ආණ්ඩුව අත්සන් කළ විදෙස් ණය ආපසු ගෙවීමේ ගිවිසුම් සජිත්ට හෝ වෙනත් කවර බලවතකුට වුව වෙනස් කළ නොහැකි යැයි ප්රවාහන මහාමාර්ග හා ජනමාධ්ය ඇමැති ආචාර්ය බන්දුල ගුණවර්ධන මහතා ප්රකාශ කළේය. ගම්පොළ ප්රදේශයේ ඉතාමත් දුෂ්කර හා අබලන් මාර්ග කීපයක සංවර්ධන කටයුතු ආරම්භ කිරීම සහ කාපට් අතුරා සංවර්ධනය කෙරුණු මාර්ග ව්යාපෘති ජනතා අයිතියට පත් කිරීමේ වැඩසටහන් මාලාවකට එක්වෙමින් ඇමැතිවරයා මේ බව කීවේය.
අධිකරණ, බන්ධනාගාර කටයුතු හා ආණ්ඩුක්රම ව්යවස්ථා ප්රතිසංස්කරණ රාජ්ය ඇමැති, නීතිඥ අනුරාධ ජයරත්න මහතාගේ ඉල්ලීම පරිදි, මාර්ග කි.මී. 1500ක් ප්රතිසංස්කරණය කිරීමේ ව්යාපෘතිය යටතේ කාපට් අතුරා සංවර්ධනය කරන ලද ගම්පොළ පුපුරැස්ස, හුණුගල ප්රධාන මාර්ගය ඇමැති ආචාර්ය බන්දුල ගුණවර්ධන මහතා අතින් මෙහිදී ජනතා අයිතියට පත් කෙරිණි.
හිඳගල – නාරංවිට – ගම්පොළ මාර්ගයේ ඉදිකිරීම් කටයුතු ද ඇමැති, ආචාර්ය බන්දුල ගුණවර්ධන මහතාගේ ප්රධානත්වයෙන් ආරම්භ කෙරිණි.
එහිදී ඇමැතිවරයා මෙසේද කීවේය.
Òඉතිහාසයේ ඉතාමත් අපහසු කාල පරිච්ඡේදයක් අප පසු කරමින් සිටිනවා. ජනතාවගේ ඉල්ලීම් මත නිදහසින් පසු අපේ රටේ විවිධ රජයන් විශාල සුබසාධනවාදී ආර්ථිකයක් පවත්වාගෙන යෑම සඳහා අය වැය ලේඛනයේ විශාල හිඟයක් පවත්වා ගනු ලැබුවා. මේ හිඟය පියවා ගැනීමට සෑම රජයක්ම දේශීය හා විදේශීය වශයෙන් විශාල ලෙස ණය ලබාගෙන තිබෙනවා. එමෙන්ම රටට අවශ්ය බොහෝ දේ අප විසින්ම නිෂ්පාදනය කර අපනයනය කරනවා වෙනුවට විදේශීය රටවලින් විශාල වශයෙන් භාණ්ඩ ආනයනය කර තිබෙනවා. ආයාත වියදම් පියවා ගැනීමට ප්රමාණවත් නිර්යාත ආදායමක් නොමැතිවීම හේතුවෙන් සෑම දිනකම විදේශ රටවලට ණය වී තිබෙනවා. එම ණය ගෙවීම සඳහා තවත් ණය ලබාගෙන තිබෙනවා. එයද ප්රමාණවත් නොවන විට දිගින් දිගටම මුදල් මුද්රණය කර ජනතා ඉල්ලීම් ඉටු කර තිබෙනවා. වර්ජකයන්, උද්ඝෝෂකයන් විවිධ ස්ථානවල උද්ඝෝෂණය කරමින් ඉල්ලීම් ඉදිරිපත් කරන විට රජයන් පරිපූරක ඇස්තමේන්තු ඉදිරිපත් කරමින් වැඩි වැඩියෙන් මුදල් මුද්රණය කර තිබෙනවා. ඒ තුළින් ස්වල්ප භාණ්ඩ ප්රමාණයක් පසුපස විශාල