පොලිස් අත්අඩංගුවේ සිටියදී සැකකරුවන් මියයෑම සහ විවිධ වධ හිංසාවලට ලක්වීම හේතුවෙන් පාකිස්තානයේ දැවැන්ත විරෝධතාවක් ව්‍යාප්ත වීමේ අවදානමක් මතු වී ඇතැයි විදෙස් මාධ්‍ය වාර්තා කළේය. පසුගිය වසරේ ජූලි මාසයේදී එරට කයිබර් පක්ටුන්ක්වා ප්‍රාන්තයේ ස්වාට් පළාතේ පොලිස් අත්අඩංගුවේ සිටි තරුණයකු මිය යෑමත් සමඟ ආරම්භ වූ එම විරෝධතාව පසුගිය අප්‍රේල් මාසයේ කරච්චි නුවර පොලිස් ස්ථානයකදී තවත් සැකකරුවකු පොලිස් පහරදීමෙන් මියයෑමත් සමඟ වර්ධනය වී ඇතැයි විදෙස් මාධ්‍ය වැඩිදුරටත් වාර්තා කළේය.
පාකිස්තානයේ එක්ස්ප්‍රස් ට්‍රිබියුන් පුවත් සේවය සඳහන් කර ඇත්තේ පසුගිය අප්‍රේල් මාසයේදී කරච්චි නුවර පොලිස් අත්අඩංගුවේදී සැකකරු මිය යෑම අභිරහසක් බවය. වසර ගණනාවක සිට විවිධ අවස්ථාවලදී එරට පොලිස් අත්අඩංගුවේ සිටි සැකකරුවන් පොලිස් පහරදීමෙන් මිය ගොස් ඇතැයි ද, එවැනි මරණ පිළිබඳ පවුලේ සාමාජිකයන් විසින් සිදු කරනු ලබන පැමිණිලි සම්බන්ධව නීතිය ක්‍රියාත්මක කිරීම සඳහා පොලිසිය දක්වන උදාසීනත්වය හේතුවෙන් තත්ත්වය බරපතළ වී ඇතැයි ද එරට මාධ්‍ය වාර්තා කළේය.
