කලක සිට ඉන්දීය පිලට වමත් වේග පන්දු යවන්නන් අවම බැවින් පුහුණුවීම්වලදී පැයට කිලෝමීටර් 145ක – 150ක අධික වේගයකින් ඉන්දීය පිතිකරුවන් වෙත පන්දු යොමු කිරීම උදෙසා සේවය ලබා දුන්නේ ශ්‍රී ලංකා පුහුණුකරුවෙකි. එම පුහුණුවෙන් තමන් වෙතට ඕනෑම වේගයකින් එන පන්දුවකට හයේ පහරක් එල්ල කිරීමේ අභියෝගය ජය ගැනීමට හැකිවූ බව විරාත් කෝලි සඳහන් කර සිටී. මේ නිසාම විස්සයි20 ලෝක කුසලානයේදී තමන් ලද තරගයේ වීරයා සම්මානය ක්‍රීඩක විවේකාගාරයට ගොස් ශ්‍රී ලංකා පුහුණුකරු වෙත ලබාදී ඡායාරූපයක් ගැනීමට කෝලි අමතක නොකළේය.
ඉන්දීය කණ්ඩායම වෙනුවෙන් පුහුණු කිරීම්වලදී සහාය වන ‘ත්‍රෝඩවුන් විශේෂඥ පුහුණුකරු’ (Throwdown Specialist) වෙන කවුරුත් නොවේ. ඔහු නුවන් සෙනෙවිරත්න නොහොත් ‘බව්වා’ ලෙසින් හඳුන්වන ශ්‍රී ලංකා හිටපු ක්‍රීඩකයෙකි. ඔහුගේ අති සුවිශේෂ වේගපන්දු යැවීමේ අභ්‍යාස මඟින් තම කණ්ඩායමේ ක්‍රීඩකයන්ට ලෝක මට්ටමේ පුහුණුවක් ලබා ගැනීමට උපකාරී වූ බැවින් ඔහුට අවංක ස්තුතිය සහ ගෞරවය පිරිනමන බව විරාත් කෝලි සඳහන් කළේය.
නුවන් සෙනෙවිරත්න වමතින් පන්දු විසිකිරීම හා වමතින් වේගපන්දු යැවීම සිදුකරන හෙයින් ඔහු වෙත වැඩි අවධානයක් ඉන්දීය ක්‍රිකට් ආයතනය යොමු කළේය.
දැනට 44 හැවිරිදි වියෙහි පසුවන නුවන් සෙනෙවිරත්න ශ්‍රී ලංකාවේ හිටපු පළමු පෙළ ක්‍රිකට් ක්‍රීඩකයෙක් වන අතර, කොළඹ ක්‍රිකට් සමාජයේ ආදී ක්‍රිකට් ක්‍රීඩකයෙකි. එසේම ඔහු ශ්‍රී ලංකා ජාතික ක්‍රිකට් කණ්ඩායම, ශ්‍රී ලංකා ‘ඒ‘ ක්‍රිකට් කණ්ඩායම සමඟ කටයුතු කොට අත්දැකීම් වැඩි කරගෙන තිබිණි.
ක්‍රිකට් ක්‍රීඩාවෙන් ඔහුට ජීවනෝපාය සොයා ගැනීමට නොහැකි තත්ත්වයක් උදාවී තිබියදී තමන් සතු වෑන් රථයක් මඟින් පාසල් දරුවන් ප්‍රවාහනය කිරීම ඔහු ශ්‍රී ලංකාවේදී සිදු කළේය. මැදපෙරදිග රැකියාවකට ගොස් කටයුතු කළ අයෙක් ලෙසද නුවන් සෙනෙවිරත්නගේ ජීවිත කතාව කියැවෙයි. 2018 වසරේදී ඉන්දීය කණ්ඩායම ඔහුගේ සේවය ලබා ගැනීමට කටයුතු කළේය. එදින සිට මේ දක්වා ඉන්දීය ජාතික කණ්ඩායම වෙනුවෙන් ස්ථිර ලෙස ඔහු සේවය කරමින් සිටී. ඔහුට මේ වන විට ඉතා විශාල වැටුපක් සහ තවත් වරප්‍රසාද රැසක්ද ලබාදී ඇතැයි පැවැසේ.
එක්තරා කාලයකදී ප්‍රබල ඉන්දීය පිතිකරුවෝ වමත් වේග පන්දු යවන්නන් ඉදිරියේ අසරණ වූහ. මිචෙල් ස්ටාක්, මුස්ටෆිසුර් රෙහෙමාන්, ට්‍රෙන්ට් බෝල්ට්, වහාබ් රියාස් හා ෂයින් ෂා අෆ්රිඩි ඒ අතරින් ප්‍රධාන තැනක් ගත්හ. ඒ වමත් වේග පන්දු භීතිකාවෙන් ඉන්දීය පිතිකරුවන් ගලවා ගෙන ඇත්තේ ශ්‍රී ලංකාවේ නුවන් සෙනෙවිරත්න බව ඉන්දීය ක්‍රිකට් බලධාරීන් පවා පිළිගෙන ඇත.
විරාත් කෝලි ඔහුගේ සාර්ථකත්වය පිටුපස සිටින කෙනෙක් ලෙස ශ්‍රී ලංකාවෙ නුවන් සෙනෙවිරත්න හඳුන්වා දී ඇත. දිනෙක පුහුණු සැසියක් අතරතුර නුවන් විසිකළ පන්දුවක වේගය කියවා ගැනීමට බැරිවූ විරාත් කෝලිගෙ ඉල ඇට ප්‍රදේශයේ පන්දුව වැදුණි. එහි වේගය පැයට කිලෝමීටර් 150කට ආසන්න වූ බව පැවැසේ. එහිදී නුවන් කෝලි ළගට ගොස් සමාවෙන්න කිව්වත් කෝලි “නෑ..නෑ..එ්කට කමක් නෑ තවත් හයියෙන් එවන්න“ යැයි පැවැසීය. දැන් අවුරුදු 6කට ආසන්න කාලයක් නුවන් ඉන්දීය පිතිකරුවන්ට වමතින් පන්දුව විසිකර වේග පන්දුවට පහරදෙන ආකාරය පුහුණුකරමින් සිටී.
අන්න ඒ නිසයි මොන තරම් වේගයකින් එන පන්දුවකට වූවත් කෝලිලා, ෂර්මලා හයේ ඒවා හතරේ එ්වා ගහන්න පුරුදු වුණේ.
ප්රින්ස් ගුණසේකර
