ශ්‍රී ලංකා විදේශ සේවා නියුක්ති කාර්යාංශයේ වලංගු බලපත්‍රයක් නොමැතිව පවත්වාගෙන ගිය වංචනික විදේශ රැකියා නියෝජිතායතනයක් කාර්යාංශයේ විශේෂ විමර්ශන අංශයේ නිළධාරීන් විසින් පසුගියදා(25) වටලා තිබේ.
කොට්ටාව, මාකුඹුර හන්දියේ Pearl Wings Visa Consultancy යන නමින් නිතිවිරෝධි විදේශ රැකියා නියෝජිතායතනයක් පවත්වාගෙන යන බවටත්, එම ආයතනය මගින් රුමේනියාව, ඇල්බේනියාව, සයිප්‍රස් යන රටවල රැකියා සඳහා බඳවාගැනීම් සිදුකරන බවට කාර්යාංශයට ලද තොරතුරක් මත මෙම වැටලීම සිදුකරන ලදී.
කාර්යාංශයේ විශේෂ විමර්ශන අංශයේ නිළධාරීන් විසින් අදාළ ආයතනයේ හිමිකරු එහිදී අත්අඩංගුවට ගත් අතර, ඔහුගෙන් සිදුකළ ප්‍රශ්න කිරීමේදී ඔහු වෘත්තියෙන් නීතිඥවරයෙකු බවත් හෙළිවී ඇත. අදාළ ස්ථානයේ තිබී විදේශ ගමන් බලපත්‍ර 50ක්, රැකියා අයදුම්පත්, වීසා ලේඛන ඇතුළු තවත් ලේඛන විශාල ප්‍රමාණයක් නිළධාරීන් භාරයට ගෙන තිබේ.
අත්අඩංගුවට ගත් සැකකරු ඊයේ (26) හෝමාගම මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව රුපියල් ලක්ෂ 10ක ශරීර ඇපයක් මත මුදාහැරීමට මහේස්ත්‍රාත්වරයා නියෝග කරන ලදී.
මෙම වැටලීම සඳහා කාර්යාංශයේ විශේෂ විමර්ශන අංශයේ කළමනාකරු කපිල කරුණාරත්න, ඉදුනිල් පුෂ්පකුමාර, අමිල පෙරේරා, මහීෂ කොඩිප්පිලිආරච්චි, මධුශාන් විජේවර්ධන හා ගයේෂා සුභාෂිණි යන නිළධාරීන් එක්විය.
මේ අතර, රැසියාවේ රැකියා සඳහා ශිෂ්‍ය වීසා මගින් තරුණයෙකු යොමුකළ බලපත්‍රලාභියෙකුද විශේෂ විමර්ශන අංශය මගින් ජූනි 25 දින අත්අඩංගුවට ගෙන තිබේ.
රුසියාවේ චොකලට් නිශ්පාදනාගාරයක රැකියාව සඳහා ශිෂ්‍ය වීසා මගින් ගොස් පොරොන්දු වූ පරිදි රැකියාව ලබානොදුන් බවට මාස 3ට පසු යළි දිවයිනට පැමිණි තරුණයෙකු විසින් කාර්යාංශය වෙත පැමිණිලි කරන ලදී. ඒ අනුව අදාළ පැමිණිල්ල විභාග කිරීම සඳහා මෙම බලපත්‍රලාභියා කාර්යාංශය වෙත කැඳවා ප්‍රකාශ සටහන් කරගැනීමෙන් අනතුරුව අත්අඩංගුවට ගෙන තිබේ.
මෙම රැකියා නියෝජිතායතනයට රැසියාවේ ඇගළුම් ක්ෂේත්‍රයේ රැකියා සඳහා ශ්‍රි ලාංකිකයින් යොමුකිරීම සඳහා රැකියා ඇණවුමක්ද තිබී ඇති අතර, බලපත්‍ර කොන්දේසි උල්ලංඝණය කරන ලද අදාළ රැකියා නියෝජිතායතනයේ බලපත්‍රය තාවකාලිකව අත්හිටුවීමට කාර්යාංශය පියවර ගෙන ඇත.
අත්අඩංගුවට ගත් රැකියා නියෝජිතායතනයේ හිමිකරු ඊයේ දින මහර මහේස්ත්‍රාත් අධිකරණය වෙත ඉදිරිපත් කළ අතර, පැමිණිලිකරුට උසාවි භුමියේදීම රුපියල් ලක්ෂ 2ක මුදලක් ගෙවූ අතර, ඉතිරි මුදල් හැකි ඉක්මණින් ලබාදෙන බවට පොරොන්දු විය. ඒ අනුව සැකකරු රුපියල් ලක්ෂ 5ක ශරීර ඇප 2ක් මත මුදාහැරීමට මහේස්ත්‍රාත්වරයා නියෝග කළ අතර, විදෙස් ගමන් තහනමක්ද පනවා තිබේ. ඉදිරි නඩු දිනය ජූලි මස 24 වන දින යළි කැඳවීමට නියමිතයි.
විදේශ රැකියාවක් ලබාගැනීම සඳහා යම් ආයතනයකට හෝ පුද්ගලයෙකුට මුදල් හෝ විදේශ ගමන් බලපත්‍රය ලබාදීමට පෙර එම ආයතනයට විදේශ රැකියා සඳහා බදවාගැනීමට කාර්යාංශයේ වලංගු බලපත්‍රයක් තිබේද යන්න හා වලංගු රැකියා නියෝජිතායතනයක් වුවද එම ආයතනයට අදාළ රැකියාව සඳහා වලංගු රැකියා ඇණවුමක් ලැබී ඇත්දැයි යන්න සොයා බැලීම සඳහා කාර්යාංශයේ www.slbfe.lk වෙබ් අඩවියට පිවිසීමෙන් හෝ 1989 ක්ෂණික ඇමතුම් අංකය ඇමතීම මගින් තොරතුරු ලබාගන්නා ලෙස කාර්යාංශය විදේශ රැකියා අපේක්ෂිතයින්ගෙන් ඉල්ලා සිටියි.
