බලපත්‍රයක් රහිතව නීති විරෝධී ලෙස යුරෝපයේ රැකියා සඳහා යැවීමේ ජාවාරමක නිරතව සිටි රැකියා නියෝජිත ආයතනයක් පවත්වාගෙන ගිය පුද්ගලයකු කොට්ටාව මාකුඹුර ප්‍රදේශයේ දී අත්අඩංගුවට ගත් බව විදේශ රැකියා නියුක්ති කාර්යංශයේ විශේෂ වැටලීම් අංශය පැවැසීය.
අදාළ ආයතනයෙන් ලබා ගැනීමට හැකි යුරෝපා රටවල රැකියා අවස්ථාවන් පිළිබඳව සමාජ මාධ්‍ය ඔස්සේ ලබා දී තිබූ ප්‍රචාරක කටයුතු මත ලද තොරතුරක් අනුව මෙම ස්ථානය වැටලීමට කටයුතු කර තිබුණි.
මෙම රැකියා නියෝජිත ආයතනය මඟින් ඇල්බේනියාවේ සහ රුමේනියාවේ රැකියා සඳහා පුද්ගලයින් විදෙස් ගත කරන බව පවසමින් එක් පුද්ගලයකුගෙන් රුපියල් ලක්ෂ 11ක් පමණ අයකර ඇති බවත් එහෙත් මෙතෙක් කිසිදු පුද්ගලයකු විදෙස් ගත කිරීමට කටයුතු කර නොමැති බවත් සිදු කළ විමර්ශනයේදී අනාවරණය වූ බවද එම ඒකකය පැවැසීය.
අදාළ විදේශ රැකියා නියෝජිත ආයතනයේ හිමිකරු බව කියන සැකකරුට අයත් මෝටර් රථය පරීක්ෂා කිරීමේදී එහි තිබී විදේශ ගමන් බලපත්‍ර 60කට ආසන්න ප්‍රමාණයක් සහ පුද්ගල ජීව දත්ත පත්‍රිකා රැසක් ද සොයා ගැනීමට හැකිව ඇත. මෙලෙස අත්අඩංගුවට ගෙන ඇත්තේ 32 හැවිරිදි නීතිඥවරයකු බව කියන පුද්ගලයකි. සැකකරු අධිකරණය වෙත ඉදිරිපත් කිරීමට නියමිතය. ශ්‍රී ලංකා විදේශ සේවා නියුක්ති කාර්යංශයේ විශේෂ විමර්ශන ඒකකය සහ හෝමාගම මූලස්ථාන පොලිසිය විසින් අදාළ වැටලීම සිදු කර ඇත.
මීගොඩ - බී.කේ. කත්රිආරච්චි
