වැසිකිළි යාමට රාත්‍රී නිවෙසින් පිටතට පැමිණි හාලිඇල, අන්තුඩුවාවෙල ප්‍රදේශයේ 42 හැවිරිදි පෞද්ගලික ආරක්ෂක අංශයක සේවය කරන ආරක්ෂක නිලධාරිනියකට ලිංගික අතවර කළැයි සැකපිට එක්දරු පියකු ඊයේ (1) අත්අඩංගුවට ගත් බව හාලිඇල පොලිසිය පවසයි.
හාලිඇල, අන්තුඩුවාවෙල, කහටගොල්ල ප්‍රදේශයේ පදිංචි 30 හැවිරිදි එක්දරු පියකු මෙසේ අත්අඩංගුවට ගනු ලැබිනයි පොලිසිය පැවැසීය. මොහුගේ බිරිය විදේශ රටක රැකියාවක් කරන බවත්, මොහු රැකියාව ලෙස කුලී වැඩ කරන බවත් පොලිසිය පැවැසීය.
ලිංගික අතවරයට ලක් වූ බව කියන දියතලාව නගරයේ පෞද්ගලික ආයතනයක ආරක්ෂක නිලධාරිනියක ලෙස සේවය කරන 42 හැවිරිදි දරුවන් තිදෙනකු සිටින කාන්තාව වෛද්‍ය පරීක්ෂණයක් සඳහා බදුල්ල ශික්ෂණ රෝහලට ඇතුළත් කළ බවද පොලිසිය පැවැසීය. මෙම කාන්තාවගේ සැමියා නොමැති බවත් ඇය දරුවන් තිදෙනා සමඟ හාලිඇල, අන්තුඩුවාවෙල ප්‍රදේශයේ නිවෙසක පදිංචිව සිටින අතර රාත්‍රී ඇය මුළුතැන්ගේ දොර ඇර ගෙන එළියේ වැසිකිළියට යාමට සූදානම් වීමත් සමඟ මුළුතැන්ගේ පිටුපස සැඟවී සිටි සැකකරු ඇයට මෙසේ ලිංගික අතවර කර ඇතැයි පොලිසිය සඳහන් කළේය.
බදුල්ල ජ්‍යෙෂ්ඨ පොලිස් අධිකාරි වසන්ත කන්දේවත්ත, පොලිස් අධිකාරි පී.එම්. ජයරත්න යන මහත්වරුන්ගේ උපදෙස් මත හාලිඇල පොලිස් ස්ථානාධිපති පොලිස් පරීක්ෂක රුවන් ගුණතිලක මහතාගේ මෙහෙයවීමෙන් අපරාධ විමර්ශන අංශයේ ස්ථානාධිපති උප පොලිස් පරීක්ෂක උපාලි බණ්ඩාර, පොලිස් සැරයන් (1477) ජයසිංහ, කාන්තා පොලිස් සැරයන් (2629) කුමාරි යන නිලධාරීහු වැඩිදුර පරීක්ෂණ පවත්වති.
සොරණාතොට සමූහ සී. ගමගේ
