2024දී මාර්ග කිලෝමීටර් 1500ක් ප්‍රතිසංස්කරණය කිරීමේ ව්‍යාපෘතිය යටතේ කාපට් අතුරා සංවර්ධනය කරන ලද මහනුවර දිස්ත්‍රික්කයේ හේවාහැට, කිවුලතැන්න, තොලබෝතැන්න, අපොන්සුවත්ත මාර්ගය ජනතා අයිතියට පත්කිරීම ආයෝජන ප්‍රවර්ධන රාජ්‍ය ඇමැති දිලුම් අමුණගම මහතාගේ ආරාධනයෙන්, ප්‍රවාහන හා මහාමාර්ග සහ ජනමාධ්‍ය ඇමැති, ආචාර්ය බන්දුල ගුණවර්ධන මහතාගේ අතින් සිදු විය.
දෛනිකව විශාල පිරිසක් ගමනාගමන අවශ්‍යතා වෙනුවෙන් භාවිත කරන මේ මාර්ගය දීර්ඝ කාලයකින් කිසිදු ප්‍රතිසංස්කරණයක්‌ සිදු නොවීම හේතුවෙන් ප්‍රදේශවාසී ජනතාව අපහසුතා රැසකට මුහුණ දුණි.
මේ තත්ත්වය පිළිබඳව රාජ්‍ය ඇමැති දිලුම් අමුණුගම මහතා විසින් ඇමැති, ආචාර්ය බන්දුල ගුණවර්ධන මහතාගේ අවධානයට යොමු කිරීමෙන් අනතුරුව මාර්ග සංවර්ධන අධිකාරියේ සෘජු ශ්‍රම දායකත්වය යටතේ මාස 4ක පමණ කෙටි කාලයකදී මේ මාර්ගය කාපට් අතුරා සංවර්ධනය කිරීමට කටයුතු කරන ලදි.
මේ අවස්ථාවට එක් වෙමින් අදහස් දැක්වූ ඇමැතිවරයා මෙලෙස ද කීවේය.
“ගමනාගමනය සඳහා ඉතාමත් අපහසු තත්ත්වයේ පවතින මංමාවත් ඇතුළු විදුලිය, සෞඛ්‍ය, අධ්‍යාපන පහසුකම් සංවර්ධනය කිරීමේදී ජනතාව මුහුණ දෙන ගැටලු බොහොමයකට තනි තනිව විසඳුම් සොයා ගැනීමේ හැකියාවක් කිසිවකුටත් නෑ. එම පොදු ගැටලුවලට ගැළපෙන විසඳුම් සලසා දීමට ප්‍රජාතන්ත්‍රවාදී ලෙස රජයන් බලයට පත් කරනවා. එලෙස පත් කරන රජයන් රටේ සම්පත් දූරදර්ශී ලෙස කළමනාකරණය නොකළොත් එයින් ඇති වන ප්‍රතිඵලවලට මුහුණ දීමට අපට සිදු වෙනවා. නිදහසින් පසුව අපේ රට එදිනෙදා පවත්වාගෙන යෑමට අවශ්‍ය වියදම පියවා ගැනීමට ප්‍රමාණවත් ආදායමක් නොලැබූ රටක්. ඒ හේතුවෙන් සෑම රජයකටම විශාල වශයෙන් දේශීය සහ විදේශීය ණය ගැනීමට සිදු වුණා. එය ද ප්‍රමාණවත් නොවන විට මුදල් මුද්‍රණය කිරීමට සිදු වුණා.
පසුගිය වසරේ අපේ රටේ සියලුම බදු සහ බදු නොවන මාර්ගවලින් ගත් ආදායම රුපියල් ට්‍රිලියන තුනයි. පසුගිය වසරේ රාජ්‍ය සේවක වැටුප්, විශ්‍රාම වැටුප්, සමෘද්ධි අස්වැසුම ඇතුළු සහනාධාර, පොලී ගෙවීම් සඳහා ට්‍රිලියන 4.7ක් වැයවී තිබෙනවා. එලෙස දරා තිබෙන අමතර වියදම සිදු කර තිබෙන්නේ සෑම සතියකම ශ්‍රී ලංකා මහ බැංකුව භාණ්ඩාගාර බිල්පත් වෙන්දේසි කර ගන්නා ණය මුදල්වලින්.
