අර්ධ ශතක 3ක් සමඟ පිතිකරුවන් දැක්වූ විශිෂ්ට දස්කම් හේතුවෙන් එංගලන්ත යොවුන් කණ්ඩායමට එරෙහිව පැවැති පළමු එක්දින තරගයෙන් ලකුණු 65ක විශිෂ්ට ජයක් හිමි කර ගැනීමට සංචාරක ශ්රී ලංකා අවුරුදු 19න් පහළ කණ්ඩායම සමත් විය.
![මහිත් පෙරේරා](https://www.dinamina.lk/wp-content/uploads/2024/06/12-2-6.jpg)
මහිත් පෙරේරා
මේ සමඟ තරග 3කින් සමන්විත එක්දින තරගාවලිය 1-0ක් ලෙස පෙරමුණ ගැනීමට ද ශ්රී ලංකා යොවුන් ක්රීඩකයෝ සමත් වූහ.
චෙල්ම්ස්ෆර්ඩ්හිදී පැවැති තරගයේ පළමුව පන්දුවට පහරදුන් ශ්රී ලංකා ක්රීඩකයෝ කඩුලු 6ක් දැවී ලකුණු 294ක් රැස් කළ අතර, එම ඉලක්කය හඹාගිය එංගලන්ත යොවුන් පිලට ඕවර 43.3කදී සියල්ලන් දැවී රැස් කළ හැකි වූයේ ලකුණු 229ක් පමණි. නෝවා තායින් (58) සහ ලූක් බෙන්කන්ස්ටයින් (51) අර්ධ ශතක රැස් කරමින් කණ්ඩායම ජයග්රහණය කරා ගෙන යෑමට උත්සාහ කළේ සිවුවැනි කඩුල්ලට ලකුණු 90ක සබඳතාවක් ගොඩනඟමිනි. කෙසේ වෙතත් ශ්රී ලංකා පන්දු යවන්නන් හමුවේ එය අසාර්ථක විය. ශ්රී ලංකා සම්භවයක් සහිත කේෂණ පෙරේරා එංගලන්ත ඉනිම ආරම්භ කළ ද ඔහුට රැස් කළ හැකි වූයේ ලකුණු 25ක් පමණි.
පන්දු යැවීමේදී විහස් තෙව්මික කඩුලු 3ක් බිඳ දැමූ අතර, හිවින් කෙනුල, තිසර ඒකනායක හා ප්රවීන් මනීෂ කඩුලු 2 බැගින් දවා ගත්හ.
ශ්රී ලංකා ඉනිමේ මුල් පෙළ කඩුලු 3ක් ලකුණු 67ක් වෙද්දී බිඳ වැටුණ ද ශාරුජන් සන්මුගනාදන් නායක දිනුර කළුපහන සමඟ එක්ව සිවුවැනි කඩුල්ලට පන්දු 91කින් ලකණු 73ක් එක් කළ අතර, මුළු ලකුණු 138දී දිනුර අවාසනාවන්ත ලෙස දැවී ගියේ අර්ධ ශතකයට ලකුණක් පසුපසින් සිටියදීය. ඉන් පසු අංක 6 පිතිකරු ලෙස පිටියට පිවිසි මහිත් පෙරේරා අර්ධ ශතක සබඳතා දෙකක් ගොඩනඟමින් ඉනිම ඉහළ නැංවීමට දායක විය.
![දිනිරු අබේවික්රමසිංහ](https://www.dinamina.lk/wp-content/uploads/2024/06/12-3-6.jpg)
දිනිරු
අබේවික්රමසිංහ
ශාරුජන් සමඟින් 5 වැනි කඩුල්ලට පන්දු 59කින් ලකුණු 67ක් එක් කළ මහිත් සමඟ 6 වැනි කඩුල්ලට එක්වූ දිනිරු අබේවික්රමසිංහ පන්දු 68කින් ලකුණු 89ක් ගොඩනඟමින් ශ්රී ලංකා ඉනිම ලකුණු 300 අබියසට රැගෙන ගියේය. ශාරුජන් පන්දු 75කදී හතරේ පහර 7ක් සමඟින් ලකුණු 57ක් රැස් කළ අතර, දිනිරු වේගවත් ඉනිමක් ක්රීඩා කරමින් හතරේ සහ හයේ පහර 2 බැගින් එල්ල කරමින් ලකුණු 52ක් රැස් කළ අතර, ඔහු වැය කළේ පන්දු 37ක් පමණි. මහිත් පන්දු 60කදී හතරේ පහර 4ක් සහ හයේ පහරක් සමඟින් ලකුණු 58ක් රැස් කරමින් ඉනිම නිමා වන විටත් නොදැවී සිටියේය. පුහුණු තරගයේදී විශිෂ්ට ශතකයක් රැස් කළ පුලිඳු පෙරේරාට මේ තරගයේදී රැස් කළ හැකි වූයේ ලකුණු 19ක් පමණි. මහිත් සහ දිනිරු මේ තරගයේදී සිය මංගල එක්දින අර්ධ ශතක වාර්තා කිරීම කැපී පෙනිණි.
මේ තරගයේදී දිනිරු අබේවික්රමසිංහ, මහිත් පෙරේරා, දුමින්ද සෙව්මිණ, ගයන වීරසිංහ, හිවින් කෙනුල, ප්රවීන් මනීෂ සහ තිසර ඒකානයක ශ්රී ලංකාව වෙනුවෙන් යොවුන් එක්දින තරග වරම් හිමි කර ගත්හ.
දෙපිල අතර දෙවැනි එක්දින තරගය අද (1) හෝව්හිදී පැවැත්වේ.
ශ්රී ලංකා යොවුන් පිල – 294/6යි. (ඕවර 50) මහිත් පෙරේරා නොදැවී 58, ශාරුජන් ෂන්මුගනාදන් 57, දිනිරු අබේවික්රමසිංහ 52, දිනුර කළුපහන 49, පුලිඳු පෙරේරා 19 (නෝවා කෝන්වෙල් 54/3)
එංගලන්ත යොවුන් පිල – 229යි. (ඕවර 43.3) නෝවා තායින් 58, ලූක් බෙන්කන්ස්ටයින් 51, හැරී මෝ 26, කේෂන ෆොන්සේකා 25 (විහස් තෙව්මික 37/3, හිවින් කෙනුල 28/2, තිසර ඒකනායක 48/2, ප්රවීන් මනීෂ 50/2, දිනුර කළුපහන 24/1)
නිරෝෂාන් ප්රියංකර