ප්රින්ස් ගුණසේකර
ශ්රී ලංකා මෝටර් රථ ක්රීඩා සම්මේලනයේ ඉදිරි නිලවරණයේදී ජාතික මෝටර් රථ ක්රීඩා තරගකරුවන්ට සහ ඔවුන්ගේ සමීපතම පවුලේ සාමාජිකයන්ට නිලතල දැරීම නුසුදුසු බවට ක්රීඩා අධ්යක්ෂ ජනරාල් මහාචාර්ය (රියර් අද්මිරාල්) ෂේමාල් ප්රනාන්දු මහතා ලිඛිත නියෝගයක් නිකුත් කරයි. වත්මන් වර්ෂය සඳහා ජාතික මෝටර් රථ ක්රීඩා බලපත්රයක් ඇති හෝ පසුගිය මාස 12 තුළ ජාතික ඉසව්වලට සහභාගි වූ තරගකරුවන් හෝ එම තරගකරුවන්ගේ මවුපියන්, සහෝදර සහෝදරියන් සහ එවැනි ඕනෑම පුද්ගලයකුට ඉදිරි නිලවරණයට නාමයෝජනා ලබාදීම නුසුදුසු බව එමඟින් දැනුම්දී තිබේ.
ශ්රී ලංකා මෝටර් රථ ක්රීඩා සම්මේලනයේ ඉදිරි නිලවරණය සඳහා නාමයෝජනා භාර ගැනීම පසුගියදා සිදු කළ අතර, එහිදී මේ තීරණයට ඇතැම් පිරිස් විරෝධය පළ කොට ඇතැයි වාර්තා වේ. එහෙත් ශ්රී ලංකා මෝටර් රථ ක්රීඩා පරිපාලනයේ සාධාරණත්වය තහවුරු කිරීම උදෙසා, ක්රීඩා ඇමැති හරින් ප්රනාන්දු මහතා විසින් ක්රීඩා නිලවරණ සාධාරණ සහ විනිවිද භාවයකින් යුක්තව පැවැත්වීම උදෙසා අධ්යක්ෂ ජනරාල්වරයාට බලය පවරමින් නිකුත් කළ අංක 2382/32 දරන අතිවිශේෂ ගැසට් පත්රයේ ප්රතිපාදන අනුව මෝටර් රථ ක්රීඩා අනුබද්ධ සංගම් වෙත මෙම දැනුම්දීම කළ බව ක්රීඩා අධ්යක්ෂ ජනරාල්වරයා ‘දිනමිණ’ට පැවසීය.
ශ්රී ලංකා මෝටර් රථ ක්රීඩා සම්මේලන නිලවරණයේදී ඡන්ද අයිතිය හිමි ක්රීඩා සංගම් 11ක නිලධාරීන්ට මේ බව ලිඛිතව දැනුම්දී ඇති හෙයින් එහි අඛණ්ඩතාව සහ විනිවිදභාවය සහතික කිරීමට ඔවුන් කැපවනු ඇතැයි ක්රීඩා අධ්යක්ෂ ජනරාල්වරයාගේ විශ්වාසයවී තිබේ. මේ තීරණාත්මක පියවරට අනුකූල නොවන අයගේ නාමයෝජනා අවලංගු වනු ඇතැයි හෙතෙම සඳහන් කළේය.
නිලවරණ කමිටු හඳුන්වා දෙමින් පසුගියදා පැවති විශේෂ මහා සභා රැස්වීම්වලදී කිසිදු විරෝධතාවක් එල්ල නොවූ ජාතික ක්රීඩා සංගම් හතරෙන් තුනක නිලවරණ පැවැත්වීමට ක්රීඩා සංවර්ධන දෙපාර්තමේන්තුව පසුගියදා දින නියම කළේය. ඒ අනුව නෙට්බෝල්, පාපැදි හා ශ්රී ලංකා මෝටර් රථ ක්රීඩා සංගම්වල නිලවරණ ලබන මස 24 හා 25 දිනවලදී ක්රීඩා අමාත්යාංශ ඩන්කන් වයිට් ශ්රවණාගාරයේදී පැවැත්වේ.
දශක දෙකකට ආසන්න කාලයක් ශ්රී ලංකා මෝටර් රථ ක්රීඩා සම්මේලනයේ පරිපාලනය එකම පිරිසක් අතර බෙදී ගිය බවට ඇතැම් සාමාජික සංගම්වලින් චෝදනා එල්ලවී තිබිණි. තවද එම නිලධාරීන්ම තරගවලට ඉදිරිපත්වී මුදල් තෑගි බෙදා ගන්නා බවට එල්ල වූ තවත් චෝදනාවකි. එපමණක් නොව, මෝටර් රථ ක්රීඩා අංශය තුළ කිසිදු ක්රියාකාරීත්වයක් නොමැති ඊනියා ‘කඩදාසි ක්රීඩා සංගම්’ පහක පැවැත්ම ද අභියෝගයට ලක්විය.