රාත්රී කාලයේදී වසා දමා තිබෙන වෙළෙඳසල්වලට ඇතුළු වී එහි තිබූ රුපියල් ලක්ෂ හැටකට අධික වටිනාකමකින් යුත් රන් භාණ්ඩ හා දේපළ සොරාගත් පුද්ගලයකු, අයිස් මිලිග්රෑම් 5080ක් සමඟ අත්අඩංගුවට ගත් බව බස්නාහිර පළාත දකුණ අපරාධ කොට්ඨාසය පවසයි.
මෙසේ අත්අඩංගුවට ගෙන ඇත්තේ දෙහිවල ප්රදේශයේ පදිංචි 50 හැවිරිදි පුද්ගලයකු බව පොලිසිය පවසයි.
රාජගිරිය, ඔබේසේකරපුර ප්රදේශයේ සැරිසරන පුද්ගලයකු රිදී හා රන් භාණ්ඩ ඉතා අඩු මිලට විකුණා අයිස් පානය කරන බවට බස්නාහිර පළාත දකුණ අපරාධ කොට්ඨාසයේ ඒකක 2 වැඩ බලන ස්ථානාධිපති පොලිස් සැරයන්(38723) රංජිත් නිලධාරියාට ලද තොරතුරකට අනුව නිලධාරීන් කණ්ඩායමක් වැලිකඩ අරුණෝදය මාවතේ සිදු කළ වැටලීමකදී අයිස් ග්රෑම් 5, මිලිග්රෑම් 80ක් සමඟ සැකකරු අත්අඩංගුවට ගෙන තිබේ.
අත්අඩංගුවට ගැනීමෙන් අනතුරුව සිදු කළ ප්රශ්න කිරීම්වලදී 2022.08.01 දින මහනුවර ප්රදේශයේ රන් භාණ්ඩ වෙළෙඳසලක් කඩා සොරාගෙන තිබූ රුපියල් 6,80.000 වටිනා රන් හා රිදී භාණ්ඩ අතරින් ග්රැම් 350ක රිදී මාල 03 ක්, බ්රේස්ලට් 03ක් හා මුදු 08ක් හෙට්ටිවිදිය හා වැලිකඩ අරුණෝදය මාවතෙන් සොයා ගෙන තිබේ.
එහිදී සැකකරු සන්තකයේ තිබූ රුපියල් 120,000ක් වටිනා ජංගම දුරකතනය පිළිබඳව වැඩිදුර විමර්ශනය කිරීමේදී එය 2022.09.03 දා රාජගිරිය ඔබේසේකරපුර ප්රදේශයේ නිවෙසකින් සොරා ගත් එකක් බවට තොරතුරු අනාවරණය වී ඇත.
තවද සැකකරු මහනුවර, වැලිකඩ, තලංගම බොරැල්ල, හලාවත ප්රදේශවල වෙළෙඳසල් කඩා භාණ්ඩ සොරාගෙන ඇති අතර ඊට සම්බන්ධ තවත් සැකකරුවන් දෙදෙනෙකු මේ වනවිට බන්ධනාගාරගතව ඇති බැවින් ඉදිරි විමර්ශන අධිකරණයට කරුණු වාර්තා කොට සිදුකිරීමට නියමිතය.
මේ අතර නාවල ප්රදේශයේ ගොඩනැගිලි ද්රව්ය වෙළෙඳසලක් කඩා එහි තිබූ වතුර මෝටර් හා වයර් තොගයක් කොල්ලකා පලා ගොස් තිබූ අතර එම භාණ්ඩ මීට පෙර වැලිකඩ පොලිසිය මඟින් සොයාගෙන සැකකරු බන්ධනාගාරගත කර තිබූ බව පැවසේ.
එසේම දෙමටගොඩ ප්රදේශයේ ගොඩනැගිලි ද්රව්ය වෙළෙඳසලක් කඩා භාණ්ඩ සොරාගැනීමේ සිද්ධියක් සම්බන්ධයෙන් බන්ධනාගාරගතව සිට මීට දින හතරකට පෙර ඇප මත නිදහස්ව ආ අයකු බවට තොරතුරු අනාවරණය වී ඇත.
අත්අඩංගුවට ගත් සැකකරු අලුත්කඩේ අංක 4 අධිකරණයට ඉදිරිපත් කිරීම සඳහා වැලිකඩ පොලිසියට භාරදීමට නියමිතය.
කොට්ටාව - ප්රදීප් කුමාර