රුපියල් ලක්ෂ හැත්තෑ පහකට අධික වටිනාකමින් යුත් දුරකතන සන්නිවේදන රැහැන් කපා ඒවායේ තඹ ඉතා අඩු මිලට විකුණා අයිස් පානයට පුරුදුව සිටි පස් දෙනෙකුගෙන් යුත් කල්ලියක මහ මොළකරුවකු, සොරාගත් තඹ කිලෝ විසි හතක් සමඟ අත්අඩංගුවට ගත් බව කොට්ටාව පොලිසිය පවසයි.
සැකකරු මෙරට දුරකතන සන්නිවේදන සමාගමක සේවය කළ වල්පොළ, ලේක්සයිඩ් ප්රදේශයේ පදිංචි 24 හැවිරිදි පුද්ගලයකු බව පොලිසිය පවසයි.
කොට්ටාව, මාලපල්ල ප්රදේශයේ අතුරු මාර්ගයක ඉදිකර තිබූ RRU වර්ගයේ මීටර් 180ක් දිගැති දුරකතන රැහැන් තොගයක් කපා සොරාගෙන යාමේ සිද්ධියක් සම්බන්ධයෙන් ඉකුත් 17 වැනිදා කොට්ටාව පොලිසියට පැමිණිල්ලක් ලැබී තිබුණි. ඒ අනුව අපරාධ විමර්ශන අංශයේ ස්ථානාධිපති උප පොලිස් පරීක්ෂක බුද්ධික චතුරංග මහතා ඇතුළු නිලධාරි කණ්ඩායමක් කොට්ටාවේ සිට රාගම වල්පොළ දක්වා ආරක්ෂිත කැමරා දර්ශන 213 පරික්ෂා කර තිබේ.
එහිදී මාලපල්ල ප්රදේශයේ දුරකතන රැහැන් කැපීම සඳහා පැමිණි ත්රිරෝද රථයෙන් බීම බෝතලයක් මිලදී ගැනීම සඳහා මාකොළ ප්රදේශයේ වෙළෙඳසලකට පැමිණෙන පුද්ගලයෙකුගේ දර්ශනවලින් සැකකරු හඳුනාගෙන කොට්ටාව, වෑකඩ පාර ප්රදේශයේදී ත්රිරෝද රථයෙන් ගමන් කරමින් සිටියදී අත්අඩංගුවට ගෙන තිබේ.
පසුව සිදු කළ ප්රශ්න කිරීම්වලදී සොරාගත් තඹ කිලෝ 27ක්, දුරකතන රැහැන් කැපීම සඳහා භාවිත කරන උපකරණ කට්ටලයක්, සොරකම සඳහා භාවිතා කරන ත්රිරෝද රථයක් හා යතුරුපැදියක්, දුරකතන රැහැන්වල තඹ ආවරණය කෙරෙන රබර් කොපු තොගයක් පොලිසිය සොයාගෙන තිබේ.
තවදුරටත් සැකකරුගෙන් ප්රශ්න කිරීමේදී කඩවත, රාගම, හෝමාගම, වැලිවේරිය, අත්තනගල්ල, කහතුඩුව, සීදූව, තලංගම, ජා – ඇළ සහ යක්කල යන පොලිස් වසම්වලින් රුපියල් ලක්ෂ 75 කට අධික වටිනාකමින් යුත් දුරකතන රැහැන් කැපීමේ සිද්ධීන් 24ක තොරතුරු අනාවරණය වූ බවත් ඒ සම්බන්ධයෙන් අවස්ථා කිහිපයකදී බන්ධනාගාරගතව සිට දැනට ඇප මත නිදහස්ව සිටින්නකු බවට තොරතුරු අනාවරණය වූ බවත් පැවැසේ.
මෙම සොරකම සඳහා පස් දෙනෙකුගෙන් යුත් කල්ලියක් සම්බන්ධ වී ඇති අතර ඉන් දෙදෙනෙකු මත්ද්රව්ය සමඟ අත්අඩංගුවට ගෙන දැනට බන්ධනාගාරගත කර ඇති බවත් අනිත් දෙදෙනා ප්රදේශයෙන් පලාගොස් ඇති බවත් පැවැසේ.
අත්අඩංගුවට ගත් සැකකරු හෝමාගම අධිකරණයට ඉදිරිපත් කිරීමට නියමිතය.
කොට්ටාව - ප්රදීප් කුමාර