විස්සයි20 ලෝක කුසලානය දිනූ ඉන්දීය කණ්ඩායමේ නායක රෝහිත් ශර්මා සහ කණ්ඩායමේ ජ්යෙෂ්ඨතම ක්රීඩකයකු වූ සුපිරි පිතිකරු විරාට් කෝලි ජාත්යන්තර ක්රිකට් පිටියට සමුදීමට තීරණය කර තිබේ.
ලෝක කුසලාන අවසන් තරගයෙන් අනතුරුව පළමුව විරාට් කෝලිත්, පසුව රෝහිත් ශර්මාත් මාධ්ය වෙත අදහස් දක්වමින් සිය සමුගැනීම් ප්රකාශ කළහ.
මෙය ඔවුන්ට ලබාගැනීමට අවශ්ය වූ දෙය බවත්, මේ තමාගේ අවසන් විස්සයි20 ලෝක කුසලාන තරගාවලිය මෙන්ම විස්සයි20 තරගාවලිය ද වන බව කී 35 හැවිරිදි කෝලි මෙවර ශූරතාව දිනුවත් පැරදුණත් මේ තීරණය ගැනීමට සූදානමින් සිටි බව ද කීය.
2010 වසරේ ජාත්යන්තර විස්සයි20ට පිවිසි කෝලි වසර 14ක තරග දිවිය නිමා කළේ තරග 125කදී ලකුණු 4188ක් රැස් කරමිනි. ඊට ශතකයක් සහ අර්ධ ශතක 38ක් ඇතුළත් වූ අතර, ඔහු විස්සයි20 ජාත්යන්තර ක්රිකට් පිටියේ දෙවැනි වැඩිම ලකුණුලාභියා වූයේ නායක රෝහිත් ශර්මාට පමණක් දෙවැනි වෙමිනි. කෝලි 2014 සහ 2016 විස්සයි20 ලෝක කුසලාන තරගාවලි ද්විත්වයේදීම තරගාවලියේ වීරයා ලෙස සම්මාන දිනා ගැනීම විශේෂත්වයකි.
කෝලිට පසුව ශර්මා ද සිය සමුගැනීම ප්රකාශ කළ අතර, මෙය තමාගෙත් අවසන් විස්සයි20 තරගාවලිය බවත් මේ ආකෘතියෙන් සමුගැනීමට මීට වඩා හොඳ කාලයක් නැතැ බවත් කී රෝහිත් ශර්මා තමා ක්රිකට් දිවිය ආරම්භ කළ මේ ආකෘතියෙන්ම ලෝක කුසලානයක් දිනා ගැනීමට අවශ්ය වූ බවත් එය ඉටුවීම සතුටක් බවත් කීය.
2007 වසරේ ක්රිකට් පිටියට පිවිසි 37 හැවිරිදි ශර්මා තරග 159කදී ශතක 5ක් සහ අර්ධ ශතක 32ක් සමඟින් ලකුණු 4231ක් රැස් කර ඇත්තේ විස්සයි20 ජාත්යන්තර ක්රිකට් පිටියේ වැඩිම ලකුණුලාභියා ලෙසිනි.
ශර්මා සිය මංගල විස්සයි20 තරගයත් (2007 එංගලන්තයට එරෙහිව ඩර්බන්හිදී) අවසන් තරගයත් ලෝක කුසලාන තරගාලියකදී ක්රීඩා කිරීම විශේෂත්වයකි.
නිරෝෂාන් ප්රියංකර