ශ්රී ලංකා පොදුජන පෙරමුණේ අනුරාධපුර දිස්ත්රික් හිටපු පාර්ලිමේන්තු මන්ත්රී ප්රවීණ රංගන ශිල්පි උද්දික ප්රේමරත්න මහතා ගමන් ගත් මෝටර් රථයට වෙඩි ප්රහාර දෙකක් එල්ල කළ දිනයේ ඒ ආසන්නයෙන් සුදු පැහැති මෝටර් රථයක් ගමන් ගන්නා අයුරු සටහන්ව ඇති සීසීටීවී දර්ශන රජයේ රස පරීක්ෂකවරයා වෙත යවා ඊට අදාළ වාර්තාව නොපමාව අධිකරණයට කැඳවන ලෙස අනුරාධපුර ප්රධාන මහේස්ත්රාත් සහ අතිරේක දිසා විනිසුරු නාලක සංජීව ජයසූරිය මහතා අපරාධ පරීක්ෂණ දෙපාර්තමේන්තුවට නියෝග කළේය.
මෙසේ නියෝග කළේ හිටපු පාර්ලිමේන්තු මන්ත්රී උද්දික ප්රේමරත්න මහතා ගමන් ගත් මෝටර් රථයට වෙඩි ප්රහාර දෙකක් එල්ල කිරීමේ සිද්ධියට අදාළ නඩුව අපරාධ පරීක්ෂණ දෙපාර්තමේන්තුව මෝසමක් මඟින් කැඳවා වැඩිදුර වාර්තාවක් මඟින් අධිකරණයට කළ කරුණු දැක්වීමක් සැලකිල්ලට ගනිමිනි. ඒ අනුව අදාළ වැඩිදුර වාර්තාව මඟින් අපරාධ පරීක්ෂණ දෙපාර්තමේන්තුව අධිකරණයට පවසා සිටියේ හිටපු පාර්ලිමේන්තු මන්ත්රි උද්දික ප්රේමරත්න මහතා ගමන් ගත් මෝටර් රථයට වෙඩි ප්රහාර දෙකක් එල්ල වූ දිනයේ ඒ ආසන්නයේ මාර්ගයක සුදු පැහැති මෝටර් රථයක් ගමන් ගන්නා අයුරු සීසීටීවී කැමරාවක සටහන්ව ඇති බවයි. එම සීසීටීවී දර්ශනවල සටහන්ව ඇති මේ සුදු පැහැති මෝටර් රථය අදාළ වෙඩි ප්රහාරය එල්ල කිරීමට සැකකරුවන් පැමිණි මෝටර් රථය බවට සැක කරන්නේ යැයිද? අධිකරණයට දැනුම් දුන් අපරාධ පරීක්ෂණ දෙපාර්තමේන්තුව එහෙත් ස්ථීරවම ඒ බව තහවුරු කර ගැනීමට තරම් අදාළ සීසීටීවී දර්ශන පැහැදිලි තත්ත්වයේ නොපවතින බවද කියා සිටියේය. එම නිසා අදාළ සීසීටීවී දර්ශන රජයේ රස පරීක්ෂකවරයා වත යවා වාර්තාවක් කැඳවීමට අවශ්ය බැවින් ඒ සඳහා අධිකරණයේ අවසරය දෙන ලෙසද ඉල්ලා සිටියේය. අපරාධ පරීක්ෂණ දෙපාර්තමේන්තුවේ එම ඉල්ලීමට අධිකරණයේ අවසරය දුන් ප්රධාන මහේස්ත්රාත්වරයා එකී රස පරීක්ෂක වාර්තාව සහ විමර්ශනවල ප්රගතිය දැක්වෙන වාර්තාවක් නොපමාව අධිකරණයට ඉදිරිපත් කරන ලෙසට ද නියෝග කෙරිණ.
මේ අතර මේ වෙඩි තැබීමට යොදා ගත් බවට සැක කෙරෙන අනුරාධපුරයේ හිටපු සහකාර පොලිස් අධිකාරිවරයකු පරිහරණය කළ ශ්රී ලංකා පොලිස් දෙපාර්තමේන්තුවට අයත් පිස්තෝලය සහ වෙඩි තැබීම කළ ස්ථානයේ තිබී සොයා ගත් පිස්තෝලය හිස් උණ්ඩ මීට පෙර අධිකරණ නියෝග මත රජයේ රස පරීක්ෂකවරයා වෙත යවනු ලැබීය.
