නවවැනි වරට පැවති විස්සයි20 ලෝක කුසලාන ක්‍රිකට් තරගාවලියේ අපරාජිතයන් ලෙස වසර 17කට පසු ශූරතාව දිනා ගැනීමට ඉන්දියාව සමත් විය.
ක්‍රිකට් පිටියේ අවාසනාවන්ත කණ්ඩායමක් ලෙස නම් දරා සිටින දකුණු අප්‍රිකාවට ඉන්දියාව හමුවේ ලකුණු 7කින් පරාජය වීමෙන් මෙවර අනුශූරතාවයෙන් සෑහීමට සිදු විය. සිය ක්‍රිකට් තරග ඉතිහාසයේ දකුණු අප්‍රිකානුවන් ඕනෑම ආකෘතියකින් අවසන් තරගයකට එක් වූ පළමු අවස්ථාව මෙය වීම විශේෂත්වයකි.
මේ දෙපිලම අපරාජිතයන් ලෙස අවසන් තරගයට එක්වූ අතර, ඒ අනුව ශූරතාව දිනාගත් ඉන්දීය කණ්ඩායම විස්සයි20 ලෝක කුසලාන තරග බිමේ අපරාජිතව ශූරතාව දිනාගත් පළමු කණ්ඩායම ලෙස ඉතිහාසයට එක්විය.
ඉන්දියාව මේ ශූරතාව දිනාගත්තේ දෙවැනි වරට වන අතර, මින් පෙර විස්සයි20 ලෝක කුසලාන තරගාවලිය ආරම්භ වූ 2007 වසරේ ඔවුන් ශූරතාව දිනා තිබේ.
මේ සමඟ දෙවරක් විස්සයි20 ලෝක කුසලානය දිනාගත් තෙවැනි කණ්ඩායම බවට ඉන්දියාව පත්විය. මින් පෙර බටහිර ඉන්දීය කොදෙව් පිල (2012 හා 2016) සහ එංගලන්තය (2010 සහ 2022) දෙවරක් ශූරතාව දිනා තිබේ.
බාබඩෝස්හි කෙන්සිංටන් ඕවල් පිටියේ පැවති අවසන් තරගයේ පළමුව පන්දුවට පහරදුන් ඉන්දියාව කඩුලු 7ක් දැවී රැස් කළ ලකුණු 176 හඹාගිය දකුණු අප්‍රිකාවට ඕවර 20 අවසානයේ කඩුලු 8ක් දැවී රැස් කළ හැකි වූයේ ලකුණු 169ක් පමණි.
මෙවර තරගාවලියේ අවසන් තරගය තෙක් ලකුණු අතරට පිවිසීමට අසමත් වූ විරාට් කෝලි අවසන් තරගයේදී විශිෂ්ට ඉනිමක් ක්‍රීඩා කරමින් ලකුණු 76ක් රැස් කළේ පන්දු 59කදී හතරේ පහර 6ක් සහ හයේ පහර 2ක් සමඟිනි. දකුණු අප්‍රිකාව වෙනුවෙන් හෙන්රිච් ක්ලාසෙන් පන්දු 27කින් වේගවත් ලකුණු 52ක් රැස් කළ ද ඔහු දැවී යෑමත් සමඟ දකුණු අප්‍රිකාවෙන් ජය ගිලිහී ගියේය.
අවසන් තරගයේ වීරයා ලෙස විරාට් කෝලි සම්මාන දිනාගත් අතර, තරගාවලියේ වීරයා සම්මානය ජස්ප්‍රීට් බුම්රාට හිමි විය. ඔහු තරගාවලිය පුරා කඩුලු 15ක් දවා ගැනීමට සමත් විය. තරගාවලියේ වැඩිම කඩුලුලාභියා වූ ඇෆ්ගනිස්තානයේ ෆසල්හක් ෆාරුකි සහ අර්ෂ්දීප් සිං කඩුලු 17 බැගින් බිඳ හෙළා තිබිණි.
