හිටපු ජනාධිපති මහින්ද රාජපක්ෂ මහතා ප්‍රමුඛ ශ්‍රී ලංකා පොදුජන පෙරමුණ ගනු ලැබූ සෑම තීන්දුවක්ම ගෙන තිබෙන්නේ මේ මහ පොළොවේ ජීවත් වන ජනතාවගේ ජීවිත සුරක්ෂිත කිරීමට බව ශ්‍රී ලංකා පොදුජන පෙරමුණේ ජාතික සංවිධායක සහ හම්බන්තොට දිස්ත්‍රික් පාර්ලිමේන්තු මන්ත්‍රී නාමල් රාජපක්ෂ මහතා අවධාරණය කරයි.
අනාගත දරු පරපුරේ හෙට දවස සුරක්ෂිත කරන්න පුළුවන් නූතන පරම්පරාවේ දේශපාලන බලවේගය ශ්‍රී ලංකා පොදුජන පෙරමුණ බව පෙන්වාදෙන ඒ මහතා ඉදිරියේදී පැමිණෙන කුමන අභියෝගයක් වුවද ජය ගැනීමට හැකි බව ද රටේ සහ ජාතියේ හෙට දවස වෙනුවෙන් සවිමත් දේශපාලන බලවේගය ලෙස නිරන්තරයෙන් පෙනී සිටින බව ද පෙන්වා දෙයි.
ඒ මහතා මේ බව සඳහන් කළේ කිරිබත්ගොඩ නගරයේදී පෙරේදා (29) පැවැති ශ්‍රී ලංකා පොදුජන පෙරමුණේ ගම්පහ දිස්ත්‍රික් කැලණිය ආසන සමුළුව අමතමිනි.
එහිදී වැඩිදුරටත් අදහස් පළ කළ පාර්ලිමේන්තු මන්ත්‍රී නාමල් රාජපක්ෂ මහතා,
“අප අදටත් විශ්වාස කරනවා මේ බදු ප්‍රතිපත්තිය තුළ දේශීය ව්‍යාපාරිකයාගේ බදු අඩු වෙන්න ඕනෑ. රජයක් විදියට විදේශ ආයෝජන සඳහා විශාල වශයෙන් සහන ලබා දෙනවා. ඒ සහන දේශීය ව්‍යාපාරිකයන්ටත් දෙන යුගයක් අප ආරම්භ කළ යුතු වෙනවා. දේශීය ව්‍යාපාරිකයා දියුණු වුණොත් තමයි නව රැකියා උත්පාදනය වන්නේ. නව රැකියා උත්පාදනය වුණොත් තමයි අපේ දරුවන් අතට සල්ලි ලැබෙන්නේ. බලාපොරොත්තුවන් ඇති වෙන්නේ. විශ්වවිද්‍යාලය හෝ කාර්මික පුහුණුව හෝ තාක්ෂණ පීඨය හෝ මෙයින් ලැබෙන අධ්‍යාපනය තුළ දරුවන්ට නව රැකියාවක් ලැබෙනවා. අසීමිත බදු ප්‍රත්පත්තියක් තුළ මේ රටේ ව්‍යාපාරිකයන්ට සාධාරණයක් ඉටුවන්නේ නැහැ. බදුවල ප්‍රතිශතයට වඩා බදු ගෙවන ප්‍රතිශතය වැඩි කරන්න අප උත්සාහ කරනවා. ඒකට තාක්ෂණයත් බද්ධ කරනවා. අපට වැඩපිළිවෙළක් තිබෙනවා. ඔබේ දරුවා අපේක්ෂා කරන තාක්ෂණික විප්ලවය තුළ නිර්මාණය වන රැකියාවට දරුවන් රැගෙන යන්න අපට වැඩපිළිවෙළක් තිබෙනවා. ඒ තුළ අප විශ්වාස කරන්නේ ඉදිරියේදී පැමිණෙන අභියෝගවලට අපට සාර්ථකව මුහුණ දෙන්න පුළුවන් කියලා. අප අද ආණ්ඩුවත් ජනාධිපතිවරයාත් අපේ මන්ත්‍රී කණ්ඩායම කරන වැඩපිළිවෙළ තුළ අද ණය ප්‍රතිව්‍යූහගතකරණය කර තිබෙනවා. ඒ ප්‍රතිව්‍යූහගතකරණය කළ ණය ප්‍රමාණය, ද්වීපාර්ශ්වික ණය එදා ගත්තේ මේ රටේ යටිතල පහසුකම් සංවර්ධනය කරන්න.
