පටු දේශපාලනික අරමුණුවලින් තොරව හුදෙක් රට ගැන සිතා කටයුතු කරන පිරිසක් අද ශ්‍රී ලංකා නිදහස් පක්ෂය ප්‍රමුඛ නව සන්ධානයට එකතු වී සිටින බව ශ්‍රී ලංකා නිදහස් පක්ෂයේ සභාපති වරාය හා සිවිල් ගුවන්සේවා අමාත්‍ය නිමල් සිරිපාල ද සිල්වා මහතා පැවැසීය.
මේ රටේ සෑම පක්ෂයක්ම දෙකට තුනට කැඩී බෙදී වෙන්වී තිබුණු අවස්ථාවක ශ්‍රී ලංකා නිදහස් පක්ෂය ප්‍රමුඛ නව සන්ධානය දේශපාලන එකමුතුභාවය පිළිබඳ නව අදහසක් රටට ඉදිරිපත් කර තිබෙන බව ද ඒ මහතා කීය.
ශ්‍රී ලංකා නිදහස් පක්ෂය ප්‍රමුඛ නව සන්ධානය මඟින් පවත්වනු ලබන මහජන රැලි මාලාවේ දෙවැනි රැලිය පෙරේදා (29) පස්වරුවේ වැල්ලවාය නගරයේදී පැවැත්වුණු අවස්ථාවේදී රැස්ව සිටි ජනකාය අමතමින් ඇමැතිවරයා මේ බව අවධාරණය කළේය.
කෘෂිකර්ම හා වැවිලි කර්මාන්ත අමාත්‍ය මහින්ද අමරවීර, රාජ්‍ය අමාත්‍යවරුන් වන ලසන්ත අලගියවන්න, එස්. වියාලේන්ද්‍රන්, චාමර සම්පත් දසනායක, පාර්ලිමේන්තු මන්ත්‍රීවරුන් වන ශ්‍රී ලංකා නිදහස් පක්ෂයේ මහලේකම් දුමින්ද දිසානායක, අනුර ප්‍රියදර්ශන යාපා, ජෝන් සෙනෙවිරත්න, නිමල් ලන්සා හා මෙම රැලිය සංවිධානය කළ රාජ්‍ය අමාත්‍ය හා මොනරාගල දිස්ත්‍රික් පාර්ලිමේන්තු මන්ත්‍රී ජගත් පුෂ්පකුමාර මහත්වරු ද හිටපු අමාත්‍යවරියක වන සුමේධා ජී. ජයසේන මහත්මිය ඇතුළු පිරිසක් ද මේ අවස්ථාවට සහභාගි වූහ.
මෙම රැස්වීම අමතා අැමැති නිමල් සිරිපාල ද සිල්වා මහතා මෙසේ ද පැවැසීය.
“අපට අවශ්‍ය වන්නේ මේ එකමුතුභාවය තුළින් රට ජයග්‍රහණය කරවන්න. මේ රට ආර්ථික හා දේශපාලනික අර්බුදයෙන් ගොඩ ගැනීමට නම් ශක්තිමත් දේශපාලන සන්ධානයක් අවශ්‍යයි. අද අප දෙන්නේ ඒ ශක්තියයි. අන්තවාදී වාම දේශපාලනය අද ලෝකය පිළි ගන්නේ නැහැ. ගොලීය දේශපාලනය තුළ ශ්‍රී ලංකාවේ අනන්‍යතාව ඔය අන්තවාදී දේශපාලනයෙන් තහවුරු කරන්න බැහැ. ඒ සඳහා ශක්තිමත් ආර්ථික හා දේශපාලන වැඩපිළිවෙළක් තිබිය යුතුයි.
පිකට් කළාට, උද්ඝෝෂණය කළාට, විරෝධතා පැවැත්වූවාට පිළිගත් ආර්ථික හා දේශපාලනික වැඩපිළිවෙළක් නැත්නම් මේ රට ගොඩගන්න බැහැ. ශ්‍රී ලංකා නිදහස් පක්ෂය ප්‍රමුඛ නව සන්ධානයේ අරමුණ ඒ සඳහා නායකත්වය දීමයි.”
රාජ්‍ය ඇමැති චාමර සම්පත් දසනායක මහතා.