මුදල් ප්රමාණයක් හඹා යෑම හේතුවෙන් උසුලාගත නොහැකි තරමට දිනෙන් දින භාණ්ඩ මිල ඉහළ ගොස් තිබෙනවා. එවිට නැවත නැවතත් වැටුප් වැඩි කරන ලෙස ඉල්ලීම් ඉදිරිපත් කරනවා. එවිට නැවතත් මුදල් මුද්රණය කර වැටුප් වැඩි කරනවා. මේ තත්ත්වය තුළ මුහුණ දුන් පාස්කු දින ප්රහාරයෙන් අනතුරුව ඇතිවූ කොවිඩ් වසංගතය හේතුවෙන් ඉතා කුඩා ආර්ථිකයක් ඇති ශ්රී ලංකාවේ ආර්ථිකය මුළුමනින්ම වසා දැමුණා. ගත් විදේශීය ණය වාරික ගෙවීමට නොහැකි වුණා. දිගින් දිගටම මෙලෙස කටයුතු කිරීමෙන් විශාල ණය බරක් එකතු වී ඒ සඳහා විසඳුම් සොයා නොගතහොත් රට සම්පූර්ණයෙන්ම කඩා වැටෙන බව ගෝඨාභය රාජපක්ෂ ජනාධිපතිවරයා නිහඬව තේරුම් ගෙන තිබුණා. ඊට රටේ විසඳුමක් ලබා දිය හැකි කිසිම දේශපාලන නායකයෙක්, ආර්ථික විශේෂඥයෙක් හෝ වෙනත් විද්වතෙකු සොයා ගැනීමට හැකියාවක් ලැබුණේ නෑ. එම තත්ත්වයට විසඳුම් ඉදිරිපත් කළ හැකි ජාත්යන්තර මට්ටමේ විශේෂඥයකු සොයා ගැනීමට කරන ලද අභිලාෂ කැඳවීමෙන් අනතුරුව කැබිනට් අනුකාරක සභාවක් මඟින් ප්රංශයේ ලසාඩ් සමාගම තෝරා ගනු ලැබුවා. නීතිමය කටයුතුවලදී පෙනී සිටීම සඳහා ක්ලිෆර්ඩ් හාන්ස් සමාගමට වගකීම පැවරුවා.
ඒ අවස්ථාවේදී රජයේම සිටිය ඇතැම් මැති ඇමැතිවරුන්ගේ විරෝධය හේතුවෙන් ජාත්යන්තර මූල්ය අරමුදලේ සහාය ලබා ගැනීමට නොහැකි වුණා. එහි අවසන් ප්රතිඵලය වූයේ රට මූල්ය වශයෙන් ඉතාමත් පහළ අඩියකට කඩා වැටීමයි. ජනතාව දහස් ගණනකට දින ගණනාවක් පෝලිම්වල රැඳී සිටීමට වුණා. ඇතැමුන් මියගියා. විවිධ ගැටුම් ඇතිවුණා. ජනතා විමුක්ති පෙරමුණ ඇතුළු අන්තවාදීන් මේ ජනතාව තවදුරටත් උසිගන්වමින් ප්රචණ්ඩත්වයට පෙලඹුවා. ඒ අවස්ථාවේදී අත්දැකීම් සහිත සියලුම නායකයන් රට භාර ගැනීම ප්රතික්ෂේප කරන මොහොතක පස් වතාවක් රටේ අගමැති ධුරය දැරීමෙන් අත්දැකීම් සහිත රනිල් වික්රමසිංහ මහතා අභියෝගය භාර ගත්තා. 2027 දක්වා ජාත්යන්තර මූල්ය අරමුදල සමඟ ගිවිසුමකට එළඹුණා. රටට හුස්ම ගැනීමේ හැකියාව ලැබුණේ ඒ තුළිනුයි. මේ වන විට භාණ්ඩ මිල වැඩිවීමේ වේගය 5% වඩා අඩු වී තිබෙනවා. ජාත්යන්තර වත්කම් ප්රමාණය 5.5ක් දක්වා වර්ධනය වී තිබෙනවා.