රාජ්‍ය සම්පත්වලට ආයෝජකයන් ගේන්න ඕනෑ. ඔවුන් ගෙනත් ඒවා පුළුල් කළ යුතු වෙනවා. ඒ තුළ නව රැකියා උත්පාදනය කළ යුතු වෙනවා. නමුත් ආයෝජකයාට පැමිණ ආයෝජනය කළ හැකි පරිසරය අප හදලා තිබෙන්නේ. අසීමිත බදු බර, කාලයෙන් කාලයට වෙනස් වන ප්‍රතිපත්ති, දේශපාලන අස්ථාවරත්වය තුළ සාධාරණත්වය අපේ දේශීය ව්‍යාපාරිකයන්ට හෝ විදෙස් ආයෝජකයන්ට හෝ ඉටුවෙන්නේ නැහැ. අප අවුරුදු 30ක් යුද්ධ කළා. මහින්ද රාජපක්ෂ මහතා ඒක අවුරුදු තුනෙන් අවසන් කළා. ඒ සටන් පාඨය ඉවත් කළා. දැන් ඇතැමුන් උත්සාහ කරනවා හොරු අල්ලන සටන් පාඨය ඊළඟ අවුරුදු 30ට තමන්ගේ මැතිවරණ වේදිකාවේ සටන් පාඨයක් කරගන්න.
ඔබේ දරුවාට අනාගතයක් තිබෙන්නේ වැඩපිළිවෙළක් හා දැක්මක් සමඟ දේශීයත්වය අගය කරන අපේකමට ගරු කරන ආගම දහම ආරක්ෂා කරන දේශපාලන බලවේගයටයි. අපේ සංස්කෘතිය අප රකින්න ඕනෑ. කිරිබත්ගොඩ නගරය ඒකට හොඳ උදාහරණයක්. එදා අරගලයෙන් කළේ අපේ සංස්කෘතියට ගහපු එක. සංස්කෘතිය වට්ටපු එක. ඔබ එදා ලබාදුන් හයිය තුළින් ගොඩනැඟුණු දේශපාලන සාරධර්ම ආරක්ෂා කරන්න ශ්‍රී ලංකා පොදුජන පෙරමුණ අපේක්ෂා කරනවා. එදා ත්‍රස්තවාදය අවසන් කරන විට ඊට විරුද්ධ වූ පිරිසක් හිටියා. අදටත් අපට ඇතැමුන් කියනවා යුද්ධය ගැන කතා කරන්නේ ඇයි කියලා. එහෙම කියන අය යුද්ධය සම්බන්ධයෙන් පොත් ලියනවා.
එදා අප විශ්වාස කළේ රණසිංහ ප්‍රේමදාස මහතා විතරයි එල්.ටී.ටී.ඊ.යට තුවක්කු දුන්නේ කියලා. පිල්ලෙයාන් ඇමැතිවරයා ප්‍රකාශයක් කර තිබෙනවා තවත් දේශපාලන පක්ෂයක් එල්.ටී.ටී.ඊ.යට තුවක්කු දුන්නා කියලා. එලෙස තුවක්කු දී තිබෙනවා නම් ඒ සම්බන්ධයෙන් පරීක්ෂණයක් සිදු කළ යුතු වෙනවා. ඇත්තටම එහෙම දේශපාලන පක්ෂයකට තුවක්කු තිබුණා ද එල්.ටී.ටී.ඊ.යට දෙන්න. එලෙස තුවක්කු දුන්නා නම් එම දේශපාලන පක්ෂයේ ප්‍රතිපත්ති සම්බන්ධයෙන් රටේ ජනතාව දැනුවත් විය යුතු වෙනවා. අප වැඩපිළිවෙළක් එක්ක යමු. ඔබේ දරුවාගේ හෙට දවස සුරක්ෂිත කරන්න පුළුවන් නූතන පරම්පරාවේ දේශපාලන බලවේගය ශ්‍රී ලංකා පොදුජන පෙරමුණයි. ඒ නිසා පොදුජන පෙරමුණ වටා එක් වෙන්න. මේ පිරිස රටට, ජාතියට ආදරය කරන පිරිසක්. මහින්ද රාජපක්ෂ මහතාගේ ප්‍රතිපත්ති සමඟ බද්ධ වුණු සහ එම ප්‍රතිපත්තිවලට ආදරය කළ පිරිසක් ලෙස අපේ බලවේගයත් එක්ක එකතු වෙන්න කියා ආරාධනා කරනවා. ප්‍රසන්න රණවීර මහතා ඉතා හොඳින් මේ ආසනයේ සංවිධාන කටයුතු කරනවා. හැම අවස්ථාවකම මහින්ද රාජපක්ෂ මහතාගේ දෑත් ශක්තිමත් කරන්න ඒ මහතා කටයුතු කර තිබෙනවා.”
