මේ හා සමගාමීව පෞද්ගලික අංශයේ වැටුප් වැඩි වීමක් ද සිදු වුණා. සංචාරක ව්‍යාපාරයෙන් ලැබෙන ආදායම් ඉහළ ගියා. අද නවීන සංචාරක ව්‍යාපාරයක් රටේ ක්‍රියාත්මක වෙනවා. මේ සමඟ ජනතාවගේ ආදායම් මාර්ග ඉහළ ගොස් තිබෙනවා.
පසුගිය පෙසොන් පොහොයට රට පුරා දන්සල් විශාල ප්‍රමාණයක් පැවැත්වුණා. මීට දෙවසරකට පෙර ජනතාවට කන්න නැතිවයි සිටියේ. අද ඔබේ දහඩිය මහන්සියෙන් නෙළාගත් අස්වැන්නෙන් පොසොන් පොහොයට ලංකා ඉතිහාසයේ මෙතෙක් නොපැවැත්වුණු දන්සල් ප්‍රමාණයක් පසුගිය පොසොන් පොහොය සමයේ පැවැත්වුණා. මේ පිළිබඳ විදෙස් තානාපතිවරුන් මා සමඟ පුදුමය පළ කළා. මේ අපේ ශක්තියයි. මේ අනුව ජනතාවට උපකාර කළ හැකි සෑම අන්දමකින්ම එම සහන ලබාදීමට අප කටයුතු කරනවා. ඒ සමඟම රට දියුණුව කරා ගෙන යනවා.
ඒ වගේම මේ වන විට මේ කුරුණෑගල දිස්ත්‍රික්කය ශීඝ්‍රයෙන් දියුණු වෙමින් පවතිනවා. ගම්පහ සහ කොළඹින් පසුව වැඩිම ජනගහනයක් ජීවත් වන්නේ කුරුණෑගල දිස්ත්‍රික්කයේ. මේ පළාත සැලැස්මක් අනුව දියුණු කිරීම අපේ අරමුණයි. ඒ නිසා බිංගිරිය ප්‍රදේශයේ වෙළෙඳ කලාපයක් ඇති කිරීම වෙනුවෙන් අක්කර 1000ක් පමණ වෙන් කර තිබෙනවා. එය ඉරණවිල සංචාරක කලාපය සමඟ එක් කරනවා. එවිට මේ බිංගිරිය, මාදම්පේ ප්‍රදේශ විශාල දියුණුවක් ලබනවා. ඒ වගේම කුලියාපිටියේ විශාල කර්මාන්ත දියුණුවක් ඇති කිරීමට සැලසුම් කර තිබෙනවා. එසේම කෘෂිකර්ම නවීකරණ වැඩසටහන යටතේ විශාලම වැඩසටහන ක්‍රියාත්මක වන්නේ මේ කුරුණෑගල දිස්ත්‍රික්කයේයි.
ඒ වගේම දැන් අපට ආධාර ලැබෙන නිසා අධිවේගී මාර්ගවල ඉදිකිරීම් කටයුතු ආරම්භ කෙරෙනවා. අනෙක් මාර්ග පද්ධතියත් මේ සමඟ එක්වෙනවා. ඒ වගේම මේ පළාතට නව විශ්වවිද්‍යාලයක් ලැබෙනවා. මේ අනුව ඉදිරි වසර කීපයේ කුරුණෑගල විශාල දියුණුවකට ලක් වෙනවා.
කුරුණෑගල දිස්ත්‍රික් සම්බන්ධීකරණ කමිටු සභාපති, පාර්ලිමේන්තු මන්ත්‍රී සමන්ප්‍රිය හේරත් මහතා –
ජනාධිපති මහතා 2024 අය වැය යෝජනාවකට අනුව ගනු ලැබූ දැවැන්ත පියවරක් ලෙස උරුමය වැඩසටහන හැඳින්විය හැකියි. නිදහසින් පසුව මේ රටේ බොහෝ දෙනෙකුට තිබුණේ බලපත්‍ර සහිත ඉඩම්. ඔවුන්ට විවිධ නම්වලින් ඉඩම් සඳහා බලපත්‍ර දුන්නත් ඒ ඉඩම්වල අයිතිය තිබුණේ නැහැ. ජනතාවගේ ඉඩම් ප්‍රශ්න විසඳන්න රාජ්‍ය නිලධාරින්ට මැදිහත් වීමට සිදු වුණා.
අද ජනතාවගේ ඉඩම් ගැටලු විසඳීමට ජනාධිපති පියවර ගෙන තිබෙනවා. වයඹ පළාතේ ජනතාවගේ ඉඩම් ගැටලු විසඳීම සම්බන්ධව එතුමාට ස්තූතිය පුද කර සිටිනවා.
වයඹ පළාත් ආණ්ඩුකාර නසීර් අහමඩ් මහතා –
ජනාධිපති රනිල් වික්‍රමසිංහ මහතාගේ සංකල්පයකට අනුව ක්‍රියාත්මක වන උරුමය වැඩසටහන අද වයඹ පළාතේ ක්‍රියාත්මක වීම පිළිබඳ සතුටු වෙනවා. මේ වැඩසටහනේ ප්‍රධාන අරමුණ වන්නේ ජනතාවට නීත්‍යනුකූල ඉඩම් අයිතිය ලබාදීමයි.
මේ රටේ බොහෝ පිරිසකට තිබෙන්නේ ඉඩම් බලපත්‍ර පමණයි. ඒ ඉඩම්වල අයිතිය ඕනෑම අවස්ථාවක රජයට පවරා ගන්න පුළුවන්. බලපත්‍ර ඉඩමකට වටිනාකමක් නැහැ. නිදහසින් පසු මේ රටේ ජනතාවට සින්නක්කර ඔප්පු ලක්ෂ විස්සක් දෙන වැඩසටහනක් ක්‍රියාත්මක කළේ වත්මන් ජනාධිපතියි. උරුමය වැඩසටහන අනාගත ආයෝජනයක් බව කිව යුතුයි.
ඒ වගේම ජනාධිපතිගේ සංකල්පයක් මත ක්‍රියාත්මක කෙරෙන කෘෂි නවීකරණ වැඩසටහන ගමට ගෙනවිත් තිබෙනවා. පසුගිය කාලයේ අප රටේ ජනතාව ගොඩක් දුක් වින්දා. ආර්ථික අර්බුදයෙන් රටත්, ජනතාවත් බේරාගත් එකම නායකයා රනිල් වික්‍රමසිංහ මහතා පමණයි. එතුමා කෙටි කාලයක් තුළ රටේ විශාල වෙනසක් කළා.
ඔබට උරුමය දෙනවාට ඇතැම් දේශපාලනඥයන් කැමති නැහැ. ඔවුන්ගේ කඩාකප්පල්කාරී ක්‍රියාවන්ට ඉඩදිය යුතු නැහැ. ජනාධිපති තවදුරටත් බලයේ සිටිය යුතුයි. මේ රටට හුස්මක් ගැනීමට ඉඩ දුන් නායකයා රනිල් වික්‍රමසිංහ මහතා බව අපට අමතක කරන්න බැහැ. අප රටේ අනාගත අභිවෘද්ධිය වෙනුවෙන් එතුමාගේ නායකත්වය යටතේ තවදුරටත් ඉදිරියට යා යුතුයි.
රාජ්‍ය අමාත්‍යවරුන් වන ශාන්ත බණ්ඩාර, ඩී.බී. හේරත්, පාර්ලිමේන්තු මන්ත්‍රීවරුන් වන ජොන්ස්ටන් ප්‍රනාන්දු, අනුර ප්‍රියදර්ශන යාපා, අසංක නවරත්න, මංජුලා දිසානායක, සුමිත් උඩුකුඹුර, හිටපු අමාත්‍ය අකිල විරාජ් කාරියවසම්, ජනාධිපති ලේකම් සමන් ඒකනායක, කුරුණෑගල දිස්ත්‍රික් ලේකම් ආර්.එම්.ආර්. රත්නායක, වයඹ පළාත් සභාවේ සභාපති ටිකිරි අධිකාරි, ජනාධිපති ජ්‍යෙෂ්ඨ අතිරේක ලේකම් චන්ද්‍රා හේරත්, මහවැලි අධිකාරියේ අධ්‍යක්ෂ ජනරාල් මහේන්ද්‍ර අබේවර්ධන මහත්ම මහත්මීන්ද රාජ්‍ය නිලධාරින් ඇතුළු පිරිසක් ද මේ අවස්ථාවට එක්ව සිටියහ.
උත්සවයට එක් වූ ආරාධිතයන්ගෙන් කොටසක්
