නියමිත දිනට මැතිවරණය පැවැත්විය යුතු බවත් ඒ සඳහා මැතිවරණ කොමසාරිස්වරයා සමඟ සාකච්ඡාවේ දී කරුණු පහදා දුන් බවත් ශ්‍රී ලංකා රාමඤ්ඤ මහා නිකායේ මහනායක අතිපූජ්‍ය මකුලෑවේ විමල නාහිමියන් හමුවේ ජනාධිපති රනිල් වික්‍රමසිංහ මහතා ප්‍රකාශ කළේය.
ශ්‍රී ලංකා රාමඤ්ඤ මහා නිකායේ මහනායක අතිපූජ්‍ය මකුලෑවේ විමල හිමියන් වැඩ සිටින නාරාහේන්පිට, ඇල්විටිගල මාවතේ පිහිටි ශ්‍රී ලංකා රාමඤ්ඤ මහා නිකායේ සංඝ මූලස්ථානය වෙත ඊයේ (05) පස්වරුවේ පැමිණි ජනාධිපතිවරයා මහනායක හිමියන් බැහැදැක සුව දුක් විමසා කෙටි පිළිසඳරක නිරත විය.
මෙහිදී සෙත් පිරිත් සජ්ඣායනා කර ජනාධිපති රනිල් වික්‍රමසිංහ මහතා වෙත ආශිර්වාද පළ කළ මහනායක හිමිපාණන් වහන්සේ ජනාධිපතිවරයා වෙත සමරු තිළිණයක් ද පිළිගැන්වීය.
මෙහිදී ජනාධිපති රනිල් වික්‍රමසිංහ මහතා වැඩිදුරටත් මෙසේද පැවසීය.
ණය ප්‍රතිව්‍යුහගතකරණයට අදාළව අප මේ වනවිට පෞද්ගලික ණය හිමියන් සහ වාණිජ ණය හිමියන් සමඟ සාකච්ඡා කර අවසන්. අපට ගෙවීමට තිබූ ණය ප්‍රමාණයෙන් ඩොලර් බිලියන 8ක් පමණ අඩුකර ගැනීමට හැකිවීමේ සුබ ආරංචිය ඔබ වහන්සේට දැනුම් දෙන්න කැමතියි. ඒ වගේම ණය ගෙවීම සඳහා වසර 4ක සහන කාලයක් ලබා ගැනීමටත් සම්පූර්ණ ණය ගෙවීම සඳහා 2043 දක්වා කාලය ලබා ගැනීමටත් අපට හැකි වුණා.
ශ්‍රී ලංකා රාමඤ්ඤ මහා නිකායේ අනුනායක වලේගොඩ ගුණසිරි, අත්තංගනේ ශාසනරතන, වෑතර මහින්ද, මකුලෑවේ ධම්මරතන, අකරැල්ලේ ගුණවංශ හිමිවරුන් ප්‍රමුඛ මහා සංඝරත්නය ද, ශ්‍රී ලංකා රාමඤ්ඤ මහා නිකායේ ආරක්ෂක සභාවේ මහ ලේකම් රාජ්‍ය ඇමැති ලසන්ත අලගියවන්න, හිටපු ඇමැති දයා ගමගේ, නිකායේ ආරක්ෂක සභාවේ ධම්මික සමරවික්‍රම මහත්වරුන් ඇතුළු පිරිසක් මේ අවස්ථාවට එක්වූහ.