එළෙස යැවුණේ අනුරාධපුර දිස්ත්රික් හිටපු පාර්ලිමේන්තු මන්ත්රී උද්දික ප්රේමරත්න මහතාට වෙඩි තැබීමට යොදාගෙන ඇත්තේ අනුරාධපුර හිටපු සහකාර පොලිස් අධිකාරිවරයකුට ශ්රී ලංකා පොලිස් දෙපාර්තමේන්තුව මඟින් නිකුත් කර තිබූ රාජකාරි පිස්තෝලයෙන් බවට මේ සිද්ධිය සම්බන්ධයෙන් කළ පුළුල් විමර්ශනයේදී අනාවරණ වී ඇති බවට අපරාධ පරීක්ෂණ දෙපාර්තමේන්තුව අධිකරණයට දැනුම් දුන් අවස්ථාවේදීය. වෙඩි තැබීම හිටපු පාර්ලිමේන්තු මන්ත්රී උද්දික ප්රේමරත්න සහ අනුරාධපුර හිටපු සහකාර පොලිස් අධිකාරිවරයකු සැලසුම් සහගතව සිදු කර ගත් එකක් බවට කරුණු අනාවරණ වෙමින් පවතින බව ද අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය. ඒ අනුව ඉදිරි විමර්ශන කටයුතු සඳහා අදාළ පිස්තෝලය සිය භාරයට ගෙන විමර්ශන අරඹා වැදගත් තොරතුරු රැසක් හෙළි කර ගත් බවද පවසා සිටි අපරාධ පරීක්ෂණ දෙපාර්තමේන්තුව වෙඩි තැබීමේ සිද්ධියට සම්බන්ධ සැකකරුවන් ඉදිරියේදී අත්අඩංගුවට ගෙන අධිකරණයට ඉදිරිපත් කරන බවද කීය.
මේ වෙඩි තැබීමේ සිද්ධියට අදාළ විමර්ශනයේදී අපරාධ පරීක්ෂණ දෙපාර්තමේන්තුව විසින් අනුරාධපුර හිටපු සහකාර පොලිස් අධිකාරිවරයකු පරිහරණය කළ පිස්තෝලය සිය භාරයට ගැනීමත් සමඟ සහකාර පොලිස් අධිකාරිවරයා ඉකුත් 12දා රාත්රියේ මැලේසියාවට පිටත්ව ගොස් ඇති බව පොලිස් මාධ්ය ප්රකාශක නියෝජ්ය පොලිස්පති නීතිඥ නිහාල් තල්දූව මහතා මාධ්ය හමුවකදී මීට පෙර ප්රකාශ කළේය. ඔහු එසේ මැලේසියාවට ගොස් ඇත්තේ පොලිස් දෙපාර්තමේන්තුවෙන් කිසිම අවසරයක් නොගෙන බව ද එහිදී සඳහන් කළ මාධ්ය ප්රකාශකවරයා සිය රාජකාරි පිස්තෝලය කටුනායක ගුවන් තොටුපොළේදී වෙනත් පුද්ගලයකුට භාරදී ඔහු මෙලෙස මැලේසියාවට ගොස් ඇති බවත් සිය රාජකාරි පිස්තෝලය අන්සතු කිරීම දඬුවම් ලැබිය හැකි වරදක් බව ද පවසා සිටියේය.
වෙඩි තැබීමට අදාළව අධිකරණ නියෝග මත රජයේ රස පරීක්ෂකවරයා වෙත දැනට යවා ඇති සීසීටීවී කැමරා සංඛ්යාව 12කි. ඒ කිසිදු කැමරාවක අදාළ වෙඩි තැබීම සිදු වන අයුරු සටහන්ව නැති බව විමර්ශනවලදී හෙළි කර ගැණින. හිටපු පාර්ලිමේන්තු මන්ත්රී උද්දික ප්රේමරත්න මහතාගේ ආරක්ෂාවට යොදවා සිටි ප්රභූ ආරක්ෂක අංශයට අනුයුක්ත පොලිස් නිලධාරීන් දෙදෙනාට නිකුත් කර ඇති පැති අවි දෙකින් (පිස්තෝල දෙකෙන්) වෙඩි ප්රහාර එල්ල කර ඇද්ද? යන්න අනාවරණය කර ගැනීම සඳහා එම පැති අවි දෙකද (පිස්තෝල දෙක) රජයේ රස පරීක්ෂකවරයා වෙත අධිකරණ නියෝග මීට පෙර යැවිණ.
අනුරාධපුර - උපාලි ආනන්ද