- යශෝධ රංගේට ලක්ෂ 5ක ශරීර ඇප
- කලිනුත් අධික වේගයෙන් ගෙදරක හැප්පිලා
එක්සත් ජාතික පක්ෂයේ මහ ලේකම් පාලිත රංගේ බණ්ඩාර මහතාගේ පුත් යශෝධ රංගේ බණ්ඩාර විසින් පදවනු ලැබූ සුඛෝපභෝගී මෝටර් රථය හා ත්‍රිරෝද රථයක් ගැටීමෙන් පෙරේදා (29) අලුයම සිදු වූ රිය අනතුරින් ත්‍රිරෝද රථයේ රියැදුරු බරපතළ තුවාල ලබා පුත්තලම මූලික රෝහලට ඇතුළත් කර ඇති බව කරුවලගස්වැව රථ වාහන පොලිසිය සඳහන් කරයි.
මෙසේ අනතුරට ලක්ව ඇත්තේ පුත්තලම සිට අනුරාධපුර දෙසට ධාවනය වූ සුඛෝපභෝගි මෝටර් රථය හා අනුරාධපුර සිට පුත්තලම දෙසට ධාවනය වූ ත්‍රිරෝද රථයකි. අදාළ මෝටර් රථය තබ්බෝව හතේ කණුව මීඔය ප්‍රදේශයේදී රියැදුරුට එහි වේගය පාලනය කරගැනීමට නොහැකිව යෑමෙන් මාර්ගයෙන් ඉවතට පැන, ඉදිරියෙන් පැමිණි ත්‍රිරෝද රථයේ ගැටීමෙන් මේ අනතුර සිදුව ඇත. අනතුර සිදු වන අවස්ථාවේ මෝටර් රථයේ රියැදුරු සහ ත්‍රිරෝද රථයේ රියැදුරු පමණක් සිට ඇති බව පොලිසිය කියයි. අනතුරින් බරපතළ තුවාල ලැබූ ත්‍රිරෝද රථයේ රියැදුරු පුත්තලම මූලික රෝහලේ නේවාසිකව ප්‍රතිකාර ලබන අතර, ඔහු සිරම්බිඅඩිය, මානවේරිය ප්‍රදේශයේ පදිංචි 34 හැවිරිදි කෝට්ටගේ දොන් ජූඩ් සාන්ත නම් අයෙකි. සිද්ධිය සම්බන්ධයෙන් එක්සත් ජාතික පක්ෂයේ මහ ලේකම් පාලිත රංගේ බණ්ඩාර මහතාගේ පුත් යශෝධ රංගේ බණ්ඩාර, කරුවලගස්වැව පොලිසිය මඟින් අත්අඩංගුවට ගෙන, පුත්තලම මහේස්ත්‍රාත් අධිකරණයට ඉදිරිපත් කිරීමෙන් අනතුරුව රුපියල් ලක්ෂ 5ක් වූ ශරීර ඇපයක් මත මුදාහැරීමට කටයුතු කර ඇත. මෝටර් රථයේ රියැදුරුගේ රියැදුරු බලපත්‍රය තාවකාලිකව අත්හිටුවීමට අධිකරණය නියෝග කළේය.
සිද්ධිය සම්බනධයෙන් කරුවලගස්වැව පොලිස් රථ වාහන අංශයේ නිලධාරීහු පුළුල් විමර්ශන ආරම්භ කර තිබිණි. අනතුරින් ත්‍රිරෝද රථයටද දැඩි අලාභ හානි සිදුව ඇති අතර, මෝටර් රථයට ද අලාභ හානියක් සිදුව ඇති ආකාරයක් දක්නට ලැබේ. මීට පෙර මේ මෝටර් රථ රියැදුරු පැදවූ ඩබල් කැබ් රථයක් වේගය පාලනය කරගැනීමට නොහැකිව හලාවත පුත්තලම මාර්ගයේ කෝට්ටපිටිය මංසන්ධියේදී නිවෙසක ගැටී අනතුරක්ද සිදු වී තිබිණි.
වනාතවිල්ලුව සමූහ - කේ. ප්‍රියංකර කළුපහන