“අද මේ පැවැත්වෙන රැලියේ වේදිකාව දිහා මම බැලුවා. මේකේ දැලි පිහියෙන් කිරි පැණි කාලා, වඳුරන්ගෙන් බණ අහලා, නේරංජනාවෙන් ගොඩවෙච්ච කට්ට වෙට්ට පිත්තල ඔක්කොම ඉන්නවා. මම එහෙම කියන්නේ වෙන එකක් නිසා නොවෙයි. කිසි දිනෙක මැතිවරණයකින් පරාජය නොවිච්ච පිරිසක් අද මෙතැන ඉන්නවා. ඒ නිසා මේ ඉන්න ජනගහනය දෙස බලපුවාම අපටත් ලොකු අභියෝගයක් තියෙනවා. මොකද මීළඟ රැස්වීම තියෙන්නේ බදුල්ලේ. අපට මීට වඩා ජනකායක් සහභාගි කරන්න සිදු වෙනවා. ඒ වගේම මට වැල්ලවාය ඡන්ද ප්‍රතිඵලය ගැනත් කියන්න වෙනවා. ගෝඨාභය මහත්තයා තරග කරපු ජනාධිපතිවරණයේදී වැල්ලවායෙන් සජිත්ට ඡන්ද 8000යි. හැබැයි ගෝඨාභය මහත්තයාට ඡන්ද 98,000යි. ඒ නිසා මොනරාගල දිස්ත්‍රික්කයේ වැල්ලවාය ආසනය කියන්නේ අප දිනවපු ආසනයක්. ඒකේ අයිතිකාරයා ජගත් පුෂ්පකුමාර මහත්තයා. ඒ නිසා මෙවර ප්‍රතිඵලයත් එහෙම තමයි කියලා අප දන්නවා.”
මන්ත්‍රී ජගත් පුෂ්පකුමාර මහතා,
“අද මේ වන විට මෙම රැලියට 35,000කට වැඩි පිරිසක් පැමිණ සිටින බවට මට තොරතුරු වාර්තා වෙනවා. මේ වගේ ජනගහනයක් මින් පෙර කවදාවත් මෙවැනි දේශපාලන රැලියකට මොනරාගල දිස්ත්‍රික්කයේ සහභාගි වෙලා නැහැ. තමුන්නාන්සේලා දන්නවා. මේ රැලි මාලාව අප පවත්වන්නේ ශ්‍රී ලංකා නිදහස් පක්ෂය ප්‍රමුඛ නව සන්ධානයේ ශක්තිය පෙන්වීම සඳහායි. මින් පෙර විවිධ පක්ෂ මොනරාගල දිස්ත්‍රික්කයේ මහජන හමු පැවැත්වුවා. නමුත් ඔවුන් කළේ වෙනත් දිස්ත්‍රික්කවලින් සෙනඟ ගෙනල්ලා පුරවන එක.
සමහරු මට යෝජනා කළා පොළ භූමියේ මේ රැලිය පවත්වමු කියලා. මම කිව්වා නෑ, මම මේක පවත්වන්නේ වැල්ලවාය පිට්ටනියේ කියලා. අද මේ ක්‍රීඩාංගණය විතරක් නෙවෙයි. මුළු නගරයම අප මහජනතාවගෙන් පිරෙව්වා. අද ම‌ෙග් දේශපාලන ජීවිතයට වසර 30ක් සම්පූර්ණ වෙනවා. එවැනි දිනෙක මගේ මොනරාගල ජනතාව මට ලොකු තෑග්ගක් දී තිබෙනවා. ඒ තමයි, ඔවුන් වසර තිහක් තිස්සේ මා කෙරෙහි තැබූ විශ්වාසය අද නැවතත් ඔවුන් තහවුරු කර තිබීම.”
මන්ත්‍රී අනුර ප්‍රියදර්ශන යාපා මහතා,
“අද මට මොනරාගල ත්‍රිත්වයක් මතක් වෙනවා. ඒ තමයි සුමේධා ජයසේන මැතිනිය, ජගත් පුෂ්පකුමාර හා විජයමුනි සොයිසා යන පිරිස. සුමේධා ජයසේන මැතිනිය හා ජගත් පුෂ්පකුමාර මහතා අද මෙතැන ඉන්නවා. විජයමුනි සොයිසා මහතා ඉදිරියේදී අපට එකතු වනු ඇතැයි මම හිතනවා. ශ්‍රී ලංකා නිදහස් පක්ෂය කියන්නේ ගාමක බලවේගයක්. එහි ගාමක බලවේගය වන්නේ මහජනතාවයි. අද මේ නව සන්ධානය තුළ රටේ හතර දිග්බාගයේ සිටින සිංහල, දෙමළ හා මුස්ලිම් සියලු මන්ත්‍රීවරු අපට එකතු වෙනවා. අපත් එක්ක සාකච්ඡා කරනවා. ඒ කරන්නේ හෙටට හොඳ රටක් නිර්මාණය කරන්න. ඒ වගේම අර පාරම්බාන හැටනවලක්ෂයේ ඡන්ද පදනම නොබිඳී ආරක්ෂා කර ගැනීමට. ඒ ජන බලය සමහර නායකයන්ගේ ක්‍රියාකලාපය නිසා බිඳ වැටෙමින් තිබුණා. අද අපට කෙටි කාලයක් තුළ දීර්ඝ ගමනක් යෑමට සිදු වෙනවා. ඒක ලොකු අභියෝගයක්. නමුත් අප ඒ අභියෝගය ජයගත යුතුයි. ඒ නිසා තමයි අප මෙම රැලි මාලාව සංවිධානය කර තිබෙන්නේ.”
