විපක්ෂ නායක සජිත් ප්‍රේමදාස මහතාගේ සංකල්පයකට අනුව අඩු පහසුකම්වලින් සමන්විත පාසල්වලට “සක්වල” සුහුරු පන්ති කාමර ලබා දීමේ වැඩසටහන යටතේ රුපියල් එකොළොස් ලක්ෂ හැත්තෑ හත්දහසක් වටිනා පරිගණක සහිත සුහුරු පන්ති කාමරයක් මහර, එඩේරමුල්ල ශාන්ත සෙබස්තියන් මහා විද්‍යාලයට ලබා දීම විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් පසුගියදා පැවැත්විණ.
සමඟි ජන බලවේගයේ මහර ප්‍රධාන සංවිධායක හසිත් ගුණසේකර මහතාගේ ඉල්ලීම පරිදි විපක්ෂ නායක සජිත් ප්‍රේමදාස මහතා විසින් මෙම පාසල සඳහා 273 වැනි වැඩසටහන යටතේ පරිගණක සහිත සක්වල සුහුරු පන්ති කාමරය ලබා දීම සිදු කෙරිණ. මීට අමතරව එම පාසලේ නර්තන කණ්ඩායම සඳහා අවශ්‍ය ඇඳුම් මිලදී ගැනීමට රුපියල් ලක්ෂයක මුදලක් ඇතුළු එම පාසලට අවශ්‍ය අනෙකුත් භාණ්ඩ එම විදුහලේ සංවර්ධන අරමුදලට ලබා දීම ද එහිදී සිදු කෙරිණ.
එහිදී විපක්ෂ නායකවරයා විසින් රැස්ව සිටි පිරිස අමතන ලදී. මෙම අවස්ථාවට සමගි ජන බලවේගයේ වත්තල ප්‍රධාන සංවිධායක හිටපු පාර්ලිමේන්තු මන්ත්‍රී නියෝමාල් පෙරේරා, සමඟි ජන බලවේගයේ මහර ප්‍රධාන සංවිධායක හසිත් ගුණසේකර, එම පක්ෂයේ බියගම ප්‍රධාන සංවිධායක යූ.ජෝර්ජ් පෙරේරා යන මහත්වරුන් ඇතුළු එම පක්ෂයේ සමාජික, සමාජිකාවන් ද, මහර, එඬේරමුල්ල ශාන්ත සෙබස්තියන් මහා විද්‍යාලයේ සේවය කරන ගුරු මහත්ම, මහත්මීන් ද එහි ඉගෙනුම ලබන පාසල් ශිෂ්‍ය, ශිෂ්‍යාවන් සහ ඔවුන්ගේ මවුපියන් රැසක් සහභාගී වූහ.
මහර සමූහ - ගණිදු රෝචන සමරතුංග
