සිය පෙම්වතියට උපන්දින සුබපැතුම් පතක් මිලදී ගැනීම සඳහා යැයි කියමින් බෞද්ධාලෝක මාවතේ විහාරස්ථානයක පින් කැටයක් කඩා රුපියල් 130ක මුදලක් සොරකම් කළැයි කියන 14 හැවිරිදි බාලවයස්කාරයකු කුරුඳුවත්ත පොලිසිය භාරයේ කොළඹ ජාතික රෝහලේ රඳවා තැබීමට කොළඹ ප්‍රධාන මහේස්ත්‍රාත් තිළිණ ගමගේ මහතා ඊයේ (01) නියෝග කළේය.
මෙම දරුවා සරුංගලයක් යැවීම සඳහා ගොස් සිටියදී උඩුමහලකින් වැටී අත කැඩී ඇති බැවින් සහ දරුවා එකිනෙක ප්‍රතිවිරුද්ධ කාරණා පවසන බැවින් අධිකරණ වෛද්‍යවරයාට ඉදිරිපත් කළ බව කුරුඳුවත්ත පොලිසිය අධිකරණයට කරුණු ඉදිරිපත් කළේය. එහිදී දරුවාගේ මානසික මට්ටම දැන ගැනීම සඳහා පරීක්ෂණ කිහිපයක් කළ යුතුව ඇති බව ද අධිකරණ වෛද්‍යවරයා සඳහන් කර ඇතැයි කුරුඳුවත්ත පොලිසිය අධිකරණයට කරුණු සඳහන් කළේය. තම විහාරස්ථානයේ පින් කැටය කඩමින් සිටිය දී මෙම දැරුවා පොලිසියට රැගෙන විත් පැමිණිල්ලක් ඉදිරිපත් කරනු ලැබුවේ බෞද්ධාලෝක මාවතේ විහාරස්ථානයක හිමිනමක් බව කරුඳුවත්ත පොලිසිය අධිකරණයට කරුණු වාර්තා කළේය.
මෙම දරුවා සඳහන් කළ ආකාරයට පෙම්වතිය යැයි කියන අය රැඳී සිටින බොරැල්ල ප්‍රදේශයේ නිවසට ගොස් පරීක්ෂා කර බැලීමේදී එම නිවසේ සිටි කිසිවකු එම දරුවා නොහදුනන බව පොලිසිය අධිකරණයට සඳහන් කළේය. දරුවාගේ දෙමාපියන් කවුරුන්දැයි විමසීමේදී ලබාදුන් ලිපිනයට ඔහු සමඟ ගොස් පරීක්ෂා කර කිසිදු අයකු ඔහු නොහදුනන බව ද පොලිසිය අධිකරණයට දැනුම් දුන්නේය. ඉදිරිපත් වූ කරුණු සැලකිල්ලට ගත් අධිකරණය දරුවා පොලිසිය භාරයේ ප්‍රතිකාර සඳහා රඳවා තබන ලෙසට නියම කරමින් නඩුව කල් තැබුවේය.
නිමන්ති රණසිංහ
