රුසියා – යුක්රේන යුද ගැටුම්වලට සම්බන්ධ වී සිටින ශ්රී ලාංකිකයන්ගේ ගැටලු සහ අවශ්යතා පිළිබඳ සාකච්ඡා කිරීම සඳහා නිරන්තරයෙන් හමු වීම සඳහා ඒකාබද්ධ ක්රියාකාරී කමිටුවක් පිහිටුවීමට ශ්රී ලංකාවේ සහ රුසියාවේ එකඟතාව හිමි වී තිබේ. විදේශ කටයුතු රාජ්ය ඇමති තාරක බාලසූරිය මහතා ප්රමුඛ ඉහළ පෙළේ නියෝජිත පිරිසක් රුසියානු සමූහාණ්ඩුවේ සංචාරයක නිරත වූ අතර රුසියානු සමූහාණ්ඩුවේ විදේශ කටයුතු නියෝජ්ය අමාත්ය අන්ද්රේ රුඩෙන්කෝ සහ ආරක්ෂක නියෝජ්ය අමාත්ය ජෙනරාල් ඒ.වී. ෆොමින් මහත්වරුන් සමඟ රුසියානු සන්නද්ධ හමුදාවන්හි කොන්ත්රාත් පදනම මත සේවයේ යොදවා සිටින ශ්රී ලාංකිකයන් සම්බන්ධයෙන් පැවැත්වූ සාකච්ඡාවේදී මේ බව අනාවරණය වූ බව විදේශ කටයුතු අමාත්යාංශය පවසයි.
ක්රියාන්විතයේ දී මියගිය ශ්රී ලාංකිකයන් 17 දෙනා පිළිබඳව, මියගිය සහ තුවාල ලැබූවන් සඳහා වන්දි ගෙවීම, සම්බන්ධ කරගත නොහැකි ශ්රී ලාංකිකයන්ගේ දුක්ඛිත තත්ත්වය, ස්වේච්ඡාවෙන් ආපසු සියරට බලායෑමේ හැකියාව, කොන්ත්රාත්තු කඩිනමින් අවසන් කිරීම සහ වේතනය විධිමත් කිරීම යන කරුණු කෙරෙහි මෙම සාකච්ඡාවලදී අවධානය යොමු විය.
සේවයේ යොදවා ඇති ශ්රී ලාංකිකයින්ගේ ගැටලු සහ අවශ්යතා පිළිබඳ සාකච්ඡා කිරීම සඳහා නිරන්තරයෙන් හමුවීමට දෙපාර්ශ්වයේ නිලධාරීන්ගෙන් සමන්විත ඒකාබද්ධ ක්රියාකාරී කමිටුවක් පිහිටුවීමට ශ්රී ලංකාව මෙම හමුවේදී යෝජනා කර තිබෙන අතර අදාළ කරුණු සම්බන්ධයෙන් කටයුතු කරගෙන යෑමට දෙපාර්ශවයම එකඟ වී තිබේ.
රාජ්ය අමාත්යවරයාගේ ප්රධානත්වයෙන් යුත් ඉහළ පෙළේ දූත පිරිසට පාර්ලිමේන්තු මන්ත්රීවරුන් වන දයාසිරි ජයසේකර සහ ගාමිණී වලේබොඩ, ආරක්ෂක අමාත්යාංශයේ ලේකම් ජෙනරාල් ජී.ඩී.එච්.කමල් ගුණරත්න, රුසියානු සමූහාණ්ඩුවේ ශ්රී ලංකා තානාපති පී.එම්.අම්සා, අතිරේක සොලිසිටර් ජනරාල් හරිප්රියා ජයසුන්දර, විදේශ කටයුතු අමාත්යාංශයේ කොන්සියුලර් කටයුතු අංශයේ අධ්යක්ෂ ජනරාල් සිසිර සෙනවිරත්න, හිටපු තානාපති ආචාර්ය සමන් වීරසිංහ මහත්වරු සහ රුසියානු සමූහාණ්ඩුවේ ශ්රී ලංකා තානාපති කාර්යාලයේ නිලධාරීහු මෙම අවස්ථාවට එක්ව ඇත.
මහින්ද අලුත්ගෙදර