ඇමැති ප්‍රසන්න රණතුංග මහතා,
“ඉතාම සාර්ථක ලෙස ශ්‍රී ලංකා පොදුජන පෙරමුණේ කැලණිය ආසන සම්මේලනය අද කිරිබත්ගොඩ නගරයේදී පැවැත්වෙනවා. ශ්‍රී ලංකා පොදුජන පෙරමුණ කියන්නේ අද ශ්‍රී ලංකාවේ තිබෙන ශක්තිමත්ම දේශපාලන පක්ෂය. පසුගිය ජනාධිපතිවරණයෙන් ගෝඨාභය රාජපක්ෂ මහතා වැඩි ඡන්දයෙන් ජය ගත්තා. එතුමා බලයට පැමිණි පසුව අපේ රටට කොවිඩ් – 19 වසංගතය බලපෑවා. රට වහන්න එපා, රට වැහුවොත් ආර්ථික වශයෙන් දැඩි බලපෑමකට ලක්වන බවට ආර්ථික විශේෂඥයන් ප්‍රකාශ කළා. නමුත් වෛද්‍යවරු පැවසුවා රට වහන්න එසේ නැති නම් ලක්ෂයක් දෙකක් පමණ ජනතාවක් මේ වසංගතයෙන් මිය යන බවට ප්‍රකාශ කළා. ඒ අනුව ආර්ථිකය කෙසේ වෙතත් ජනතාව ජීවත් විය යුතු බවට ජනාධිපති ගෝඨාභය රාජපක්ෂ මහතා තීරණය කළා. ඒ අනුව වෛද්‍යවරුන්ගේ උපදෙස් අනුව අවස්ථා කිහිපයකදී රට වසා දමන්න පියවර ගත්තා. ඒ අනුව රට වසා දමා ජනතාවට එන්නත් තුනම ලබා දෙන්න අවශ්‍ය පියවර ගත්තා. කෙසේ වෙතත් පසුව අපට විවිධ බාධක පැමිණියා. මිනිසුන්ගේ පීඩාව හේතුවෙන් සාමකාමී අරගලය ආරම්භ කළත් විපක්ෂයේ දේශපාලන පක්ෂ ඒ තුළට පැමිණීම හේතුවෙන් දේශපාලන අවශ්‍යතා සමඟ ගමන් කළා.”
රාජ්‍ය ඇමැති ප්‍රසන්න රණවීර මහතා,
“අපේ මන්ත්‍රීවරුන්ගේ නිවාසවලට ගිනි තබලා, පාක්ෂිකයන්ට පහරදීලා අපේ දේශපාලන ගමන නවත්වන්න පුළුවන් කියා ඇතැමුන් සිතන්න ඇති. නමුත් අපේ දේශපාලන ගමන නවත්වන්න බැහැ. මහින්ද රාජපක්ෂ මහතා ඇතුළුව 2015 වසරේදී අපව කුමන්ත්‍රණකාරී ලෙස පරාජයට පත් කළා. අපව මහ පාරේ ඇවිද්දවනවා කිව්වා. නමුත් මහින්ද රාජපක්ෂ මහතාගේ නායකත්වයෙන් බැසිල් රාජපක්ෂ මහතාගේ සංවිධායකත්වයෙන් ශ්‍රී ලංකා පොදුජන පෙරමුණ පිහිටුවූවා. අපේ පක්ෂය පිහිටුවීමෙන් පසුව පැවැති පළමු පළාත් පාලන මැතිවරණයෙන් සියයට 80ක පමණ ඡන්ද ප්‍රතිශතයක් ලබාගන්න පුළුවන් වුණා. එයින් පසුව ජනාධිපතිවරණය ද වැඩි ඡන්දයෙන් ජය ගන්න අපට පුළුවන්කම ලැබුණා.”
