බකමුණ සොමියල් හංදියේ දී යතුරුපැදි දෙකක් එකට ගැටීමෙන් පාසල් සිසුවෙකු මියගොස් ඇති අතර තවත් තරුණයකු තුවාල ලබා බකමුණ රෝහලට ඇතුළත් කර ඇත.
යතුරුපැදි අනතුරින් මියගොස් ඇත්තේ නිකපිටිය ඉහළ නුගේ පාර පදිංචි වෙලන්ගහ වත්තේ ගෙදර ලකිඳු පින්සර නැමැති 18 හැවිරිදි බකමුණ මහසෙන් මහා විදුහලේ ඉගෙනුම ලබන සිසුවෙකි.
පෙරේදා උදේ මාතලේ පැවැති උපකාර පංතියකට සහභාගිවී නැවත බකමුණ නගරයට පැමිණ බකමුණ සිට නිකපිටිය නිවස බලා සැගල ගම්මානයේ පදිංචි හිතවතකු සමඟ පැමිණෙන අතරතුර සොමියල් හංදියේ දී මෙම අනතුර සිදුවි තිබේ. බකමුණ සිට පැමිණි යතුරුපැදිය පිටුපසින් පැමිණි මෙම මාර්ගයේම ගමන් ගත් වෙනත් යතුරුපැදියක ගැටී මියගිය තරුණයා යතුරුපැදියෙන් ඉවතට වැටි ඇති බවද යතුරෙපැදියෙන් මාර්ගයට වැටණු අවස්ථාවේ මාර්ගයේ ගමන් ගත් ලොරියක ගැටී තුවාල ලබා ඇති බව ද අනතුර පිළිබඳ පරීක්ෂණ පවත්වන බකමුණ පොලිසිය සඳහන් කළේය.
අනතුරින් තුවාල ලැබු ඔහු බකමුණ රෝහලට ඇතුළත් කළ පසු මියගොස් තිබේ. අනතුරින් තුවාල ලැබු සැගල ගම්මානයේ පදිංචි තරුණයා පොලොන්නරුව රෝහලට ඇතුළත් කර ඇත.
යතුරුපැදියේ ගැටුණු පිටුපසින් පැමිණි යතුරුපැදිය පැදවූ පුද්ගලයා සහ ලොරි රථයේ රියැදුරු බකමුණ පොලිසිය විසින් අත්අඩංගුවට ගෙන ඇත. බකමුණ පොලිසිය අනතුරු දෙක පිළිබඳ පරීක්ෂණ පවත්වයි.
ඇලහැර - සරත් වෙලගෙදර