කතරගම ඇසළ මංගල්‍යය ආරම්භවීමත් සමඟ කතරගම දේවාලයේ පාරම්පරික කපු පරම්පරා දෙකක් අතර පවතින ගැටුමක් උත්සන්න වීමෙන් නැවත අර්බුදයක් නිර්මාණය වී තිබේ.
එහි ප්‍රතිඵලයක් ලෙස කපු මහතුන් දෙදෙනෙක් අතර ගැටුමක් පෙරේදා (30) සවස හටගෙන ඇතැයි පොලිසිය කියයි. එහිදී කපු මහතකුට පහරදී තුවාල සිදු කිරීමක් සම්බන්ධයෙන් තවත් කපු මහතකු කතරගම පොලිසියේ නිලධාරීන් ඊයේ (01) අත්අඩංගුවට ගෙන ඇත. මෙසේ පහරදී ඇත්තේ දේවාලයට පැමිණි රත්නායක කපු පරපුරට අයත් කපු මහතකුට මෙම මාසයේ දේවාලයේ භාරකාරිත්වය දරන කපු මහතකි. ගයන් ආරාපක්ෂ කපු මහතා පහරදුන් බව පවසා උපුල් රත්නායක කපු මහතා කතරගම රෝහලට ඇතුළු වී ප්‍රතිකාර ගත් බව පොලිසිය කියයි.
තමන්ට කළ පහරදීම ගැන උපුල් රත්නායක මහතා කතරගම පොලිසියේ පැමිණිල්ලක්ද දමා තිබේ. ඒ අනුව අත්අඩංගුවට ගෙන ඇත්තේ පහරදීමට සම්බන්ධ කපු මහතා බව පොලිසිය කියයි. මේ වන විට රුහුණු මහා කතරගම දේවාලයේ තේවා කටයුතු සිදු කරන කපු පරම්පරා 03 කි. රත්නායක පරපුර, ආරාපක්ෂ පරපුර, මුණසිංහ පරපුර එම කපු පරපුරු තුනය. අතීතයේ අදිකාරම් පරපුර දේවාලයේ සේවය කර තිබේ. මෙම කපුමහතුන් අතර පවතින ගැටුම දේවාලයේ ආරක්ෂාවට ද තර්ජනයක් බවට පත්වෙමින් පවතී. කතරගම පොලිසිය මේ සම්බන්ධයෙන් පරික්ෂණ ආරම්භ කර ඇති බව පොලිසිය සඳහන් කළේය. අත්අඩංගුවට ගත් කපු මහතා අධිකරණයට ඉදිරිපත් කිරීමට නියමිතව තිබුණි.
