දකුණුදිග පාකිස්තානයේ කුවේටා ප්‍රාන්තයට ඇද හැලෙන ධාරානිපාත වර්ෂාව හේතුවෙන් උද්ගත වූ ගංවතුරට හසුවීමෙන් පුද්ගලයන් 7 දෙනකු ජීවිතක්ෂයට පත් වී ඇතැයි එරට මාධ්‍ය වාර්තා කළේය. මියගිය අය අතර දරුවන් දෙදෙනකු ද සිටින බව පාකිස්තාන මාධ්‍ය වැඩිදුරටත් වාර්තා කළේය. තවත් පුද්ගලයන් 25කට වැඩි සංඛ්‍යාවක් තුවාල ලබා ඇතැයි ද වාර්තා වේ. නිවාසවල වහල කඩා වැටීමෙන් හිසට දරුණු තුවාල සිදුවීම නිසා 6 දෙනකුගේ තත්ත්වය බරපතළ බවත් පාකිස්තාන මාධ්‍ය සඳහන් කළේය.
ඉන් වැඩිම හානිය සිදුවී ඇත්තේ කුවේටා ප්‍රාන්තයේ ඩේරා බග්ටි දිස්ත්‍රික්කයට බවත්, එම දිස්ත්‍රික්කයට බලපෑ අධික වර්ෂාවෙන් නිවාස රැසක් විනාශ වී ඇතැයි ද, ගංවතුර අවදානම හේතුවෙන් තවත් නිවාස රැසක පුද්ගලයන් ඉවත් කිරිමට ආපදා කළමනාකරණ ඒකකය පියවර ගෙන ඇතැයි ද වැඩිදුරටත් වාර්තා වේ.
වසර 2022 දී පාකිස්තානයේ හටගත් දරුණු ගංවතුර තත්ත්වය හේතුවෙන් පුද්ගලයන් 1,700කට දිවි අහිමි වූ අතර, එම ස්වභාවික ආපදාව හේතුවෙන් පාකිස්තාන රජයට අමෙරිකානු ඩොලර් 35ක ආර්ථික පාඩුවක් සිදුවූ බවට ද ඇස්තමේන්තු කර තිබිණි.
