මාතලේ ලග්ගල කළුගඟ ප්‍රදේශයේ මැණික් ව්‍යාපාරිකයෙකුගෙන් රුපියල් කෝටි දෙකක කප්පම් මුදලක් ලබා දෙන ලෙස ඩුබායිහි ජීවත්වන කඩුවෙල මුතු නමැති පාතාල කල්ලි සාමාජිකයා විසින් දුරකතනයෙන් කරන ලද තර්ජනයකට අනුව සිදු කරන ලද පරීක්ෂණයක දී ඔහුගේ අනියම් බිරිඳ උස්කැටකෙයියාව පමුණුගම, ප්‍රදේශයේ දී පෙරේදා (29) වන දින අත්අඩංගුවට ගත් බව ලග්ගල පොලිසිය පවසයි.
මාතලේ ලග්ගල කළුගඟ හත්තොට අමුණ ප්‍රදේශයේ ප්‍රසිද්ධ මැණික් ව්‍යාපාරිකයෙකුගෙන් රුපියල් කෝටි දෙකක කප්පම් මුදලක් ඉල්ලා තර්ජනය කර ඇති අතර එම මුදලින් අත්තිකාරමක් ලෙස රුපියල් 650000 ක මුදලක් උස්කැටකෙයියාව පමුණුගම ප්‍රදේශයේ පදිංචි කාන්තාවකගේ බැංකු ගිණුමකට තැන්පත් කර ඇති අතර ඒ පිළිබඳ මෙම මස (26) වන දින ලග්ගල පොලිසිය වෙත අදාළ ව්‍යාපාරිකයා විසින් පැමිණිලි කර තිබේ.
එම පැමිණිල්ලට අනුව සිදුකරන ලද විමර්ශනයේදී ඩුබායි රටෙහි ජීවත්වන කඩුවෙල මුතු නමැති පාතාල කල්ලි සාමාජිකයා විසින් මැණික් ව්‍යාපාරිකයාට දුරකතනයෙන් බැණ තර්ජනය කොට කප්පම් මුදල උස්වැටකෙයියාව පමුණුගම පදිංචි ඔහුගේ අනියම් බිරිඳගේ බැංකු ගිණුමට බැර කරන ලෙස ඉල්ලා ඇති බවට සිදු කරන ලද පරීක්ෂණයන්ගෙන් අනාවරණය වී ඇත.
අදාළ සැකකාර කාන්තාව 2021 වසරේදී ඩුබායි රටට ගොස් කඩුවෙල මුතු නමැත්තා සමඟ එකට ජීවත්වී නැවත 2023 අගදී ලංකාවට පැමිණ ඇති අතර ඇයට ජීවත්වීම සඳහා කඩුවෙල මුතු නමැත්තා මෙම කප්පම් මුදල් ඉල්ලා ඇති බවට පොලිසිය සැක කරනු ලබයි.
මෙම වැටලීම මාතලේ ජ්‍යෙෂ්ඨ පොලිස් අධිකාරී ලලිත් රෝහණ ගමගේ මහතාගේ මෙහෙයවීමෙන් ලග්ගල පොලිස් ස්ථානාධිපති ප්‍රධාන පොලිස් පරීක්ෂක ධම්මික පද්මරාජ අපරාධ අංශ ස්ථානාධිපති පොලිස් පරීක්ෂක චමින්ද , උප පොලිස් පරීක්ෂක රාජපක්ෂ පොලිස් සැරයන් වරුන් වන (14751) කුමාරසිංහ (21662) රංජිත් පොලිස් කොස්තාපල් (87174) රාජපක්ෂ හා කාන්තා පොලිස් කොස්තාපල් (12213) කෞශල්‍යා යන අය විසින් සිදු කර තිබේ.
අදාළ සිද්ධියට සම්බන්ධ ඩුබායි රටේ ජීවත් වන ප්‍රධාන සැකකරු අත්අඩංගුවට ගැනීමේ විමර්ශන කටයුතු සිදු කරන අතර අත්අඩංගුවට ගත් කාන්තාව ලග්ගල අධිකරණයට ඉදිරිපත් කිරීමට නියමිතය.
මාතලේ මධ්‍යම සමූහ
