නව වැඩ බලන නීතිපතිවරයා ලෙස ජ්යෙෂ්ඨ අතිරේක සොලිසිටර් ජනරාල් ජනාධිපති නීතිඥ පාරින්ද රණසිංහ (කනිෂ්ඨ) මහතා අද (01) දිවුරුම් දීමට නියමිතය. නීතිපතිවරයා ලෙස කටයුතු කළ සංජය රාජරත්නම් මහතා විශ්රාම යාමෙන් පසු පුරප්පාඩු වූ නීතිපති ධුරයේ කටයුතු කිරීම සඳහා ඉකුත් 28 වැනිදා ජනාධිපති රනිල් වික්රමසිංහ මහතා විසින් පාරින්ද රණසිංහ මහතා පත් කරන ලදී.
ආණ්ඩුක්රම ව්යවස්ථාවේ 61E(b) සහ 41(c) යන ව්යවස්ථාවලින් පවරා ඇති බලතල අනුව මෙම පත් කිරීම කර තිබේ. එම පත්වීම ජුනි මස 28වැනිදා සිට ජූලි මස 11වැනිදා තෙක් බලපවත්වන පරිදි සිදු කර ඇත. නීතිපති දෙපාර්තමේන්තුවේ රජයේ නීතීඥවරයකු ලෙස සේවයට එක් වූ ඒ මහතා රජයේ ජ්යෙෂ්ඨ නීතිඥ, නියෝජ්ය සොලිසිටර් ජෙනරාල්, අතිරේක සොලිසිටර් ජනරාල් සහ ජ්යෙෂ්ඨ අතිරේක සොලිසිටර් ජෙනරාල්වරයා ලෙස විවිධ තනතුරු දරමින් වසර තිස් එකක් නීතිපති දෙපාර්තමේන්තුවේ සේවය කළ ජ්යෙෂ්ඨ නිලධාරියෙකි. ජාත්යන්තර සමුද්ර නීතිය ඇතුළු නීති කේෂත්ර කිහිපයක නීති ශාස්ත්රපති උපාධිය ලබා ගෙන ඇති ඒ මහතා මෝල්ටාව සහ සිංගප්පූරුවේ වැඩිදුර නීති අධ්යාපනය ලබා ගෙන ඇත. ඒ මහතා ශ්රී ලංකාවේ 38 වැනි අගවිනිසුරුවරයා වන පාරින්ද රණසිංහ මහතාගේ පුත්රයා ද වෙයි.