මේ ගිවිසුම හෝ එම ගිවිසුමේ ඉලක්ක වෙනස් කළහොත් අපේ රටට අනාගතයක් නැහැ. ලෝකයේ අවසන් ණය දෙන්නා වශයෙන් ජාත්යන්තර මූල්ය අරමුදලේ මැදිහත්වීමෙන් විදේශීය ණය හිමියන් සමඟ මේ ණය ලෝකයට ගෙවීම සඳහා සහනයක් දෙන ලෙස සාකච්ඡා කළා. එය සිදු කිරීමට තාක්ෂණික සහ විශේෂඥයන්ගේ සහාය පමණක් ප්රමාණවත් නොවන බැවින් චීනය, ඉන්දියාව, ජපානය, ප්රංශ ආධාර කණ්ඩායම ඇතුළු සියලු පාර්ශ්වයන් සමඟ ජනාධිපති පෞද්ගලිකවම ණය සඳහා සහනයක් ලබා ගැනීමට සාකච්ඡා වට කීපයක් පැවැත්වුවා. එහි ප්රතිඵලයක් ලෙස පසුගිය සතිය වන විට ලෝක රාජ්ය නායකයන් ශ්රී ලංකාවට ණය ගෙවීමට සහනයක් ලබා දීමෙන් නැවත රටක් ලෙස එසවීමට සහාය ලබා දීමට සූදානම් බවට සහතිකයක් දී තිබෙනවා. දැන් අපට බලාපොරොත්තුවක් තිබෙනවා.
ජනතාවට ඉර හඳ ලබා දීමට ඇතැම් දේශපාලන නායකයන් ඉතාමත් සාවද්ය ප්රකාශ කරනවා. මහජන බදු මුදලින් ලංකාවේ රජයකට කළ හැක්කේ රාජ්ය සේවක වැටුප්, විශ්රාම වැටුප්, ලබාගත් ණය සඳහා පොලී ගෙවීම සහ සහනාධාර ගෙවීම පමණයි. පුනරාවර්තන වියදම පියවා ගත හැකි ආකාරයේ රජයක් පසුගිය වසර 40 පුරාවට ශ්රී ලංකාවේ ඇතිවී නැහැ.
රටක් හෝ ආයතනයක් සමඟ රටක් වශයෙන් ගිවිසුමක් අත්සන් කිරීමෙන් අනතුරුව කවර රජයක් යටතේ වුවත් එම ගිවිසුම් ක්රියාත්මක කළ යුතුයි. එම නිසා මේ ගිවිසුම් සියල්ලක්ම අද සහ හෙට (ජූලි 02-03) පාර්ලිමේන්තුවට ඉදිරිපත් කර සමස්ත ලාංකීය ජනතාව විදේශයන්ගෙන් ගත් ණය සැලසුම් කළ ආකාරයටම ගෙවන බවට ජාත්යන්තරය ඉදිරියේ ප්රතිඥාවක් ලබා දීමෙන් අනතුරුව අපේ රටට ලෝකය සමඟ නැවත ගනුදෙනු කිරීමේ හැකියාව හිමිවෙනවා.
රාජ්ය සංවර්ධන සහ නිර්මාණ නීතිගත සංස්ථාවේ සභාපති කුෂාන් දේවින්ද, මාර්ග සංවර්ධන අධිකාරිය මධ්යම පළාත් අධ්යක්ෂ මහේන්ද්රන් විජේපාල මහත්වරුන්, නිලධාරීන්, හිටපු පළාත් පාලන ආයතන නියෝජිතයන්, රාජ්ය නිලධාරීන්, ප්රදේශවාසීන් ඇතුළු විශාල පිරිසක් මේ අවස්ථාවට එක්ව සිටියහ.