කුරුණෑගල දිස්ත්‍රික් පාර්ලිමේන්තු මන්ත්‍රී ජොන්ස්ටන් ප්‍රනාන්දු මහතා,
“1971 වසරේදී ජනතා විමුක්ති පෙරමුණ තුවක්කුව අතට ගත්තා. එල්.ටී.ටී.ඊ. ත්‍රස්ත සංවිධානය ආයුධ අතට ගත්තේ 1976 වසරේදී. හිටපු ජනාධිපති මහින්ද රාජපක්ෂ මහතා මේ රටේ අනාගතය දෙස බලා සංවර්ධනය කළා. අධිවේගි මාර්ග හැදුවා. අනෙකුත් මාර්ග කාපට් කළා. ගමට යන කුඩා පාරවල් ද කාපට් කරන්න මහින්ද රාජපක්ෂ මහතා පියවර ගත්තා. කාපට් මාර්ග තිබුණේ එක්තරා පැලැන්තියකට පමණයි. නමුත් රටේම පාරවල් කාපට් කරන්න අවශ්‍ය පියවර ගත්තා. වරායවල්, ගුවන්තොටුපොළවල් මහින්ද රාජපක්ෂ මහතා විසින් නිර්මාණය කළා. එතුමා කළ සංවර්ධන කටයුතු දෙස බලා ඇතැමුන් ඊර්ෂ්‍යාවෙන් කටයුතු කරනවා. අපහාස කරනවා. නමුත් මේ සංවර්ධන කටයුතු ක්‍රියාත්මක කළේ අනාගතය වෙනුවෙන්.”
දිගාමඬුල්ල දිස්ත්‍රික් පාර්ලිමේන්තු මන්ත්‍රී ඩී. වීරසිංහ මහතා,
“හොරු අල්ලන්න ඕන, රට හදන්න අපට දෙන්න කියා ජනතා විමුක්ති පෙරමුණ කියනවා. අනුර කුමාර දිසානායකලාගේ පක්ෂය තමයි මේ රටට හොරකම කියා දුන්නේ. ඒ වගේම මේ රටේ භීෂණය නැති කරන්න කියා ඔවුන් ඡන්දය ඉල්ලනවා. මේ රටට භීෂණය කියලා දුන්නෙත් ජනතා විමුක්ති පෙරමුණයි. එදා රත්මලාන ගුවන් හමුදා කඳවුරට පහර දීලා ආයුධ රැගෙන ගියා. අදටත් ඔවුන් සතුව ඒ ආයුධ තිබෙනවා.”
බදුල්ල දිස්ත්‍රික් පාර්ලිමේන්තු මන්ත්‍රී තිස්ස කුට්ටිආරච්චි මහතා,
“එදා ජේ.ආර්. ජයවර්ධන මහතා මේ රටට විවෘත ආර්ථිකය හඳුන්වා දුන්නා. නමුත් ඒ මහතා මිනීමැරුවේ නැහැ. ප්‍රේමදාස ජනාධිපතිවරයා ඒකට මරණයෙන් උත්තර දුන්නා. 1994 වසරේදී චන්ද්‍රිකා බණ්ඩාරනායක මහත්මිය ජනාධිපතිනිය වශයෙන් පත් වුණා. එයින් පසුව දෙවැනි වරටත් ඒ මහත්මිය කුමක් හෝ නිසා බලයට පැමිණියා. නමුත් මෙවැනි රැස්වීමක් එදා මේ ස්ථානයේ පවත්වන්න පුළුවන් තත්ත්වයක් තිබුණේ නැහැ. කොයි වෙලාවේ බෝම්බ පුපුරයි ද දන්නේ නැහැ. ඒ නිසා 2005 වසරේදී බලයට පැමිණි මහින්ද රාජපක්ෂ ජනාධිපතිතුමාගෙන් ඉල්ලුවේ යුද්ධය අවසන් කර දෙන්න කියලයි. ඒ කාර්යය මහින්ද රාජපක්ෂ මහතා අකුරටම කළා.”
රාජ්‍ය ඇමැති ඉන්දික අනුරුද්ධ මහතා සහ පාර්ලිමේන්තු මන්ත්‍රීවරු, පළාත් සභා සහ ප්‍රාදේශීය සභා මන්ත්‍රීවරුන් ඇතුළු විශාල පිරිසක් මේ අවස්ථාවට එක්ව සිටියහ.
