මහමඟ ගමන් ගන්නා කාන්තාවන් ඇතුළු ජනතාවගේ බෙල්ලට කඩුවක් තබා මරණ බිය ඇති කර රන් ආභරණ කොල්ලකකෑමේ යෙදුණු කල්ලියකට සම්බන්ධ රන් ආබරණ වෙළෙඳසල් හිමියකු, කාන්තාවක ඇතුළු සිවු දෙනකු එසේ කොල්ලකෑ රන් ආභරණ කිහිපයක්, කඩුදෙකක් හා අත්බෝම්බයක් ද සමඟ පෙරේදා (29) අත්අඩංගුවට ගත් බව දිවුලපිටිය පොලිසිය කියයි.
කලක් තිස්සේ මරදගහමුල, දූනගහ අවට ගම්මානවල අතුරු මාර්ගවල පවා ගමන් ගත් කාන්තාවන්ගේ රන් ආභරණ සොයා ගැනීමේ සිද්ධීන් පිළිබඳ වාර්තා වීමත් නිසා දිවුලපිටිය පොලිසිය දැඩි විමසිල්ලෙන් සිටිය දී පල්ලියපිටිය ප්‍රදේශයේදී රන් දම්වැල් දෙකක් කඩාගෙන පලා යමින් සිටි යතුරුපැදියක් ලුහුබැඳ ගොස් ඇත.
පොලිස් කණ්ඩායම යතුරුපැදිය හඹා යද්දී බඩල්ගම පොලිස් වසමේ හොරකඳවිල ප්‍රදේශයේදී සැකකරුවන් දෙදෙනා ගමන් ගත් යතුරු පැදිය ලොරියක ගැටී පෙරළුණු අවස්ථාවේ ප්‍රදේශවාසී ජනතාවගේ ද සහයෙන් අත්අඩංගුවට ගෙන ඇත. යතුරු පැදියට ද බරපතළ හානි සිදුවී ඇත.
ඔවුන් කඩා ගත් රන්මාල මෙන්ම කාන්තාවන් බිය ගැනීමට යොදාගත් කඩු දෙකක් ද සැකකරුවන් සතුව තිබී හමු වී ඇති අතර ඔවුන් හැඳ සිටි කලිසම් සාක්කුවල තිබී හෙරොයින් මත්ද්‍රව්‍ය පැකට් කිහිපයක් ද සොයාගත් බව පොලිසිය කියයි. සැකකරුවන් ගමන් ගත් යතුරුපැදිය ද පොලිස් භාරයට ගෙන තිබේ. මෙසේ අත්අඩංගුවට ගෙන ඇත්තේ මිනුවන්ගොඩ, හොරම්පැල්ල ප්‍රදේශයේ තාවකාලිකව පදිංචිව සිටින මීරිගම, හල්පෙ පදිංචිකරුවකු සහ ජා ඇළ ප්‍රදේශයේ පදිංචිකරුවෙකි.
සැකකරුවන්ගෙන් කළ ප්‍රශ්න කිරීම්වලදී හෙළි වූ තොරතුරු අනුව එක් සැකකරුවකු හොරම්පැල්ලේ තාවකාලික පදිංචි නි‍ෙවසේ වැසිකිළිය අසල සඟවා තිබූ අත්බෝම්බයක් ද සොයාගැනීමට පොලිසියට හැකි වී ඇත.
මෙම සැකකරුවන් දෙදෙනා මෙසේ කාන්තාවන්ගෙන් පැහැරගන්නා රන්දම් වැල් හොරම්පැල්ලේ තාවකාලිකව පදිංචිව සිටින සැකකරු විසින් සහ හල්පේ පදිංචිව සිටින ඔහුගේ නැගණිය විසින් දිවුලපිටිය ප්‍රදේශයේ රන් භාණ්ඩ අලෙවිසලකට විකුණා ඇති බව අනාවරණය වී තිබේ.
ඒ අනුව අදාළ වෙළෙඳ ආයතනයේ හිමිකරුවකු ද අත්අඩංගුවට ගෙන ඇත. සැකකරුවන් විසින් ගෙනවිත් දුන් බව කියන සොරකම් දෙකකට අදාළ උණු කරන ලද රත්තරන් ප්‍රමාණයක් ද එම වෙළෙඳසලේ හිමිකරුගෙන් කළ ප්‍රශ්න කිරීම්වලින් පසු පොලිසියට සොයාගැනීමට හැකි වී ඇත.
ගත වූ කාලය සීමාවේදී සිදු වූ රන් භාණ්ඩ කොල්ලකෑම් නවයකට මෙම සැකකරුවන් සම්බන්ධ වී ඇති බවට පොලිසිය කරුණු හෙළි කරගෙන තිබේ.
එම සියලු රන් ආභරණ දිවුලපිටියේ වෙළෙඳ ආයතනයට විකුණූ බව ඔවුන් හෙළි කර ඇතත් එම වෙළෙඳ ආයතනයේ හිමිකාර සැකකරු පවසා ඇත්තේ සිද්ධීන් දෙකක දේපළ පමණක් මිලදී ගත් බව යැයි ද පොලිසිය සඳහන් කරයි.
මෙම සැකකරුවන් විසින් කොල්ලකා විකුණන ලද අනෙකුත් මංකොල්ලකෑම්වලට අදාළ රන්ආභරණ සොයා ගැනීම සඳහා ප්‍රධාන සැකකරුවන් දෙදෙනා රඳවා ගැනීමේ නියෝග යටතේ තබා තවදුරටත් ප්‍රශ්න කරන බව පොලිසිය කියයි.
සෙසු සැකකරු හා සැකකාරිය මිනුවන්ගොඩ මහෙස්ත්‍රාත් අධිකරණයට ඉදිරිපත් කිරීමට නියමිතව තිබිණි.
මීගමුව කොට්ඨාස භාර පොලිස් අධිකාරි එරික් පෙරේරා මහතාගේ උපදෙස් හා සහකාර පොලිස් අධිකාරි ඒ. එදිරිසිංහ මහතාගේ මෙහෙයවීම යටතේ දිවුලපිටිය පොලිස් ස්ථානාධිපති ප්‍රධාන පොලිස් පරීක්ෂක චන්ද්‍රසිරි හිරියාදෙණිය, අපරාධ විමර්ශන අංශයේ ස්ථානාධිපති පොලිස් පරීක්ෂක හේමාල් ලියනගේ, පොලිස් සැරයෙන් (32650) කුමාරතිලක, පොලිස් කොස්තාපල්වරුන් වන (72419) සඳරුවන්, (102390) දේශාන්, (102513) දිමුතු සහ කාන්තා පොලිස් කොස්තාපල් (6793) ශාලිකා යන නිලධාරීහු මෙම සිදුවීම් සම්බන්ධයෙන් තවදුරටත් පරීක්ෂණ පවත්වති.
ගම්පහ දිස්ත්‍රික් විශේෂ සිසිල ගුණතිලක කොටදෙණියාව සමූහ එම්. පුෂ්පකුමාර
