ලෝක බැඩ්මින්ටන් දිනය සැමරීම සඳහා ශ්‍රී ලංකා බැඩ්මින්ටන් ආයතනය විසින් ලබන 6 වැනිදා කොළඹදී විශේෂ උත්සවයක් සංවිධාන කර ඇත. රටවල් 178කදී සැමරෙන බැඩ්මින්ටන් දිනයට සමගාමීව එදින පෙරවරු 8.45ට බැඩ්මින්ටන් සංගම් මූලස්ථානය අසළදී පැවැත්වෙන පා ගමනකින් උත්සවය ඇරැඹේ.
ශ්‍රී ලංකා බැඩ්මින්ටන් ආයතනයේ නිලධාරීන්, විධායක කමිටුවේ සාමාජිකයන්, බැඩ්මින්ටන් ආයතනයේ කාර්ය මණ්ඩලය, ජාතික බැඩ්මින්ටන් සංචිතයේ ක්‍රීඩක ක්‍රීඩිකාවන්, බැඩ්මින්ටන් ආයතනයේ කලාපීය සංවර්ධන කමිටුව විසින් පවත්වා ගෙනයනු ලබන පුහුණු සංචිතවල ක්‍රීඩක ක්‍රීඩිකාවන් සහ පුහුණුකරුවන්, පුහුණු සංචිතවල මාපියන්ගේ කමිටුව සහ විවිධ පාසල්වල නියෝජිතයන් ඇතුළුව 350කට අධික පිරිසක් මේ අවස්ථාවට සහභාගි වීමට නියමිතය.
ශ්‍රී ලංකා ගුවන් හමුදාවේ තූර්යවාදන කණ්ඩායමේ සංගීත වාදනයෙන් සහ සැරසිලි වාහන පෙළකින් එම පා ගමන වර්ණවත් වනු ඇත. මෙට්ලන්ඩ් පෙදෙසේ පිහිටි ශ්‍රී ලංකා බැඩ්මින්ටන් ආයතනය අසලින් ඇරැඹෙන පා ගමන හෝටන් පෙදෙස, ඇල්බට් චන්ද්‍රවංකය, නිදහස් මාවත ඔස්සේ කිලෝමීටර් 2.8ක දුරක් ආවරණය වන පරිදි පැවැත්වීමට කටයුතු යොදා ඇත.
ක්‍රීඩා හා තරුණ කටයුතු රාජ්‍ය ඇමැති රෝහණ දිසානායක මහතා සමාරම්භක උත්සවයේ ප්‍රධාන ආරාධිත අමුත්තා ලෙස සහභාගි වන අතර, බැඩ්මින්ටන් ආයතනයේ සභාපති රොහාන් ද සිල්වා සහ කලාපීය සංවර්ධන කමිටුවේ සභාපති රොෂාන් ගුණවර්ධන මහත්වරු ද එම අවස්ථාවට එක්වනු ඇත.