දේශපාලනඥයන් විසින් මේ සැබෑ තත්ත්වය ජනතාවට පැහැදිලි නොකිරීම මත මේ සරල සත්‍ය ජනතාවට තේරුම් ගැනීමට නොහැකිවී තිබෙනවා. පසුගිය දශක හතර පුරාවටම සෑම සංවර්ධන කටයුත්තක්ම සිදු කර තිබෙන්නේ දේශීය සහ විදේශීය වශයෙන් ගත් ණයවලින්. එම මුදල් ප්‍රමාණවත් නොවන විට මහ බැංකුව විසින් මුදල් මුද්‍රණය කර තිබෙනවා. අවසානයේ ගත් ණය ගෙවා ගැනීමට නොහැකි තත්ත්වයකට රට පත්වුණා. එලෙස මුහුණ දුන් මූල්‍ය අර්බුදයෙන් රට ගලවාගැනීමට විදේශීය විශේෂඥ ආයතනවල සහාය ගැනීමට ද සිදු වුණා. ඒ අනුව මූල්‍ය අර්බුද කළමනාකරණය කිරීමට ප්‍රංශයේ ලසාර්ඩ් සමාගමත්, නීතිමය කටයුතු කළමනාකරණය කිරීමට ක්ලිෆර්ඩ් හාන්සි සමාගමත් කටයුතු කළා. පසුගියදා ජනාධිපතිවරයා විසින් ජාතිය අමතා සිදු කරන ලද විශේෂ කතාවේදී ණය ප්‍රතිව්‍යුහගත කිරීමේ කටයුතුවලදී සහාය දීම පිළිබඳ එම ආයතනවලට විශේෂ ස්තූතියක් ද පිරිනැමුවා.
රට තුළ මෙවැනි අර්බුදයක් ඇතිවනු ඇති බව හඳුනාගත් ගෝඨාභය රාජපක්ෂ ජනාධිපතිවරයා ජාත්‍යන්තර මූල්‍ය අරමුදලේ සහාය ඒ වෙනුවෙන් ගැනීමට සැරසෙන අවස්ථාවේදී කැබිනට් මණ්ඩලයේ බොහෝ දෙනකු ඊට විරුද්ධත්වය පළ කළා.
හේවාහැට, කිවුලතැන්න, තොලබෝතැන්න, අපොන්සුවත්ත මාර්ගය ප්‍රතිසංස්කරණය කරමින්
ඉන් අනතුරුව අභියෝග රාශියක් මාධ්‍යයේ රට භාර ගත් රනිල් වික්‍රමසිංහ ජනාධිපතිවරයා මේ අර්බුදයෙන් රට ගලවා ගැනීමට පවතින අවසන් අවස්ථාව ලෙස සලකමින් අවසන් ණය දෙන්නා වශයෙන් සැලකෙන ජාත්‍යන්තර මූල්‍ය අරමුදල සමඟ විස්තීර්ණ ණය ගිවිසුමකට එළැඹුණා. 2027 දක්වාම සියලු සංවර්ධන කටයුතු සිදු කරන්නේ එම ණය ගිවිසුම යටතේ ලැබෙන ණය ආධාර අනුවයි. නැවත වතාවක් ණයවර ලිපියක් නිකුත් කිරීමට හැකි ආකාරයේ ජාත්‍යන්තර විශ්වාසයක් ඇති කරගෙන තිබෙන්නේ ජාත්‍යන්තර මූල්‍ය අරමුදලේ විස්තීර්ණ ණය ගිවිසුම අනුවයි. මීට පෙර දහසය වතාවක් මෙවැනි ගිවිසුම් අත්හැර දමා තිබෙනවා. මේ ගිවිසුම අත්හැර ගිවිසුම් එකඟතා අතහැර දමා කවුරුන් රජයක බලය ගත්තත් සති දෙකක කාලයක්වත් එය පවත්වාගෙන යෑමට හැකියාවක් ලැබෙන්නේ නෑ. IMF විස්තීර්ණ ණය ගිවිසුම් එකඟතාවලට සහ විදේශීය ණය ගිවිසුම්වලට එකඟ නොවී රට බේරා ගැනීමට හැකියාවක් නෑ. මේ එකඟතාවලට එළැඹෙනු ලැබුවේ ඉතාමත් සංකීර්ණ ක්‍රියාවලියක ප්‍රතිඵල ලෙසයි. ඉන්දියාව, චීනය, ජපානය ඇතුළු රටවල් ගණනාවක රාජ්‍ය නායකයන් සමඟ ජනාධිපතිවරයා ඒ වෙනුවෙන් විශේෂ සාකච්ඡා වට ගණනාවක් පැවැත්වූවා. ඒ අනුව ඇති කර ගත් එකඟතා අනුව පසුගිය සතියේ අත්සන් කරන ලද ගිවිසුමට අනුව දීර්ඝ කාලීන වශයෙන් ගත් ණය ගෙවා අවසන් කිරීම පිළිබඳ ශ්‍රී ලංකා රජය හා ජනතාව වශයෙන් අනුගමනය කළ යුතු මාර්ගෝපදේශන මාලාවක්, ප්‍රතිපත්ති මාලාවක් සකස් කර තිබෙනවා. එලෙස එකඟ වූ කොන්දේසි කිසිදු හේතුවක් මත වෙනස් කිරීමේ හෝ අතහැර දැමීමේ හැකියාවක් නෑ. එසේ වුවහොත් ලෝකය නැවත වතාවක් අපේ රට අත්හැර දමනවා. කිසිදු රටක සහාය හිමි වන්නේ නෑ. ජාත්‍යන්තර මූල්‍ය අරමුදල, ආසියානු සංවර්ධන බැංකුව, ලෝක බැංකුව ඇතුළු ජාත්‍යන්තර සංවිධානවල සහයෝගය ආධාරවලින් තොරව කිසිදු සංවර්ධන ව්‍යාපෘතියක් සිදු කිරීමේ හැකියාවක් නෑ. මේ සත්‍යය තේරුම් නොගනිමින් සුරුට්ටු කඩයක් හෝ පවත්වාගෙන නොගිය පිරිසක් ආණ්ඩු බලය ඉල්ලා සිටියාට ඔවුන්ට රජයක් පවත්වාගෙන යෑමට හැකියාවක් නෑ. ලෝකය යන දිශාව තේරුම් නොගනිමින් අපේ රට තුළ පවතින ළිං මැඬි මානසිකත්වය හේතුවෙන් රටට ප්‍රමාණවත් විදේශ ආයෝජන ලැබී නෑ.
ඉදිරියේදී ලෝක බැංකු ව්‍යාපෘතියක් යටතේ මහනුවර නගරය සුහුරු හරිත නගරයක් බවට පත් කිරීමට විදුලි බස් රථ දෙසීයක් ධාවනයට එක් කිරීමේ ව්‍යාපෘතියක් ක්‍රියාත්මක වෙනවා. පසුගිය සතියේ ණය ගෙවීම පිළිබඳ ගිවිසුම්වලට එළඹුණු බැවින් ඒ පිළිබඳ සාකච්ඡා නැවත ආරම්භ කිරීමට හැකි වෙනවා.
ඉතාමත් නිවැරදිව රට නැවත ගොඩනැඟීමට නිශ්චිත පැහැදිලි වැඩපිළිවෙළක් සහිතව වඩා හොඳ රටක් හෙට දිනයේ ඇති කිරීම සඳහා ජනාධිපති රනිල් වික්‍රමසිංහ මහතා විශාල වෙහෙසක් දරමින් කටයුතු කරනවා. රට පත්ව තිබෙන අර්බුදයෙන් ගලවා ගැනීමට නිසි වැඩපිළිවෙළක් සහිත මාර්ගයේ ගමන් කිරීමකින් තොරව කිසිදු විසඳුමක් මේ ගැටලුවලට නෑ. සිදුකරන ලද සාකච්ඡා සාර්ථක කරගැනීමේ අනතුරුව නතරවී ඇති සියලු සංවර්ධන කටයුතු නැවත ආරම්භ කිරීමට හැකියාව ලැබෙනු ඇති බව මා විශ්වාස කරනවා.”
රාජ්‍ය සංවර්ධන සහ නිර්මාණ නීතිගත සංස්ථාවේ සභාපති කුෂාන් දේවින්ද, පාත හේවාහැට හිටපු ප්‍රාදේශීය සභා සභාපති රණසිංහ යාපා බණ්ඩාර මහත්වරුන්, හිටපු පළාත් පාලන ආයතන නියෝජිතයන්, මාර්ග සංවර්ධන අධිකාරිය මධ්‍යම පළාත් අධ්‍යක්ෂ මහේන්ද්‍රන් විජේපාල මහතා ඇතුළු නිලධාරීන්, ප්‍රදේශයේ රාජ්‍ය නිලධාරීන්, ප්‍රදේශවාසීන් ඇතුළු විශාල පිරිසක් මේ අවස්ථාවට එක්ව සිටියහ.
අසේල කුරුළුවංශ
