කොළඹ කොටුව සිට බදුල්ල බලා ධාවනය වෙමින් තිබූ අංක 1015 දරන උඩරට මැණිකේ දුම්රියේ ගමන් ගත් තරුණයකු ඔහිය දුම්රිය ස්ථානය අසලදී දුම්රියෙන් ඇද වැටී බරපතළ තුවාල ලබා පෙරේදා (30) පස්වරුවේ දියතලාව රෝහලට ඇතුළත් කළ බව හපුතලේ පොලිසිය පවසයි.
මෙසේ තුවාල ලබා ඇත්තේ බණ්ඩාරවෙල, බිඳුනුවැව, ස්ප්රිංවත්ත ප්රදේශයේ පදිංචි 20 හැවිරිදි තරුණයකු බවද පොලිසිය පැවැසීය. මොහු කොළඹ කොටුව සිට බදුල්ල බලා ධාවනය වෙමින් තිබූ උඩරට මැණිකේ දුම්රියේ ගමන් කරමින් සිටියදී දුම්රිය ඔහිය දුම්රිය ස්ථානයේ නැවතූ අවස්ථාවේ දුම්රියෙන් බැස ගොස් යළි දුම්රිය ධාවනය වීමේදී දිව ගොස් ධාවනය වෙමින් තිබූ දුම්රියට නැඟීමට යාමේදී මෙසේ දුම්රියෙන් ඇද වැටී ඇති බවත් පොලිසිය සඳහන් කළේය.
පාද දෙකට බරපතළ තුවාල ලබා සිටි එම තරුණයා පසුව එම දුම්රියේ දමා ගෙන හපුතලේ දුම්රිය ස්ථානයට ගෙනවිත් එතැනින් 1990 ගිලන් රථයක දමා ගෙන ගොස් දියතලාව රෝහලට ඇතුළත් කළ බවද පොලිසිය පැවැසීය.
සොරණාතොට සමූහ - සී. ගමගේ