යාපනය ඩෙල්ෆ්ට් දූපත ආසන්නයේ මුහුදු සීමාවේදී ඉන්දීය ධීවරයින්ගේ පහරකෑමකට ලක්ව මියගිය නාවික හමුදා සෙබළාගේ මරණය සම්බන්ධයෙන් අත්අඩංගුවට ගෙන සිටින ඉන්දීය ධීවරයින් දස දෙනාට සමාව ලබා දී ඔවුන්ව නිදහස් කර දෙන ලෙස ධීවරයින්ගේ ඥාතීන් රාමේෂ්වරන් දේශපාලනඥයින්ට ලිපි බාර දෙමින් පෙරේදා (30) ඉල්ලීම් කොට තිබේ.
එම ලිපිවල සඳහන් කරුණු ගැන සලකා බලා ශ්‍රී ලංකා රජයේ වගකිවයුත්තන්ට දැනුම් දී තම ධීවරයින් අත්අඩංගුවෙන් මුදා දෙන ලෙස ඔවුන්ගේ ඥාතීන් රාමේෂ්වරන් දේශපාලනඥයින්ගෙන් ඉල්ලා ඇත.
ඔවුන් ලිපි බාර ගනිමින් ප්‍රකාශ කොට ඇත්තේ මේ සම්බන්ධයෙන් සාකච්ඡා කිරීම පිණිස තමිල්නාඩු ප්‍රධාන අමාත්‍යවරයාගෙන් අවස්ථාවක් ඉල්ලා ඇති බවයි.
තමිල්නාඩු ප්‍රධාන අමාත්‍යවරයා හරහා මධ්‍යම රජයේ වගකිව යුතු අමාත්‍යවරුන් දැනුම්වත් කොට ඔවුන් ලවා ශ්‍රී ලංකා රජයේ බලධාරීන් සමඟ රාජ්‍ය තාන්ත්‍රික මට්ටමේ සාකච්ඡාවක් පවත්වා ඉන්දීය ධීවරයින් දස දෙනා නිදහස් කර ගැනීමට උත්සාහ කරන බවටද රාමේෂ්වරන් දේශපාලනඥයෝ දැනට අත්අඩංගුවේ සිටින ඉන්දීය ධීවරයින්ගේ ඥාතීන්ට පොරොන්දු වී තිබේ. රාමේෂ්වරන් දේශපාලනඥයින් වෙත බාර දෙන ලද ලිපිවල පිටපත් රාමේෂ්වරන් ධීවර සංගම්වල නියෝජිතයින් වෙතද බාර දී ඇත.
නාවික හමුදා සෙබළාගේ මරණය සම්බන්ධයෙන් අත්අඩංගුවට ගත් ඉන්දීය ධීවරයින් දස දෙනා මල්ලාකම් අධිකරණයට ඉදිරිපත් කිරීමෙන් පසුව ජූලි මස 8 වැනිදා දක්වා ඔවුන්ව රිමාන්ඩ් භාරයේ තබන ලෙස මහේස්ත්‍රාත්වරයා නියෝග කළේය.
උතුරු පළාත් විශේෂ රසුල දිල්හාර ගමගේ
