සෞඛ්‍ය අමාත්‍යාංශයේ සැබෑ ලෙසම හිඟයක් නොතිබූ ඖෂධ ගණනාවක හිඟයක් ඇති බවට කරුණු සඳහන් කැබිනට් පත්‍රිකාවක් ඉදිරිපත් කරමින් හිටපු සෞඛ්‍ය ඇමැති කෙහෙළිය රඹුක්වැල්ල මහතා කැබිනට් මණ්ඩලය නොමඟ යැවීමට කටයුතු කර ඇති අතර ප්‍රසම්පාදන ක්‍රියාවලිය උල්ලංඝනය කර ඇතැයි නීතිපතිවරයා අභියාචනාධිකරණයට ඊයේ (01) දන්වා සිටියේය.
ප්‍රමිතියෙන් තොර හියුමන් ඉමියුනොග්ලොබියුලින් එන්නත් මිලදී ගැනීමේ සිද්ධියට අදාළ නඩු විභාගය අවසන් වන තෙක් තමන් රක්ෂිත බන්ධනාගාරගත කිරීමට මාලිගාකන්ද මහේස්ත්‍රාත්වරිය ලබා දුන් නියෝගය බල රහිත කරන ලෙස ඉල්ලා ගොනු කළ රිට් පෙත්සමක් විභාගය සඳහා කැඳවූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් නිර්මලන් විග්නේෂ්වරන් මහතා මේ බව සඳහන් කළේය.
අභියාචනාධිකරණ සභාපති විනිසුරු නිශ්ශංක බන්දුල කරුණාරත්න මහතා සහ අභියාචනාධිකරණ විනිසුරු ශෂී මහේන්ද්‍රන් මහතා හමුවේ මෙම පෙත්සම කැඳවන ලදි.
එහිදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් නිර්මලන් විග්නේෂ්වරන් මහතා දීර්ඝ ලෙස කරුණු ඉදිරිපත් කරමින් පෙත්සමට එරෙහිව විරෝධතා ඉදිරිපත් කළේය.
මෙහිදී ඉදිරිපත් වූ කරුණු සලකා බැලූ විනිසුරු මඬුල්ල පෙත්සම සම්බන්ධයෙන් වැඩිදුර කරුණු සලකා බැලීම අද (02) දින සිදු කිරීමට නියම කළේය.
මෙම පෙත්සමෙහි වගඋත්තරකරුවන් ලෙස මාලිගාකන්ද මහේස්ත්‍රාත්වරිය, එම අධිකරණයේ රෙජිස්ට්‍රාර්වරයා, පොලිස්පති දේශබන්දු තෙන්නකෝන් මහතා, අපරාධ පරීක්ෂණ දෙපාර්තමේන්තුවේ අධ්‍යක්ෂවරයා, නීතිපතිවරයා ඇතුළු පිරිසක් නම් කර සිටිති. ජනාධිපති නීතිඥ ෆායිස් මුස්තාපා නීතිඥ කීර්ති තිලකරත්න, මෙහෙරාන් කරීම් යන නීතිවේදීහූ පෙත්සම්කරු වෙනුවෙන් පෙනී සිටියහ. නියෝජ්‍ය සොලිසිටර් ජනරාල් ලක්මිණී ගිරිහාගම මෙනෙවිය නීතිපතිවරයා වෙනුවෙන් පෙනී සිටියාය.
නෙල්කා මැදගෙදර
